اعمال رَسولان 4 - کتاب مقدس به زبان مازندرانی - گویش غربی

پِطرُس و یوحنا یَهودی شورای وَر

¹ پِطرُس و یوحنا حَلا دِ مَردِنی هَمرا گَب زووِنِه گه مَعبدی کاهنِن و معبدی نِگَهوونِنی فَرموندِه و عِلَمای فِرقِه صَدوقی سَر بَرِسینِه.

² وِشون از هَینگه رَسولِن مَردِنِ تعلیم داوِنِه و عیسایی زینِّه بَووئَنی خَوَری گَب زووِنِه، خِیلی وِشونی حال بَئیت وِه.

³ پَس وِشونِه هَماسینِه و چون غِروب دَم وِه، تا فَردا وِشونِه زیندونی دِلِه داشتِنِه.

⁴ ولی خِیلی از وِشون گه پِیغِمِ بِشنُس وِنِه، ایمون بیاردِنِه و مَرداکِنِن حِدودِ پنج هِزار نَفر بَوِنِه.

⁵ فَردای هون روز، یَهودیِنی گَت گَتِه و مَشایخ و توراتی مَلِّمِن اورشَلیمی شهری دِلِه جَم بَوِه وِنِه.

⁶ هَین مِجلِسی دِلِه، کاهِنِ اَعظم حَنّا و قیافا و یوحنا و اِسکِندر و دِشتِه کاهِنِ اَعظمی خِنِوادِه دَوِنِه.

⁷ وِشون پِطرُس و یوحَنا رِه شی وَر بیاردِنِه، وِشونی جا سوال هاکِردِنِه: «شِما کِنی قِدرَت و کِنی اِسمی هَمرا هَین کارِ هاکِردِنی؟»

⁸ اَزما پِطرُس روح القُدُسی جا پِر بَوِه، وِشونِه جِواب هادا: «اِی قومی گَت گَتِه و مَشایخ،

⁹ اگه اَمرِز هَین خِبِ کاری خاطری گه علیلِ مَردی ای سِه هاکِردِمی اَمِه جا بازخواس وونِه، و سوال کِنِنی وی چِتی شَفا بَیتِه،

¹⁰ پس شِما هَمه و دِشتِه یَهودی مَردِن دِنّین گه عیسای مسیحِ ناصِری ای اِسمی هَمرائِه گه هَین مَردی شِمِه وَر سالِم اِسّا، هَمونی اِسمی هَمرا گه شِما وِرِه صَلیب بَکِشینی ولی خِدا وِرِه مِردِگونی جا زینِّه هاکِردِه.

¹¹ هَین عیسی هَمون سَنگیِه گه شِما بَنّائِن هونِه دیم بَدانی و اِسا بَنایی اَصلی تَرین سَنگ بَوِه.

¹² بِجِز وی هیچ کَسی دِلِه نِجات دَنیِه، چون آسِمونی بِن دییَر اِسمی آدَمِنِ هادا نَوِه تا اونی جا نِجات بَیریم.»

¹³ وختی وِشون پِطرُس و یوحنایی جِرأتِ بَئینِه و بَفهمسِنِه گه بیسواد و عادی هَسِّنِه، تَجِب هاکِردِنِه و بِفَهمِسِنِه عیسایی هَمرا دَوِنِه.

¹⁴ ولی چون هون مَردی گه شَفا بَئیت وِه پِطرس و یوحنایی وَر اِسّاوِه، نَتِنِسِّنِه هیچی بُئِن.

¹⁵ پس دَستور هادانِه مِجلِسی جا دیرگا بورِن، و شِه هَمدیَری هَمرا مَشوِرَت هاکِردِنِه.

¹⁶ هَمدیَرِ بُتِنِه: «هَین دِتایی هَمرا چی هاکِنیم؟ چون دِشتِه اورشَلیم دِنِّنِه وِشون مُعجِزِه هاکِردِنِه و اَما هَم نَتِمّی اونِه اِنکار هاکِنیم.

¹⁷ ولی هَینِسه گه هَین جَریان ویشتَر از هَین قومی دِلِه نَپیچِه، وِنِه هَین آدَمِنِ قَدِغَن هاکِنیم گه دِ هیچکسی هَمرا هَین اِسمی جا گَب نَزِنِن.»

¹⁸ اَزما اَی وِشونِه شی کَفا بَخونِسِنِه و حِکم هاکِردِنِه گه هیچ وَخت عیسایی اِسمِ نیارِن و تَعلیم نَدِن.

