اعمال رَسولان 27 - کتاب مقدس به زبان مازندرانی - گویش غربی

پولُس رومی سِه شونِه

¹ وختی تصمیم بَیتِنِه گه اَما دَریایی راهی جا ایتالیایی سِه بوریم، پولُس و چَن تا دییَر از زیندونیِنِ یَتِه اَفسَر گه وی اِسم یولیوس و اِمپراطوری گُردانی جا وِه، تَحویل هادانِه.

² پَس کَشتی ای گه اَدرامیتینوسی شهری جا بیمو وِه و آسیایی مَنطقِه ای بَندرا رِه شیوِه سِوار بَوِمی و راه دَکِتِمی. آریستارخوسِ مَقدونی، گه تِسالونیکی ای جا وِه هَم اَمِه هَمرا دَوِه.

³ فردای هون روز صیدونی شهری سِه بَرِسیمی. یولیوس پولُسِ لِطف هاکِردِه، اِجازه هادا شی رَفِقِنی وَر بورِه تا وی اِحتیاجارِه برطرف هاکِنِن.

⁴ یَکَش دییَر اوجِه ای جا دریایی سِه راهی بَوِمی، ولی چون بَرعَکسِ وا زووِه پس مجبور بَوِمی قِبرِسی هون وَری جا گه وا نَزو وِه راه دَکِفیم.

⁵ بعد از هَینگِه کیلیکیه و پامفیلیه ای دریالُویی جا بِگذِشتِمی، میرائی بَندری دِلِه، گه لیکیِه ای مَنطقِه ای دِلِه وِه پیادِه بَوِمی.

⁶ رومی اَفسَر اوجِه یَتِه کَشتی بَنگیتِه گه اسکِندریه ای شهری جا ایتالیایی سِه شیِه، و اَمارِه اونی سِوار هاکِردِه.

⁷ چَن روز یَواش یَواش بوردِمی و سَختی ای هَمرا کْنیدوسی دریالُویی سِه بَرِسیمی. ولی وا اَنّی توش داشتِه گه مَجبور بَوِمی شی مَسیرِ عَوَض هاکِنیم و کْرِتی جَزیره ای هون وَری جا گه وا نَزو وِه بوریم. تا سالمونی ای شهری وَر پِش بوردِمی.

⁸ سختی ای هَمرا دریالُویی جا بِگذِشتِمی و یَجا گه وی اِسم ’قَشنگِ بَندریشون‘ وِه بَرِسیمی گه لاسائیه ای شَهری نَزیکی وِه.

⁹ از اوجِه گه خِیلی وَخت تَلف بَوِه وِه، حتّی هون روزایی گه روزه گیتِنِه ای موقِه هَم بِگذِشت وِه، اِسا دِ دریایی سَفر هَین موقِه ای دِلِه خَطرناک وِه. هَینِسه پولُس وِشونِه هِشدار هادا بُتِه:

¹⁰ «آقایون، ویمِّه گه پِرخطرِ سَفر دارمی و نا فقط کَشتی و وی بارِ ضَرَر زَنِّه، بَلگی اَمِه جانِ هَم صَدمِه زَنِّه.»

¹¹ ولی رومی اَفسَر ناخِدا و صاب کَشتی ای گَبِ ویشتَر اهمیت هادا تا پولُسی گَبِ.

¹² چون هون بَندر زِمِسِنی سَر هاکِردنی سِه خِب نَوِه، هَینی خاطری ویشترِ هَین آدَمِن تصمیم بَیتِنِه گه شی سَفرِ اِدامِه هادیم، هَین اِمیدی هَمرا گه فینیکسی بَندری سِه بَرِسیم و زِمِسِنِ اوجِه سَر هاکِنیم. هَین بندر کْرِتی دِلِه وِه و وی دیم هَم جِنوب غربی و هَم شِمالِ غربی ای سَمت وِه.

دَریایی کِلاک

¹³ پس وختی یَواش یَواش جِنوبی وا دَکِتِه، وِشون گِمون هاکِردِنِه شی مَقصَدی سِه بَرِسینِه؛ لَنگر بَکِشینِه و کْرِتی راسِه، دَریالُویی نَزیکی پِش بوردِنِه.

