اعمال رَسولان 5 - کتاب مقدس به زبان مازندرانی - گویش غربی

حَنانیا و سَفیرِه

¹ ولی یَنَفَر گه وی اِسم حَنانیا وِه شی زَنا سَفیرِه ای هَمرا یَتِه گِلی زَمی بَروتِه.

² حَنانیا یَذِرِه هون پولی جا گه وی زَنا خَوَر داشتِه جاهادا و بَقیِه رِه بیاردِه، رَسولِنی پِش بِشتِه.

³ پِطرُس وِرِه بُتِه: «اِی حَنانیا، چه بِشتی شیطان تی دِلِ هَینجور پِر هاکِنِه گه روح القُدُسِ دِرو بُئی و یَذِرِه شی زَمی ای بَروتِ پولِ شی وَر داری؟

⁴ مَگِه قبل از هَینگه بَروشی تِنی نَوِه؟ مَگِه بعد از هَینگه بَروتی هَم هون پولی اِختیار تی دَس دَنیوِه؟ چی باعث بَوِه شی دِلی دِلِه هَین کارِ هاکِنی؟ تو نا آدَمی رِه، بَلگی خِدارِه هَم دِرو بُتی!»

⁵ وختی حَنانیا هَین گَبِ بِشنُسِه، بِنِه ای سَر دیم بَخاردِه و دَرجا جان هادا! دِشتِه اونانیگه هَینِه بِشنُسِنِه خِیلی بَتِرسینِه.

⁶ اَزما جَوونِن بیمونِه و وِرِه کَفنی دِلِه دَپیتِنِه و دیرگا بَوِردِنِه، دَفن هاکِردِنِه.

⁷ بعد از سِه ساعت، وی زَنا گه جَریانی جا خَوَر ناشتِه بیمو.

⁸ پِطرُس ویجا بَپرسیِه: «مِنِه بُو زَمی رِه هَین قیمت بَروتِنی؟» سَفیره بُتِه: «اَرِه، هَین قیمت.»

⁹ پِطرُس وِرِه بُتِه: «چه هَمدِیَری هَمرا هَمدَس بَوِنی تا خِداوندی روحِ آزمود هاکنین؟ اونانیگه تی مَردی رِه دَفن هاکِردِنِه اَلَن دَری وَر دَرِنِه و تِرِه هَم دیرگا وَرِنِه.»

¹⁰ دَرجا، سَفیره هَم پِطرُسی لینگی وَر دیم بَخاردِه و جان هادا. وختی جَوونِن دِلِه بیمونِه، بَئینِه وی هَم بَمِردِه. پَس وِرِه دیرگا بَوِردِنِه و وی مَردی ای وَر دَفن هاکِردِنِه.

¹¹ اَزما یَتِه گَتِه ترس دِشتِه کلیسا و اونانیگه هَینِ بِشنُسِنِه رِه بَیتِه.

رَسولِنی نِشونِه ها و مُعجِزات

¹² رَسولِن هَمِش قومی دِلِه خِیلی نِشونِه ها و معجِزات کِردِنِه و دِشتِه ایموندارِن یَکدِل سِلیمونی ایوونی دِلِه جَم وونِسِنِه.

¹³ ولی بَقیِه جِرأت نَکِردِنِه وِشونِه مِلحَق بَوون. هر چَن دِشتِ مَردِن وِشونِه خِیلی اِحترام اِشتِنِه.

¹⁴ خِیلی از مَرداکِنِن و زَناکِنِن ایمون اُردِنِه و خِداوَندِ مِلحق وونِسِنِه،

¹⁵ تا جایی گه حتّی مَریضِنِ شهری میدونی سَر اُردِنِه و وِشونِه تَخت و دوشَکی سَر اِشتِنِه تا وختی پِطرُس اوجِه رِه رَد وونِه، لااَقَل وی سایِه بعضیایی سَر دَکِفِه و شَفا هادِه.

¹⁶ مَردِن هَم دَسِه دَسِه اورشَلیمی شَهری دور و اطرافی جا ایمونِه و مَریضِن و کَسایی گه پَلیدِ اَرواحی گرفتار وِنِه رِه اُردِنِه و هَمه شَفا گیتِنِه.

رَسولِنِ هَماسِنِنِه

¹⁷ ولی کاهِنِ اعظم و دِشتِه اونانیگه وی هَمرا دَوِنِه یَعنی صَدّوقیِنی فِرقِه، پِرسانِه و حَسودی ای جا دَس بِکار بَوِنِه

¹⁸ و رَسولِنِ بَیتِنِه و زیندونی دِلِه گه هَمه جورِ آدَم اونی دِلِه دَوِه دیم بَدانِه.

¹⁹ ولی شُو، خِداوندی یَتِه فِرِشتِه زیندونی دَریشونِه پِه هاکِردِه و وِشونِه دیرگا بیاردِه

²⁰ و بُتِه: «بورین و مَعبدی دِلِه هِرِسین و دِشتِه هَین زِندگی ای پیغِمِ مَردِنِ بُئین.»

²¹ پَس صِواحی طِبقِ اونچی گه وِشونِه بُتِه بَوِه وِه مَعبدی سِه بوردِنِه و مَردِنِ تَعلیم هادانِه. وختی کاهِنِ اعظم و اونانیگه وی هَمرا دَوِنِه بیمونِه، دِشتِه شورا و دِشتِه یَهودی قومی مَشایِخِ شی کَفا بَخونِسِنِه و کسایی رِه بَرِسانینِه تا رَسولِنِ زیندونی جا بیارِن.