¹⁹ ولی پِطرُس و یوحنا جِواب هادانِه: «شِما شِه داوَری هاکِنین، خِدایی نظر کِدیم دِرِسِ، شِمِه جا اِطاعَت هاکِردَن یا خِدایی جا اِطاعت هاکِردَن؟

²⁰ چون اَما نَتِمّی اونچی بَئیمی و بِشنُسِمی رِه، نُئیم.»

²¹ شورایی آدَمِن بعد از هَینگه پطرس و یوحنا رِه خِیلی تهدید هاکِردِنِه وِشونِه وِل هاکِردِنِه، چون راهی نَنگیتِنِه تا وِشونِه مِجازات هاکِنِن. چون دِشتِه مَردِن اونچی ای سِه گه اِتِّفاق دَکِت وِه خِدارِه حَمد و ثنا کِردِنِه.

²² چون هون مَردی ای گه مُعجزِه ای هَمرا شَفا بَئیت وِه، چِل سال ویشتَر داشتِه.

ایموندارِن پطرس و یوحنایی سِه دِعا کِنِنِه

²³ پِطرُس و یوحنا بعد از هَینگه آزاد بَوِنِه شی رَفِقِنی وَر دَگِرِسِنِه و اونچی گه گَت گَتِه کاهنِن و مَشایخ وِشونِه بُت وِنِه رِه خَوَر هادانِه.

²⁴ وختی هَینِ بِشنُسِنِه، یَکصِدا خِدایی حِضور دِعا هاکِردِنِه و بُتِنِه: «اِی خِداوندی گه هَمه چی ای حاکِمی، اِی خِدایی گه آسِمون و زَمین و دَریا و اونچی وِشونی دِلِه دَرِه رِه خَلق هاکِردی،

²⁵ تو شِه روح القُدُسی هَمرا اَمِه پیری زِوونی جا، شی خادم داوودِ پادشاهِ بُتی: «”چه قومیشون شورِش هاکِردِنِه و مَردِن بی دلیل توطئِه هاکِردِنِه؟

²⁶ دِنیایی دِلِه ای پادشاهِن هَمدَس بَوِنِه و حاکِمِن جَم بَونِه، خِداوندی علِیه و وی مسیحی علِیه.

²⁷ راساسی گه هَین شَهری دِلِه، هیرودیسِ حاکم و پُنتیوس پیلاتُس غیرِ یَهودیِن و یَهودی مَردِنی هَمرا تی علِیه مِقَدّسِ خادِم عیسی گه وِرِه مَسح هاکِردی، هَمدَس بَوِنِه.

²⁸ تا اونچی گه تی دَس و اِرادِه پِشتَر مِعیَّن هاکِرد وِه رِه بِجا بیارِن.

²⁹ اِسا، اِی خِداوند، وِشونی تَهدیدارِه هارِش و خادِمِنِ لِطف هاکِن تا دِشتِه شی جِرأتی هَمرا تی کَلامِ بُئِن.

³⁰ و شی دَسِ هَم شَفا هادائَنی سِه دراز هاکن و شی مِقَدّسِ خادِم عیسایی اِسمی هَمرا، نِشونِه ها و مُعجزات هاکِن.»

³¹ بعد از وِشونی دِعا، جایی گه اوجِه جَم وِنِه لَرزِه دَکِتِه و هَمه روح القُدُسی جا پِر بَوِنِه، و خِدایی کَلامِ جِرأتی هَمرا گِتِنِه.

ایموندارِن هَمدیَری اَموالی دِلِه شَریک وونِنِه

³² دِشتِه ایموندارِن یَکدِل و یَک جان وِنِه و هیچکی شی اَموالِ شِنِه نَئونِسِه، بَلگی هَمه چی ای دِلِه هَمدیری هَمرا شَریک وِنِه.

³³ رَسولِن عیسای خِداوندی زینِّه بَووئَنی خَوَری قِوّتی هَمرا شَهادَت داوِنِه و خِدایی گَتِ فیض، دِشتِه وِشونی سَر دَوِه.

³⁴ وِشونی دِلِه هیچکی مِحتاج نَوِه، چون هر کی زَمین یا خِنِه ای گه داشتِه رِه، روتِه و وی پولِ

³⁵ رَسولِنی پِش اِشتِه تا هر کَسی احتیاجی اَنّا وِشونی میِن رَسَد بَوو.

³⁶ یوسِف هَم گه لاوی ای قبیله ای جا و قپرسی وِه و رَسولِن وِرِه بَرنابا یَعنی ’تشویقِ ریکا‘ لَقب هادا وِنِه،

³⁷ زَمینی گه داشتِه رِه بَروتِه و وی پولِ بیاردِه، رَسولِنی پِش بِشتِه.