اِفِسُسیان 3 - کتاب مقدس به زبان مازندرانی - گویش غربیاِنجیلی راز آشکار وونِه 1 هَینِسه مِن، پولُس، گه شِما غیریَهودینی خاطری مَسیحْ عیسایی زیندونیمِه - 2 بی شک شِما هَین جریانی خَوَری بِشنُسنی گه خِدایی فیضی نظارت شِمِه خدمتی سِه مِنِه هادا بَوِه، 3 گه چِتی هون رازی مکاشِفِه ای هَمرا، مِنِه معلوم بَوِه، هَمونجور گه خِلاصِه شِمِنِه بَنوِشتِمِه، 4 وختی گه اونِه بَخونین، بَتِنِّنی پِی بَورین گه مِن چِتی مَسیحی رازِ بِفهمسِمِه 5 هون رازی گه قدیمی نسلیشونی دِلِه آدَمِنی ریک ریکایی سِه آشکار نَوِه وِه، اونجور گه اَلَن روح القدسی طریقی جا، وی مِقَدّسِ رَسولِن و پِیغمبرِنی سِه آشکار بَوِه. 6 هون راز هَینِه گه غیرِیهودینَم مَسیحْ عیسایی دِلِه اِنجیلی طریق هَم اِرثنِه، و همون تَنی اعضانِه و خِدایی وعده ای دِلِه شَریکنِه. 7 مِن طبقِ خِدایی فیضی هدیه هَین اِنجیلی خادم بَوِمِه، گه وی قدرتی عملی طریق مِنِه هادا بَوِه. 8 هر چَن گه مِن دِشتِه مِقَدَّسینی میِن هَمه ای جا کمترینمِه، هَین فیض مِنِه هادا بَوِه تا مَسیحی بی حد و حسابِ گنجیشونِه غیریهودیِنی سِه اعلام هاکِنِم، 9 و هَمه رِه هَم هادَم گه خِدایی نَخشِه چِتی اَنجام وونِه. خِدا گه هَمه چیرِه خَلق هاکِردِه، شی هَین رازِ از قدیم جاهادا داشتِه. 10 تا کلیسایی طریقی جا خِدایی جورواجورِ حکمت، رئیسها و قدرتها، آسِمونی جاهایی دِلِه آشکار بَوو، 11 هَین همون هدفی وِه گه خِدا از اَزل داشتِه، گه خِدا اونِه اَمِه خِداوند مَسیحْ عیسایی دِلِه اَنجام هادا. 12 اَما مسیحی دِلِه و هون ایمونی طریق گه وِرِه دارمی، بَتِمّی جِرأت و اطمینانی هَمرا خِدارِه نَزیک بَووئیم. 13 پَس شِمِه جا خواهش کِمِّه هون رنجهایی خاطری گه دِ شِمِنِه کَشِمِه، دِلسرد نَووئین، چون اونِن شِمِه افتخاری باعثِ. دِعا، روحانی قِوّتی سه 14 هَینِسه مِن، آسِمونی پیری پِش زِنی زَمِّه 15 گه هر خِنِوادِه ای آسِمونی دِلِه و زَمینی سَر، ویجا اِسم گیرنِه، 16 گه طبقِ شی جَلالی دولتمندی شِمارِ هادِه، تا خِدایی روحی طریق، شی باطِنی دِلِه قوی و قِدّار بَووئین، 17 تا مَسیح، ایمونی طریق شِمِه دِلی دِلِه بَمونِّه، و مِحبتی دِلِه بِنِه دَوِنّین، پابرجا بَووئین، 18 تا قِوّت دارین گه دِشتِه مِقَدَّسینی هَمرا، گه مَسیحی مِحبتی دِرازا و پَهنا و جَلی و بِلَّنی رِه بِفهمین 19 و مسیحی مِحبتِ گه بَشری معرفتی جا بالاترِ رِه بِشناسین - تا خِدایی کاملِ پِری ای جا سَرمَشت بَووئین. 20 جلال ووئه هون خِدارِه گه بَتِنِّه هون قِوّتی طریق گه اَمِه دِلِه کار کِنِّه، خِیلی ویشتَر از اونچی گه اَما گِمون هاکِنیم یا بَخوایم، کار هاکِنِه. 21 کلیسایی دِلِه و مَسیحْ عیسایی دِلِه، دِشتِه نَسلیشونی دِلِه، تا اَبَد خِدارِه جَلال ووئِه!آمین. |
@ 2024 Korpu Company