²² ولی وختی مأمورِن زیندونی دِلِه بوردِنِه، رَسولِنِ نَنگیتِنِه. پَس دَگِرِسِنِه و خَوَر هادانِه:

²³ «اَما بَئیمی زیندونی دَریشون قائِم دَوَس وِه و نِگَهوونِن هَم دَریشونی پِش اِسّاوِنِه. ولی وختی دَریشونِ پِه هاکِردمی، هیچکی رِه زیندونی دِلِه نَنگیتِمی.»

²⁴ وختی مَعبدی نِگَهوونِنی فَرموندِه و گَت گَتِه کاهنِن هَین خَوَرِ بِشنُسِنِه هاج و واج بَمونِسِنِه، فکِری دِلِه بوردِنِه گه «هَین کاری عاقبت چی وونِه؟»

²⁵ هَمون موقِه، یَنَفر بیمو و وِشونِه خَوَر هادا، بُتِه: «اونانیگه شِما وِشونِه زیندونی هاکِرد وِنی، اَلَن مَعبدی دِلِه اِسّانِه و دِ مَردِنِ تعلیم دِنِنِه.»

²⁶ پَس مَعبدی نِگَهوونِنی فرموندِه، مأمورِنی هَمرا بوردِنِه و رَسولِنِ بیاردِنِه، ولی نا زور وَری، چون تَرسینِه مَردِن وِشونِه سنگسار هاکِنِن.

²⁷ وختی رَسولِنِ بیاردِنِه، وِشونِه شورایی وَر هِرِسانینِه. اَزما کاهن اعظم وِشونی جا بَپُرسیِه:

²⁸ «اَما شِمارِ سَخت قَدِغَن هاکِردمی گه دِ هَین اِسمی هَمرا تعلیم نَدین، با هین حال شِما اورشلیمی شَهرِ شی تَعلیمی جا پِر هاکِردِنی و خواینِنی هَین مَردی ای خونِ اَمِه گِردَن دیم بَدین.»

²⁹ ولی پِطرُس و دییَر رَسولِن جِواب هادانِه: «اَما وِنِه خِدایی جا اطاعت هاکِنیم نا آدَمی ای جا.

³⁰ اَمِه پیرِنی خِدا، هَمون عیسی گه شِما صَلیب بَکِشینی و بَکوشتِنی رِه مِردگونی جا زینّه هاکِردِه

³¹ و وِرِه شی راسِ دَسی وَر لُو بَوِردِه، رَهبر و نِجات دهندِه هاکِردِه تا یَهودی مَردِن توبِه هاکِنِن و وِشونی گِناهِن بیامرزی بَوو.

³² و اَما هَین جریانی شاهِدِمی، هَمونجور گه روح القُدُس هَم شاهِدِ، هَمون روحی گه خِدا وِرِه شی مِطیعِنِ بِبَخشیِه.»

³³ وختی هَین گَبِ بِشنُسِنِه اَنِّی عَصَبانی بَوِنِه گه خوایسِنِه وِشونِه بَکوشِن.

³⁴ ولی عِلَمای فرقِه فَریسی ای جا یَنَفَر گه وی اِسم گامالائیل و شَریعتی مَلِّمِ وِه و هَمه وِرِه احترام اِشتِنِه، مِجلِسی دِلِه پِرِسا و دَستور هادا چَن لَحظِه رَسولِنِ دیرگا بَوِرِن.

³⁵ اَزما اونانیگه اوجِه دَوِنِه رِه بُتِه: «اِی یَهودی مَردِن، شِمِه حواس دَوو هَین آدَمِنی هَمرا چی خواینِه هاکِنین.

³⁶ چون چَن وَخت پِش، یَته مَردی گه وی اِسم تِئوداس وِه پِرِسا گه اِدّعا کِردِه شِنِه کَسیِه، و حِدودِ چار صَد نَفَرِ شی دور جَم هاکِردِه. ولی وِرِه بَکوشتِنِه و دِشتِه وی دِمالرو ایشون هَم پَخش و پَلا بَوِنِه.

³⁷ بعد از وی، یَهودای جَلیلی سَرشِماری ای موقِه شورش هاکِردِه و یه دَسِه رِه شی دِمال بَکِشانیِه. ولی وی هَم هَلاک بَوِه و دِشتِه وی دِمالرو ایشون پَخش و پَلا بَوِنِه.

³⁸ پس هَین جریانی خَوَری هَم شِمارِ گِمِه هَین آدَمِنی هَمرا کاری نارین و وِشونِه شی حال بِلین. چون اگه وِشونی قصد و نیَّت آدَمی ای جا ووئِه، بجایی نَرِسِنِنِه.

³⁹ ولی اگه خِدایی جا ووئِه، نَتِنِّنی وِشونی دَمِ بَیرین، چون هون موقِه خِدایی هَمرا جَنگِنِنی!»

⁴⁰ وِشون وی نَصیحَتِ گوش هادانِه و رَسولِنِ شی کَفا بَخونِسِنِه، شَلّاق بَزونِه و بُتِنِه گه عیسایی خَوَری هیچکی ای هَمرا گَب نَزِنِن، اَزما وِشونِه وِل هاکِردِنِه گه بورِن.

⁴¹ پس رَسولِن شورا ایشونی وَری جا دیرگا بوردِنِه و از هَینگه اَنّی لایق بِشمارِس بَوِنِه گه عیسایی اِسمی خاطری بی حِرمتی بَوینِن، خِشال وِنِه.

⁴² و هیچ روزی، چی معبدی دِلِه و چی خِنِه خِنِه، تَعلیم و خَوَرِ خِشی جا دَس نَکِشینِه گه عیسی هَمون مَسیحِ موعودِ.