نامِه مَسیحینی عبرانی نِژادی سِه 7 - کتاب مقدس به زبان مازندرانی - گویش غربی

مِلْکیصِدِقی کِهانت

¹ چون هَین مِلْکیصِدِق، سالیمی شهری پادشاه و خِدای مِتِعالی کاهِن وِه. وی، ابراهیم گه پادشاهنِ شِکَست هادا وِه رِه، بَئیِه و وِرِه بَرکَت هادا.

² و ابراهیم هر چی گه داشتِه ای جا، وِرِه دَه یِک هادا. وی اِسمی معنی اَوَّل «صالحی ای پادشاه» و اَزما «سالیمی پادشاه»، یَعنی «صِلح و سلامتی ای پادشاه» هَسِّه.

³ هَین مِلْکیصِدِق پیر و مار نارنِه، نا وی شجره نامِه معلومِ و نا وی زندگی ای اوّلین روزا و نا آخرین روزا معلومِ، ولی خِدایی ریکائی تَرا، وی تا اَبَد کاهن مونِّه.

⁴ هارشین گه وی چَنی گَتِه آدم وِه گه ابراهیم، اسرائیلی قومی پیر، غنایمی جا وِرِه دَه یِک هادا!

⁵ و طبقِ موسایی شریعتی حِکم، لاوی ای وَچیلِه گه کاهن وونِنِه، وِنِه یهودی قومی جا گه وشونی بِرارنِنِ دَه یِک بَیرِن، هر چَن وِشون هَم ابراهیمی نَسلی جانِه.

⁶ ولی هَین مِلْکیصِدِق گه وِشونی نَسلی جا نیِه، ابراهیمی جا دَه یِک بَیتِه، و ابراهیم گه وعده هایی صاحِب وِه رِه، بَرکَت هادا.

⁷ و بی شَک، اونیگه بَرکت دِنِه اونیگه برکت گیرنِه ای جا گَتتَرِ.

⁸ یَتوَر، اونانیگه از بِین شوونِنِه دَه یِک گیرِنِه؛ ولی یَتوَر دییَر اونیگه وی خَوَری شهادت هادا بَوِه گه زینِّئه دَه یِک گیرنِه.

⁹ حتّی بَتِمّی بُئیم شِه لاوی هَم گه دَه یِک گیتِه، ابراهیمی طریق دَه یِک هادا.

¹⁰ چون هون موقِه گه مِلْکیصِدِق ابراهیمِ بَئی وِه، لاوی حَلا دِنیا نیمو وِه.

عیسی، مِلْکیصِدِقی هَمرا مقایسه وونِه

¹¹ اِسا، اگه کامِل بَووئن لاوی ای کاهنِنی رَدِه ای طریق اَنجام وونِسِه، دِ چی احتیاجی وِه یَت دییَر کاهِن، مِلْکیصِدِقی رَدِه ای جا بیِه عوضِ هَینگه هارونی رَدِه ای جا ووئه؟ چون لاوی ای کِهانتی دوره ای دِلِه، شریعت، یَهودی قومِ هادا بَوِه.

¹² چون اگه کِهانتی خِدمت عوض بَوو، ناچاراً شریعَتی قانونَم عوض وونِه.

¹³ چون اونیگه هَین چیا وی خَوَری بُتِه بَوِه، یَت دییَر طایفه ای جائه، گه هون طایفه ای جا هیچ وخت هیچکس قِروونگاهی دِلِه خِدمت نَکِردِه؛

¹⁴ چون معلومِ اَمِه خِداوند یهودایی نسلی جا وِه و موسی هون طایفه ای جا کِهانتی خَوَری هیچی نُتِه.

¹⁵ هَین اوجِه آشکارتَر وونِه گه وختی یَت دییَر کاهن هِتی مِلْکیصِدِقی تَرا بیِه،

¹⁶ وی نا شریعتی هون حِکمی جا گه وی نسلِ ربط دارنِه، بَلگی هون زندگی ای قِوَّتی جا گه از بِین نَشونِه، کاهن وونِه.

¹⁷ چون وی خَوَری مزموری کیتابی دِلِه هَینجور شهادت هادا بَوِه گه: «تو تا اَبَد کاهن هَسّی، مِلْکیصِدِقی رَدِه ای دِلِه.»

¹⁸ چون یَتوَر، هون اَوّلین حِکم، هَینِسه گه ضعیف و بی فایدِه وِه، کِنار بِشتِنِه،

¹⁹ چون شریعَت هیچی رِه کامل نَکِردِه. ولی از هون طرف، یَتِه بِهترِ اِمیدِ اَمارِه بِشناسانیِه گه وی طریق، خِدارِه نَزیک وومی.

²⁰ و هَین بدونِ قَسَم نَوِه! چون اونانیگه پِشتر کاهن بَوِنِه، بدونِ هَینگه قَسم بَخارِن کاهِن بَوِنِه.

²¹ ولی هَین یَتّا کاهِن بَوِه، قَسمی هَمرا گه وی طریق وِرِه بُتِه: «خِداوَند قَسَم بَخاردِه و وی نَظر عوض نَوونِه: ”تو تا اَبَد کاهن هَسّی“.»

²² هَین، عیسی رِه یَتِه بِهتَرِ عهدی ضامن کِنِّه.

²³ قدیمی کاهِنِنی تعداد یَتِخِیلی وِه، چون مرگ نِشتِه شی خِدمتِ اِدامِه هادِن.

²⁴ ولی عیسی تا اَبَد کاهنِ، چون تا اَبَد زینِّئه.

²⁵ پَس عیسی بَتنِّه اونانیگه وی طریق خِدارِه نَزیک وونِنِه، کامِلاً نِجات هادِه، چون وی هَمِش زینِّئه تا وِشونی سِه شَفاعت هاکِنِه.

²⁶ چون راساسی هَین بِجا وِه گه اَما هَینجور کاهنِ اعظم داریم، گه مِقدّس، بی گِناه، بی‌عیب، گِناهکارنی جا سیوا، و جلال بَئیت، آسِمونِنی جا لُوتَرِ.

²⁷ وی، دییَر کاهنِنی اعظمی تَرا نیاز نارنِه گه هر روز اَوَّل شی گِناهِنی سِه و اَزما قومی گِناهنی سِه قِروونی هاکِنِه. چون یَکَش همیشه ای سِه هَینِه اَنجام هادا، هون موقِه گه شِرِه قِروونی هاکِردِه.

²⁸ چون شریعت، آدمارِه وِشونی ضعفایی دِلِه کاهنِ اعظم بَووئنی سِه تعیین کِنِّه، ولی هون قَسَمی کلمه ها گه بعدِ شریعَت بیمو، هون ریکارِه تعیین هاکِردِه گه تا اَبَد کامل بَوِه.