اِفِسُسیان 4 - کتاب مقدس به زبان مازندرانی - گویش غربی

مَسیحی تَنی دِلِه یَتّا بَووئن

¹ پَس مِن گه خِداوندی خاطری زیندونی دِلِه دَرمِه، خواهِش کِمِّه گه شِمِه رَفتار هون دعوتی گه شِما اونیسِه بَخونِس بَوِنِه ای لایق ووئه

² دِشتِه فروتَنی و ملایمتی هَمرا؛ و صبر و مِحبتی دِلِه هَمدِیَرِ تَحمِل هاکِنین.

³ تقَّلا هاکِنین تا هون یَتّا بَووئن گه خِدایی روحی جائه، صِلح و سلامتی ای دِلِه دارین.

⁴ هَمونجور گه یَتِه تَن و یَتِه روح دَرِه، خِدا هَم هون موقِه گه شمارِ بَخونِسه یَتِه اِمید شِمارِ هادا؛

⁵ یَتِه خِداوند، یَتِه ایمون، یَتِه تَعمید؛

⁶ یَتِه خِدا و هَمه ای پیر گه هَمه ای جا بالاترِه، هَمه ای دِلِه کار کِنِّه، و هَمه ای دِلِه دَرِه.

⁷ ولی هر کِدیم از اَمارِه مَسیحی بَخشِشی اَنّا فیض هادا بَوِه.

⁸ هَمونجور گه مزموری کیتاب گِنِه: «وختی گه وی عرشِ بَرینی سمت لُو بوردِه، یَتِه لشگر اَسیرِنِ، شی دِمال بَوِردِه و وی مَردِنِ هدیه ها هادا.»

⁹ هَین گَبی معنی گه’وی لُو بوردِه‘ چیِه، بِجُز هَینگه زَمینی پَست تَرین جاها هَم جِر بیمو؟

¹⁰ ویگه جِر بیمو، هَمونیه گه دِشتِه آسِمونِنی جا لُوتر بوردِه، تا هَمه چیارِه شی حِضوری هَمرا پِر هاکِنِه.

¹¹ و وی وِه گه رَسولِن هادا، پِیغمبرِن، مِواشِرِن، چَپونِن و مَلِّمِن هادا،

¹² تا مِقَدَّسینِ خِدمتی کاری سِه آمادِه هاکِنِن، مَسیحی تَنی بَنایی سِه،

¹³ تا وختی گه اَما هَمه اَمِه ایمون یَتّا ووئه و اَما هَمه ای بِشناسیَن خِدایی ریکائی جا یَتّا ووئه تا هینجوری یَتِه کامِلِ آدمی قَد گَت بَووئیم، تا مسیحی قامتی پِری ای اَنّا بَرسیم

¹⁴ اَزما دِ هِتی کِچیک وَچیلِه ای تَرا نَوومی گه موجیشونی هَمرا هر طرف هِپرتانی بَووئیم و جورواجورِ تَعالیم و آدَمِنی دوز و کَلکی وا هون نَخشِه هایی دِلِه گه گِمراهی ای سِه کَشِنِنِه، اَمارِه هَین طرف و هون طرف بَوِرِه.

¹⁵ بَلگی حَیقتی بُتَنی هَمرا مِحبتی دِلِه، هر لحاظی جا هون اَنّا گه سَرِ، یَعنی مَسیح، رشد کِمِّی.

¹⁶ وی دِلِئه گه دِشتِه تَن هر مفصلی هَمرا گه اونِه ربط دارنِه چِفت و بَس وونِه و چَسبِنِه تا هر عضوی دِرِس کار هاکِنِه، تَن رشد کِنِّه و شِرِه مِحبتی دِلِه بَنا کِنِّه.

تازه زندگی

¹⁷ اِسا هَینِه گِمِه و اَی هَم خِداوندی دِلِه گِمِه گه دِ شِمِه رفتار نِنِه هِتی هون مَردِنی تَرا گه خِدارِه نِشناسِنِنِه ووئِه گه شی بیخِدی فِکرایی دِلِه رفتار کِنِنِه.

¹⁸ وِشونی عقل تاریک بَوِه، و نادونی ای خاطری گه وِشونی سَنگ دِلی ای نَتیجِئِه، خِدایی زندگی ای جا دور بَوِنِه.

¹⁹ وِشون سنگدِل بَوِنِه و شِرِه هرزگی ای دَس بِسپارِسِنِه، جوریگه طمعی هَمرا هر ناپاکی رِه دَس بَزونِه.

²⁰ ولی شِما هَینجوری مسیحِ یاد نَیتِنی،

²¹ البته اگه گِمون هاکِنیم گه شِما وی خَوَری بِشنُسِنی و طِبق هون حَیقَتی گه عیسایی دِلِه دَرِه، تعلیم بَیتِنی.

²² تا شی قَدیمِ زندگی ای روش یَعنی هون قَدیمِ آدَم گه گول زَنَکِ خواسِه هایی طریقی جا فاسد وِه رِه، شی تَنی جا دیرگا بیارین.

²³ و روحی دِلِه شِمِه فِکر تازه بَوو،

²⁴ و تازِه آدَمی رِه شی تَن دَکِنین، گه صالحی و حَیقی قدّوسیَتی دِلِه، خِدایی تَرا خلق بَوو.

²⁵ پَس، دِرو نَزِنین، و هر کِدیم شی هَمسادِه ای هَمرا راسی ای هَمرا گَب بَزِنِه، چون اَما هَمه، هَمدیَری هَمرا یَتِه اعضامی.

²⁶ «عصبانی بَووئین، ولی گِناه نَکِنین» و نِلین شِمِه روز تُوم بَوو و شِما حَلا غیظی دِلِه دَووئین،

²⁷ و ابلیسِ فِرصت نَدین.

²⁸ دِز دِ دِزّی نَکِنِه، بَلگی زحمت بَکِشِه، و شی دَسی هَمرا صداقتی هَمرا کار هاکِنِه، تا بَتِنِّه یَچی مِحتاجِنَم هادِه.

²⁹ شِمِه دِهِن بَدِ گَبی سِه وا نَوو، بَلگی دِشتِه شِمِه گَب بَقیِه ای بَنایی سِه کار هاکِنِه و احتیاجی رِه بَرآوَردِه هاکِنِه، و اونانیگه اِشنُنِنِه رِه فِیض بَرِسانِّه.

³⁰ و خِدایی قدّوسِ روحِ گه وی هَمرا آزادی ای روزی سِه مِهر بَوِنی رِه، نارحت نَکِنین.

³¹ هر جور تَلی، خشم، غیظ، داد و بیداد، تِهمت و هر جور بَدخواهی رِه شیجا دور هاکِنین.

³² هَمدِیَری هَمرا مِهرَوون و دِلسوج ووئین و هَمونجور گه خِدا شِمارِ مَسیحی دِلِه بِبَخشیِه، شِما هَم هَمدِیَرِ بِبَخشین.