¹⁴ ولی خِیلی زِمِن نِگذِشتِه گه یَتِه تِنِّه وا، گه شِمالِ شرقی ای وا رِه معروف وِه، خِشکی ای سَمتی جا اَمِه سَمت بَزو.

¹⁵ کَشتی کِلاکی گِرِفتار بَوِه و نَتِنِّسِه خلافِ وا پِش بورِه؛ هَینِسه، شِرِه وایی دَس بِسپارِسِمی و وی هَمرا بوردمی.

¹⁶ بِالاخَرِه کَشتی رِه یَتِه کِچیک جزیره‌، جِنوبی طَرف گه وی اِسم کُودا وِه بَرِسانیمی و اوجِه هِزار زَحمتی هَمرا نِجاتی لوتکا گه کَشتی ای دِمال دَوِه رِه کَشتی ای سَر بیاردِمی.

¹⁷ وختی مَلَوانِن لوتکارِه کَشتی ای سَر بیاردِنِه، رَسِنی کِمَکی هَمرا، کَشتی ای دور و وَرِه قائِم دَوِسِنِه تا لی نَخارِه، و هَین تَرسی هَمرا گه نَکِنِه کَشتی سیرتیسی گِلی دِلِه دَماسِه، لَنگَرِ دیم بَدانِه و کَشتی رِه وایی سَمت وِل هاکِردِنِه.

¹⁸ فردای هون روز، چون کِلاک اَمارِه بَدجور ضَربِه زووِه، مَجبور بَوِنِه کَشتی ای بارِ دَریایی دِلِه بَریزِن.

¹⁹ سوّمین روز، شی دَسی هَمرا کَشتی ای وَسایلِ دَریایی دِلِه بَریختِنِه.

²⁰ هَمینجوری روزا شیوِه و اَما خِرشید و سِتارِه ایشونی رَنگِ نَوینِسمی و کِلاک هَم کَم نَوونِسِه، جوریگه هَمه شی نِجاتی اِمیدِ از دَس هادامی.

²¹ از اوجِه گه خِیلی وَخت وِه غذا نَخارد وِنِه، پولُس وِشونی میِن هِرِسا و بُتِه: «آقایون، شِما می گَبِ وِسِه قَبول کِردِنی و کْرِتی جا دیرگا نیمونی تا اَنّی ضَرَر و زیان نَوینِسِنی.

²² اَلَن هَم شِمارِ تشویق کِمِّه گه شِمِه دِل قِرص ووئِه، چون شِمِه هیچکِدیمی جانِ ضَرَری نَرِسِنِه؛ فقط کَشتی از دَس شونِه.

²³ چون هَمین دیشو خِدایی یَتِه فِرِشتِه، خِدایی گه ویجامِه و وِرِه خِدمَت کِمِّه، می ور هِرِسا

²⁴ و بُتِه: ”پولس، نَتِرس. تو وِنِه مِحاکمه ای سِه، امپراطوری پِش حاضِر بَووئی، و حَیقَتاً، خِدا دِشتِه تی هَمسَفَرِنی جانِ هَم تِنِه بِبَخشیِه.“

²⁵ پَس اِی مَرداکِنِن، شِمِه دِل قِرص ووئِه، چون مِن ایمون دارمِه هَمونجور گه خِدا مِنِه بُتِه، وونِه.

²⁶ ولی اَمِه کَشتی وِنِه یَتِه جزیره‌ای دِلِه گِل هِنیشِه.»

²⁷ چاردهمین شُو، حَلا وا اَمارِه آدریاتیکی دریایی دِلِه هَین طَرف و هون طَرف وَردِه گه نِصفِ شُویی نَزیکی، مَلَوانِن گِمون هاکِردِنِه خِشکی رِه نَزیک وونِنِه.

²⁸ پَس اُوئی عِمقِ اندازِه بَزونِه و بِفَهمِسِنِه گه حِدودِ چِل مِتر وونِه. اَزماتَر، یَکَش دییَر اُوئی عِمقِ اندازِه بَزونِه و بَئینِه سی مِترِ.

