کولُسیان 2 - کتاب مقدس به زبان مازندرانی - گویش غربی

¹ خوایمِه دِنّین گه شِمِنِه و اونانی خاطری گه لائودیکیه ای مَنطقِه ای دِلِه دَرِنِه، و دِشتِه اونانی سِه گه مِنِه نَئینِه، چِتی تَقلّا کِمِّه

² تا دِلگرم بَووئین، و هَمونجور گه مِحبتی دِلِه همدیری هَمرا مِتحد هَسِّنی، و هون اِطمینانِ کامِل و بی حد و حِساب پِر ووئنی گه فهمی جا بِدَس اِنِه سود بَوِرین، و هَین راهی جا، خِدایی راز، یَعنی مَسیحِ بِشناسین،

³ وی دِلِئه گه دِشتِه حکمت و معرفتی گنجیشون جاهادائه.

⁴ هَینِه گِمِه تا هیچکَس هون دلیلایی هَمرا گه قانع کِنِّه شمارِ گول نَزِنِه.

⁵ چون هر چَن جسماً شِمِه وَر دَنیمِه، ولی روحی دِلِه شِمِه همرامِه، و شِمِه نظم و قِرصِ ایمون گه مَسیحِ دارِنی رِه ویمِّه، خِشالمِه.

مسیحی دِلِه زینِّه

⁶ پَس هَمونجور گه مَسیحْ عیسای خِداوندِ قَبول هاکِردِنی، وی دِلِه زندگی هاکِنین:

⁷ وی دِلِه بِنِه دَوِنین و رشد هاکِنین، و ایمونی دِلِه پابرجا ووئین، و هَمونجور گه یاد بَیتِنی، شِکر هاکِردنی جا پِر ووئین.

⁸ هوشیار ووئین تا هیچکَس شِمارِ فلسفه و بیخِدی گول بَزوئنی هَمرا گِرفتار نَکِنِه، گه نا مَسیحی سَر، بَلگی آدَمِنی رَسم و رُسومات و هَین دِنیایی اصولی سَر پابرجائه.

⁹ چون دِشتِه ذاتِ الهی ای پِری، جسمی تَرا مسیحی دِلِه دَرِه،

¹⁰ و شِما هَم مسیحی دِلِه، گه دِشتِه ریاستیشون و قِدرتیشونِه سَرِ، پِر بَوِنی.

¹¹ و مسیحی دِلِه خَتنِه هَم بَوِنی، خَتنِه‌ای گه دَسی هَمرا نَوِه. بلگی جِسمانی تَنی دیرگا بیاردنی هَمرا، مسیحی طریقی جا خَتنِه بَوِه.

¹² وی هَمرا غِسلِ تعمیدی دِلِه دَفن بَوِنی، و ایمونی طریقی جا گه خِدایی قِوّتی هَمرا عمل کِنِّه، گه مسیحِ مِردِگونی جا زینِّه هاکِردِه، وی هَمرا زینِّه بَوِنی.

¹³ و خِدا شِمارِ گه شی گِناهِن و شی خَتنِه نَووئن جسمی دِلِه بَمِرد وِنی، مَسیحی هَمرا زینِّه هاکِردِه. وی دِشتِه اَمِه خطائیشونِه بِبخشیِه

¹⁴ و هون قرضهایی سَنَدِ گه قانونهایی طریقی جا اَمِه علِیه بَنوِشت بَوِه رِه باطِل هاکِردِه و از بِین بَوردِه. و صلیبی سَر مِخکوب هاکِردِه.

¹⁵ وی، ریاستیشون و قدرتیشونی سِلاحهارِه بَیتِه، و صلیبی هَمرا وِشونی سَر هاجِرا بَوِه، و وِشونِه هَمه ای وَر رِسوا هاکردِه.

¹⁶ پَس نِلین هیچکی شِمارِ اونچی ای خَوَری گه خارِنی و نوشِنِنی، یا عید و تازِه ماه و مِقدّسِ شنبه ای روزی خَوَری، قضاوت هاکِنِه.

¹⁷ هَینِن هون چیایی سایِه هَسِّنِه گه اِنِه، ولی اَصلِ اونان مَسیحی دِلِه بَنگیت وونِه.

¹⁸ نِلین کَسی شِمارِ محروم هاکِنِه هَین اِصراری هَمرا گه وِنِه تَنِ خِب داشتن و فِرشتگونِ پَرسِش هاکِردن. هَینجور آدَم فقط شی رویاها رِه تَکیِه کِنِّه و بدونِ هَینگه دلیلی دارِه شی بیخِدی فِکرایی هَمرا مغرور وونِه.

¹⁹ هینجور آدم دِ سَری کَش وصل نیِه، هون سَری گه دِشتِه تَن وی هَمرا جان گیرنِه، و مَفصلا و بَندهایی طریقی جا همدیری هَمرا وصل وونِه، و هون جور گه خِدا خواینِه رشد کِنِّه.

²⁰ اگه شِما مَسیحی هَمرا نسبت به هَین دِنیایی اصول بَمِردِنی، چه هِتی اونانی تَرا گه انگار حَلا هَین دِنیارِه تَعلِق دارِنِه، اونی قانونا رِه عمل کِنِنی، هون قانونایی گه گِنِه:

²¹ «دَس نَزِن! مِزِه مِزِه نَکِن، دَس نَکِن!»؟

²² هَینِن هَمه هون چیایی خَوَریِه گه استفاده هاکِردنی هَمرا از بِین شونِه، و آدمی ای دستورات و تعلیمی سَر بَنا بَوِه.

²³ و هر چَن وختی گه شی هَین بَساتِ دینی جا و تَنی ریاضت و تَنی سخت بَیتنی جا گَب زَنِنِه، حکیمانِه به نظر اِنِه، ولی اونان از هَینگه هوا و هوسی دَمِ بَیرن هیچ کاری وشونی دَس بَرنیِنِه.