کولُسیان 1 - کتاب مقدس به زبان مازندرانی - گویش غربی

¹ پولُسی طرفی جا گه خِدایی خواستی هَمرا، مَسیحْ عیسایی رسولِ، و اَمِه بِرار، تیموتائوسی طرفی جا،

² مسیحی دِلِه ای مِقَدَّسین و وفادارِ بِرارِن گه کولُسی ای شهری دِلِه دَرِنِه: فیض و صِلح و سلامتی اَمِه پیر، خِدایی طرفی جا شِمِسِه بیِه.

شِکر هاکِردن و دِعا

³ اَما هَمِش دِعایی موقِه شِمِسِه، خِدا، اَمِه خِداوند عیسی مَسیحی پیرِ شِکر کِمّی،

⁴ چون اَما شِمِه ایمونی خَوَری مَسیحْ عیسایی دِلِه و مِحبتی گه دِشتِه مِقَدَّسینِ دارِنی رِه بِشنُسِمی،

⁵ گه هَینِن هون امیدی جا سَرچِشمِه گیرنِه گه شِمِسِه آسِمونی دِلِه داشتِنِه. هون اِمید گه پِشتَر اونی خَوَری حَیقَتی کلام، یَعنی اِنجیلِ، بِشنُسِنی،

⁶ اِنجیلی گه شِمارِ بَرِسیِه، هَمونجور گه دِشتِه دِنیایی دِلِه هَم بَرسیِه ثمر اُرنِه و زیاد وونِه، جوریگه شِمِه مین هَم، هون روزی جا گه اونِه بِشنُسِنی و خِدایی فیضِ حَیقتی دِلِه بِفهمِسنی، کار هاکِردِه.

⁷ هَمونجور گه شِما اونِه اَمِه عزیزِ همخِدمت اِپافْراسی جا یاد بَیتنی. اونیگه شِمِه طرفی جا مسیحی وفادارِ نوکَرِ.

⁸ و وی اَمارِه شِمِه مِحبتی جا گه خِدایی روحی دِلِئه، باخَور هاکِردِه.

⁹ هَینسِه، اَما هَم هون روزی جا گه هَینِه بِشنُسِمی، شِمِه دِعا هاکِردَنی جا دَس نَکِشیمی، خِدایی جا خوایمی گه شِما وی اِراده ای بِشناسینی هَمرا، هر حکمت و روحانی فهمی دِلِه پِر بَووئین؛

¹⁰ تا شِمِه رفتار خِداوندی لایق ووئِه، و بَتِنّین وِرِه کامِلاً خِشال هاکِنین: هر خِبِ کاری دِلِه ثمر بیارین و خِدایی بِشناسیِنی دِلِه رشد هاکِنین؛

¹¹ و دِشتِه قِوَّتی هَمرا گه وی پِر جلالِ قِدرتی جا اِنِه، قِوَّت بَیرین، تا خِشالی ای هَمرا، کاملاً صَبر و تَحَمِل دارین؛

¹² پیرِ شِکر هاکِنین گه شِمارِ قابِل دِنِسِه گه هون میراثی دِلِه گه مِقدّسین نوری دِلِه دارِنِه، شریک هاکِردِه.

¹³ وی اَمارِه تاریکی ای قلمرویی جا آزاد هاکِردِه و شی عزیزِ ریکائی پادشاهی ای سمت بَرسانیِه،

¹⁴ گه وی دِلِه اَما آزادی دارمی، یَعنی گِناهِنی آمِرزشِ دارمی.

مَسیحی شخصیت و کار

¹⁵ وی، هون خِدایی گه نِشِنِه وِرِه بَئیَنی شِکلِ، اوّلین وَچِه، دِشتِه خِلقتی جا پِشتر و بالاتر

¹⁶ چون هَمه چی وی طریقی جا خلق بَوِه، آسِمونی دِلِه و زَمینی سَر، هون چیایی گه بِشِنِه بَئیَن و هون چیایی گه نِشِنِه بَئیَن، چی پادشاهی ای تختیشون یا قلمروایشون، ریاستیشون، یا قدرتیشون؛ هَمه چی وی طریقی جا و ویسِه خَلق بَوِنِه.

¹⁷ وی، هَمه چی ای جا پِشتر دَرِه، و وی دِلِه هَمه چی با هَم نِگه داشتِه وونِه.

¹⁸ وی، تَنی سِه گه کلیسائه، سَرِ، وی شِرو و اوّلین نَفرِ گه مِردِگونی جا زینِّه بَوِه، تا هَمه چی ای دِلِه، وی سَر ووئِه.

¹⁹ راساسی دِشتِه خِدایی راضی ووئن هَینی دِلِه وِه گه وی دِلِه بَمونِّه،

²⁰ و وی طریقی جا هَمه چیرِه، شی هَمرا آشتی هادِه، چی زَمینی سَر، چی آسِمونی دِلِه، شی خونی بریختنی هَمرا صلیبی سَر آشتی هادا.

²¹ شِما هَم یه وختی خِدایی هَمرا غریبه وِنی، و شی فِکری دِلِه وی دِشمَن وِنی، و هَین شِمِه شریرانِه کارایی دِلِه معلوم وونِسِه.

²² اِسا وی شی بَمردنی طریقی جا، شی جِسمانی تَنی دِلِه شمارِ آشتی هادا، تا شِمارِ مِقَدَّس و بی‌عیب و بدونِ هیچ سَراکویی خِدایی حِضور بیارِه،

²³ اگه راساسی شِما ایمونی دِلِه مِحکم و پابرجا ووئین، و هون اِنجیلی اِمیدی جا دِکت نَئیرین، هَمون اِنجیل گه آسِمونی بِنی دِشتِه خِلقتی سِه اعلام بَوِه، و مِن، پولُس، اونی نوکر بَوِمِه.

پولُسی خِدمت کلیسایی سِه

²⁴ اِسا، هون زَجرهایی گه شِمِه خاطری کَشِمِه ای سِه خِشالمِه، و وی تَنی خاطری گه کلیسائِه، اونچی گه مَسیحی عذابایی دِلِه کم هَسِّه رِه شی جسمی دِلِه تلافی کِمِّه.

²⁵ گه طبقِ نِظارتی خِدمت گه خِدا مِنِه بِسپارِسِه، کلیسایی خادم بَوِمِه، تا خِدایی کلامِ کامِل شِمارِ بِشناسانَم،

²⁶ یَعنی هون راز گه خِیلی زَمون، نسلهایی جا قایِم هاکِرد بَمونِس وِه، ولی اِسا وی مِقَدَّسینی سِه معلوم بَوِه.

²⁷ خِدا هَینجور بَخوایسِه گه وِشونِه بِشناسانِه گه هَین راز، غیریهودیِنی مین چی گَتِه جلالیِه. هَین راز هَینِگه، مَسیح شِمِه میِن، جَلالی اِمیدِ.

²⁸ اَما وِرِه اعلام کِمّی، و هَمه رِه هِشدار دِمی، و هَمه کَسِ دِشتِه حکمتی هَمرا تعلیم دِمی، تا هَمه رِه مسیحی دِلِه بالغِ آدمِنی تَرا خِدایی وَر بیاریم.

²⁹ هینِسِه گه مِن زَحمَت کَشِمِه و دِشتِه شی قِوّتی هَمرا وی طریقی جا گه می دِلِه قِوَّتی هَمرا کار کِنِّه، تَقّلا کِمِّه.