اعمال رَسولان 28 - کتاب مقدس به زبان مازندرانی - گویش غربی

مالتی جَزیرِه

¹ وختی سَلامتی ای هَمرا دریالُو بَرِسیمی، بِفَهمِسِمی هون جزیره ای اِسم مالتِ.

² هون جزیره ای مَردِن اَمارِه خِیلی مِحبت هاکِردِنِه. وِشون اَمِنِه تَش روشِن هاکِردِنِه، چون وارِش وارِسِه و هَوا سرد وِه، و اَمِه جا گرمی ای هَمرا پذیرایی هاکِردِنِه.

³ پولُس اَقَدّی هِیمِه جَم هاکِردِه و وختی هونِه تَشی سَر اِشتِه، تَشی گرمی ای سِه، یَتِه مار ویجا دیرگا بیمو و وی دَسی کَش بَچِسبِسِه.

⁴ هون جزیره ای مَردِن وختی بَئینِه گه مار وی دَسی جا آویزونِه، هَمدیَرِ بُتِنِه: «بی شَک هَین مَردی قاتلِ، هر چَن دَریایی جا نِجات بَیتِه، عِدالَت نِلنِه زینِّه بَمونِّه.»

⁵ ولی پولُس مارِ تَشی دِلِه دیم بَدا و شِه هیچی نَوِه.

⁶ مَردِن اِنتِظار داشتِنِه وی تَن تُو هاکِنِه یا هَینگه ناخوَکی دیم بَخارِه و بَمیرِه. ولی بعد از هَینگه خِیلی اِنتظار بَکِشینِه، وختی بَئینِه وِرِه هیچی نَوِه، وِشونی فِکر عَوض بَوِه و بُتِنِه وی یَتِه از خِدایِنِ.

⁷ هون نَزیکی زَمینایی دَوِه گه جزیره ای رَئیسی وِه گه وی اِسم پوبلیوس وِه. وی اَمارِه شی خِنِه دَعوَت هاکِردِه و سِه روز اَمِه جا گرمی ای هَمرا پَذیرایی هاکِردِه.

⁸ از قضا، پوبلیوسی پیر مَریض وِه و تُوو و اِسهال داشتِه. پولُس وی وَر بوردِه و دِعا هاکِردِه، شی دَسِ وی سَر بِشتِه و وِرِه شَفا هادا.

⁹ بعد از هَین اِتِّفاق، بَقیِه مَریضِنی گه جزیره ای دِلِه دَوِنِه، ایمونِه و شَفا گیتِنِه.

¹⁰ وِشون اَمارِه خِیلی احترام بِشتِنِه، و وختی خوایسِمی اوجِه ای جا بوریم، هر چی گه لازم داشتِمی رِه کَشتی ای دِلِه اَمِسِه بِشتِنِه.

پولُس رومی دِلِه

¹¹ بعد از سِه ماه، هون کَشتی ای هَمرا گه زِمِسِنِ جزیره ای دِلِه بَمونِس وِه، دَریایی سِه راهی بَوِمی. هون کَشتی اسکِندریه ای جا وِه و ”دِقِجی خِداینی“ نِشونِه رِه داشتِه.

¹² سیراکوزی سِه بَرِسیمی، لَنگر دیم بَدامی و سِه روز اوجِه بَمونِسِمی.

¹³ اَزما دَریایی سَفَرِ اِدامِه هادامی و ریگیونی شَهری سِه بَرِسیمی. فردای هون روز، جِنوبی وا شِرو بَوِه، و پِرا پوتیوُلی ای شَهری سِه بَرِسیمی.

¹⁴ اَما چَن تا بِرار اوجِه بَنگیتِمی گه اَمِه جا دَعوَت هاکِردِنِه هف روز وِشونی هَمرا بَمونیم. سَرآخَر رومی شهری سِه بَرِسیمی.

¹⁵ اوجِه ای بِرارِن وختی بِشنُس وِنِه گه راهی دِلِه دَرمی، تا آپیوس و ’سِه میخِنِه ای‘ بازاری دِلِه بیمونِه تا اَمِه پِشواز بیئِن. پولُس وختی وِشونِه بَئیه خِدارِه شِکر هاکِردِه و وی دِل قِوَّت بَیتِه.

¹⁶ وختی رومی سِه بَرِسیمی، پولُسِ اِجازه هادانِه یَتِه مِحافِظِ سَربازی هَمرا شی خِنِه ای دِلِه بَمونِّه.

