اِفِسُسیان 5 - کتاب مقدس به زبان مازندرانی - گویش غربی

مِحبتی دِلِه رفتار هاکِنین

¹ پَس هِتی عزیزِ وَچیلِه ای تَرا، خِدایی جا سَرمَخش بَیرین.

² و مِحبتی دِلِه رَفتار هاکِنین، هَمونجور گه مَسیح هَم اَمارِه مِحبت هاکِردِه و شی جانِ اَمِسِه هِتی قِروونی و خِش عَطرِ هَدیِه ای تَرا خِدارِه پیشکَش هاکِردِه.

³ ولی شِمِه میِن بی‌عفتی یا هر جور ناپاکی یا هوا و هوسی جا حتّی نِنِه گَبی میِن بیِه، چون هَینِن مِقَدَّسینی لایق نیِه.

⁴ بَدِ گَب و بیخِدی گَب و رَکیکِ گَب شِمِه میِن دَنیوو گه شِمِه لایق نیِه، وِنِه اونی عوض شِکر هاکِنین.

⁵ چون مِطمئن ووئین گه هیچ بی حیا یا ناپاک یا طمعکارِ آدم گه هَمون بِت پَرَس ووئه، خِدا و مسیحی پادشاهی ای دِلِه سَهمی نارنِه.

⁶ نِلین هیچکی شِمارِ مِفتِ گَبی هَمرا گول بَزِنِه، چون هَین چیایی خاطریِه گه خِدایی غیظ وِشونی سَر گه نافرمونی کِنِنِه اِنِه.

⁷ پَس وِشونی هَمرا شریک نَووئین.

⁸ چون شِما یَه وختی تاریکی ای دِلِه دَوِنی، ولی اِسا خِداوندی دِلِه نورِنی. پَس هِتی نوری وَچیلِه ای تَرا رَفتار هاکِنین.

⁹ چون نوری ثَمَره، هر جور خِبی، راسی و دِرِسی ای دِلِه بَنگیت وونِه.

¹⁰ تَقَلّا هاکِنین بِفهمین گه چی خِداوندِ راضی کِنِّه.

¹¹ تاریکی ای بی فایده کارایی دِلِه شَریک نَووئین، بَلگی اونانِه بَرمَلا هاکِنین.

¹² چون حتّی اونچی گه وِشون خلوتی دِلِه کِنِنِه ای زِوون بیاردن، شَرم آوَرِ.

¹³ ولی وختی گه هر چی نوری هَمرا بَرمَلا بَوو، آشکار وونِه.

¹⁴ چون هر چی گه آشکار وونِه نورِ. هَینِسه بُتِه بَوِه گه: «اِی توویی گه خُویی دِلِه دَری، ویشار بَواش، مِردِگونی جا زینِّه بَواش، و مَسیح شی نورِ تی سَر تابانِّه.»

¹⁵ پَس، خِیلی مواظب ووئین گه چِتی رفتار کِنِنی، شِمِه رفتار عاقِلِ آدمنی تَرا ووئه نا نادونِ آدمنی تَرا.

¹⁶ شی وختی قَدرِ دِنّین، چون هَین روزا، بَدِ روزائِه.

¹⁷ پَس نادون نَووئین، بَلگی بِفَهمین گه خِداوندی اِراده چیِه.

¹⁸ و شرابی جا مَس نَووئین، گه شِمارِ بَدِ کارایی سَمت کَشانِّه؛ بَلگی خِدایی روحی جا پِر بَووئین.

¹⁹ مزامیر و پَرَسشی سرودها و آوازهایی هَمرا گه خِدایی روحی جائِه هَمدیری هَمرا گَب بَزِنین و دِشتِه دِلی جا خِداوندی سِه بَخونین و آهنگ بَساجین.

²⁰ هَمِش خِدای پیرِ، اَمِه خِداوند عیسی مَسیحی اِسمی هَمرا هَمه چی ای سِه شِکر هاکِنین.

²¹ مَسیحی حِرمتی خاطری، هَمدیَری جا اطاعت هاکِنین.

²² اِی زَناکِنِن، شی مَرداکِنِنی جا اطاعت هاکِنین، هَمونجور گه خِداوندی جا اطاعت کِنِنی.

²³ چون مَرد، شی زَنایی سَرِ، هَمونجور گه مَسیح هَم شی تَن، یَعنی کلیسایی سَرِ، و وی شِه کلیسایی نِجات دَهَندِئِه.

²⁴ پَس هَمونجور گه کلیسا مَسیحی جا اطاعت کِنِّه، زَناکِنِن هَم وِنِه هر کاری دِلِه شی مَردا کِنِنی جا اطاعت هاکِنِن.

²⁵ اِی مَرداکِنِن، شی زَناکِنِنِ دوس دارین، اونجور گه مَسیح هَم کلیسارِه دوس داشتِه و شی جانِ ویسِه هادا،

²⁶ تا وِرِه خِدایی کَلامی اُوئی هَمرا پاک هاکِنِه و هَینجوری کلیسارِه تَقدیس هاکِنِه.

²⁷ تا کلیسارِه هون شکوهی هَمرا گه دارنِه شی وَر بیارِه، بدون هیچ لک و چین و چروک یا هر چی دییَر، تا کلیسا مِقدّس و بی عیب ووئه.

²⁸ هَینِسه، مَرداکِنِن وِنِه شی زَناکِنِنِ هِتی شی تَنی تَرا دوس دارِن. اونیگه شی زَنارِه دوس دارنِه، شِرِه دوس دارنِه.

²⁹ چون هیچکی هیچ وَخت شی تَنی جا بیزار نیِه، بَلگی وِرِه غذا دِنِه و ویجا مِواظِبَت کِنِّه، هَمونجور گه مَسیح، کِلیسایی جا مِواظِبَت کِنِّه.

³⁰ چون اَما وی تَنی اَعضامی.

³¹ «هَینِسه مَرد شی پیر و ماری جا سیوا وونِه، شی زَنارِه چَسبِنِه و هون دِتا یَه تَن وونِنِه،»

³² هَین راز، یَتِه گَتِ رازِ- و هَینی گه مِن گِمِه مسیح و کلیسایی خَوَریِه

³³ خِلاصِه هَینگه، هر کِدیم از شِما هَم وِنِه شی زَنارِه هِتی شی تَرا دوس دارِه، و وِنِه زَنایی حَواس دَوو گه شی مَردی رِه حِرمت بِلِه.