²⁹ چون تَرسیوِنِه کِریشونِه بَخاریم، چار تا لَنگر کَشتی ای دِمال دیم بَدانِه، و دِعا کِردِنِه هر چی زودتر روز بَوو.

³⁰ مَلَوانِن قصد داشتِنِه کَشتی ای جا فِرار هاکِنِن، نجاتی لوتکارِه دَریایی دِلِه دیم بَدانِه، هَین ویهومِه ای هَمرا گه خواینِنِه چَن تا لنگر کَشتی ای سینه ای جا دَریایی دِلِه دیم بَدِن.

³¹ پولُس اَفسَر و سَربازِنِ بُتِه: «اگه هَین مَرداکِنِن کَشتی ای دِلِه نَمونِن، نَتِنِّنی نِجات بَیرین.»

³² پَس سَربازِن هون رَسِنی گه نجاتی لوتکا دَوَس وِه رِه بَورینِه و لوتکا رِه وِل هاکِردِنِه.

³³ وختی گه آفتاب دِ دَر ایمو، پولُس هَمه رِه تَشویق هاکِردِه گه یَچی بَخارِن. بُتِه: «اَمرِز چارده روزِ گه انتظاری دِلِه دَوِنی و هیچی نخاردِنی، بی‌غذا بَمونِسِنی.

³⁴ پَس شِمارِ تشویق کِمِّه غذا بَخارین، چون شِمارِ قِوَّت دِنِه. یَتِ خال می هَم شِمِه کَلِّه ای جا کَم نَوونِه.»

³⁵ وختی هَینِه بُتِه، نونِ بَیتِه و هَمه ای چِشی وَر خِدارِه شِکر هاکِردِه و نونِ گِلی هاکِردِه، بَخاردَنِ شِرو هاکِردِه.

³⁶ پَس هَمه تَشویق بَوِنِه و یَکَم غذا بَخاردِنِه.

³⁷ جَمعاََ کَشتی ای دِلِه، دویست و هفتاد و شِش نَفر وِمی.

³⁸ وِشون بعد از هَینگه غذا بَخاردِنِه، بَقیِه غَلّه رِه دَریایی دِلِه بَریختِنِه و کَشتی رِه سَبِک هاکِردِنِه.

³⁹ وختی روز بَوِه، خِشکی رِه نِشناسینِه، ولی یتِه کِچیکِ خلیج گه وی دریالُو ریگی جا پِر وِه رِه بَئینِه. پَس خوایسِنِه اگه بَوو کَشتی رِه اوجِه گِل هِنیشانِن.

⁴⁰ لَنگرایی رَسِنِ بَورینِه و اونانِه دَریایی دِلِه دیم بَدانِه و هون رَسِنی گه سُکانِ داشتِه رِه هَم وا هاکِردِنِه. اَزما، کَشتی ای سینِه ای بادبونِ وایی مَسیری سَمت لُو بَکِشینِه و دَریالُویی سَمت بوردِنِه.

⁴¹ ولی کَشتی، اُوئی بِنی یَتِه کِریشونِه بَخارده و گِل هِنیشتِه. کَشتی ای سینه دَماسیه و بی‌حرکت بَمونِسِه، ولی کَشتی ای دِمال کِلاکی ضَرَباتی هَمرا بِشکِسِه.

⁴² سَربازِن خوایسِنِه زیندونیِنِ بَکوشِن نَکِنِه کَسی شِنو هاکِنِه و دَربورِه.

⁴³ ولی رومی افسر گه خوایسِه پولُسی جانِ نِجات هادِه، وِشونی دَمِ بَیتِه و دَستور هادا اَوّل اونانیگه بَتِنِّنِه شِنو هاکِنِن، شِرِه دریایی دِلِه دیم بَدِن و خِشکی ای سِه بَرِسانَن.

⁴⁴ بَقیه هَم وِسِه شِرِه اَلوار یا کَشتی ای وَسایِلی سَر خِشکی ای سِه رَسانینِه. هَینجوری هَمه سلامت خِشکی ای سِه بَرِسینِه.