¹⁷ سِه روز دییَر، پولُس یهودی گَت گَتِه رِه شی کَفا بَخونِسِه. وختی جَم بَوِنِه، وِشونِه بُتِه: «اِی بِرارِن، با اونگه مِن کاری شی قوم یا شی پیرِنی رَسم و رُسومی علِیه نَکِرد وِمِه، مِنِه اورشلیمی دِلِه هَماسینِه و رومیِنی تَحویل هادانِه.

¹⁸ وِشون میجا بازخواس هاکِردِنِه و خوایسِنِه مِنِه آزاد هاکِنِن، چون می دِلِه جُرمی نَئینِه گه وی سِزا مرگ ووئِه.

¹⁹ ولی وختی یَهودیِن اعتراض هاکِردِنِه، مجبور بَوِمِه امپراطوری جا رسیدگی بَخوام، البتِه نا تا شی قومی جا شکایت هاکِرد ووم.

²⁰ هَینِسه بَخوایسِمِه شِمارِ بَوینَم و شِمِه هَمرا گَب بَزِنِم، چون هون اسرائیلی اِمیدی خاطریِه گه مِنِه هَین زنجیلی هَمرا دَوِسِنِه.»

²¹ وِشون پولُسی جِواب بُتِنِه: «اَما هیچ نامه‌ای تی خَوَری یهودیه ای جا نَیتِمی، و هیچکِدیم از بِرارِنی گه اوجِه ای جا بیمونِه، هیچ بَدِ چی ای تی خَوَری نُتِنِه و خَوَری نَدانِه.

²² ولی خوایمی تی نظراتِ بِشنُئیم، چون دِمّی گه مَردِن هَین فِرقِه ای علِیه هَمه جا گَب زَنِنِه.»

²³ پَس وِشون یَتِه روزِ تَعیین هاکِردِنِه و خِیلی آدَمِن پولُسی خِنِه بیمونِه تا وِرِه بَوینِن. وی صِب تا شُو، خِدایی پادشاهی ای خَوَری وِشونی سِه شهادت داوِه. و تَقَلّا کِردِه موسایی تورات و پِیغَمبَرِنی نِوِشتِه ای هَمرا، عیسایی خَوَری وِشونه قانع هاکِنِه.

²⁴ بَعضیا وی گَبِ قَبول هاکِردِنِه، ولی بَقیِه ایمون نیاردِنِه.

²⁵ پَس هَمونجور گه هَمدیَری هَمرا جَرّ و بَحث کِردِنِه، اوجِه ای جا بوردِنِه. ولی پِش از اونگه اوجِه ای جا بورِن، پولُس شی آخَرین گَبِ بَزو و بُتِه: «روح القُدُس چَنی خِب شِمِه پیرِنی هَمرا گَب بَزو، هون موقِه گه اِشعیای پِیغَمبَری طریق بُتِه:

²⁶ «‌”هَین قومی وَر بور و بُو، ’حَیقَتاً شی گوشی هَمرا اِشنُنِنی، ولی هیچ وَخت نِفَهمِنِنی؛ حَیقَتاً شی چِشی هَمرا وینِنی، ولی هیچ وَخت دَرک نَکِنِنی.‘

²⁷ چون هَین قومی دِل سنگ بَوِه، وِشونی گوش سَتَل بَوِه، و شی چِشِ دَوِسِّنِه، نَکِنِه شی چِشی هَمرا بَوینِن، و شی گوشی هَمرا بِشنُئِن، و شی دِلی دِلِه بِفهمِن و دَگِردِن و مِن وِشونِه شَفا هادِم.“

²⁸ «پَس دِنّین گه خِدایی نِجات غیرِیهودیِنی وَر بَرِسانی بَوِه و وِشون گوش دِنِنِه!»

²⁹ بعد از اونگه پولُس هَینِه بُتِه، یَهودیِن هَمونجور گه هَمدیَری هَمرا جَرّ و بَحث کِردِنِه، اوجه ای جا بوردِنِه.

³⁰ هَینجوری پولُس دِ سال تِموم شی خِنِه ای دِلِه گه اِجارِه هاکِرد وِه دَوِه و هر کی گه وی وَر ایمو رِه، قَبول کِردِه.

³¹ پولُس خِدایی پادشاهی رِه اِعلام کِردِه و دِشتِه جِرأتی هَمرا و بِدون هَینگِه کسی وی دَمِ بَیرِه خِداوند عیسای مَسیحی خَوَری تَعلیم داوِه.