اعمال رَسولان 26 - کتاب مقدس به زبان مازندرانی - گویش غربیپولُسی دِفاع آگریپاسی پِش 1 آگْریپاس پولُسِ بُتِه: «اِجازه دارنی شیجا دِفاع هاکِنی.» اَزما پولُس شی دَسِ پِش بَوِردِه و شیجا هَینجور دِفاع هاکِردِه: 2 «اِی آگْریپاس پادشاه، چَنی خِش شانسِمِه گه اَمرِز شِمِه پِش اِسّامِه، تا دِشتِه یَهودیِنی شِکایَتی پِش شیجا دِفاع هاکِنِم. 3 خصوصاََ هَینگه دِمِّه شِما یَهودی رَسم و رُسوم و وِشونی میِنی اِختلافایی جا کامِلاََ آشنانی. اِسا خواهِش کِمِّه صبری هَمرا می گَبِ گوش هادین. 4 «دِشتِه یَهودیِن می زندگی رِه از جَوونی دِنِنِه، از هَمون اَوَّل گه شی قومی میِن و اورشلیمی دِلِه زندگی کِردِمِه. 5 وِشون قَدیمی جا خَوَر دارِنِه و اگه بَخوان، بَتِنِّنِه شهادت هادِن گه مِن بعنوانِ یَتِه فَریسی، شی دینی سَختگیرتَرین فِرقِه ای جا پیرَوی کِردِمِه. 6 و اَمرِز هون اِمیدی خاطری گه خِدا اَمِه پیرِنِ وَعدِه هادا وِه، مِحاکِمِه وومِه. 7 هَین هَمون وَعدِه ایه گه اَمِه دِوازِه تا قبیله اِمید داشتِنِه گه هونِه بِدَس بیارِن. هَینِسه شی دِلی جا شُو و روز دِعا کِردِنِه تا هونِه بَرِسِن. اَرِه، اِی پادشاه، یَهودین هَمین اِمیدی خاطریه گه مِنِه مِتَهم کِنِنِه. 8 چه شِمِه نظر هَینگِه خِدا مِردِگونِ زینِّه کِنِّه اَنّی عجیب غَریب اِنِه؟ 9 «می باوَر هَم هَین وِه گه عیسای ناصری ای اِسمی علِیه هر کاری گه می دَس بَر اِنِه رِه هاکِنِم. 10 و هَین هَمون کاری وِه گه اورشلیمی دِلِه هاکِردِمِه. مِن گَت گَتِه کاهِنِنی جا مِجَوِز گیتِمِه و یَتِخِیلی مِقدّسینِ زیندونی کِردِمِه، و وختی مرگی سِه محکوم وونِسِنِه، وِشونی علِیه رأی داوِمِه. 11 خِیلی وَختا وِشونی مِجازاتی سِه، عِبادَتگاهایی دِلِه شیوِمِه و تَقَلّا کِردِمِه و وِشونِه مَجبور کِردِمِه کِفر بُئِن. می خَشم اَنّی وِه گه حتّی تا غریبه ایشونی شَهرا هَم وِشونِه تَعقیب کِردِمِه. 12 «یَتِه از هَین سَفرایی دِلِه، هون حِکم و اختیارِ کاملی هَمرا گه گَت گَتِه کاهِنِنی جا بَیتِمِه، دَمشقی شهری سِه راهی بَوِمِه. 13 ظِهری موقِه، اِی پادشاه، راه دِلِه یَتِه نور خِرشیدی نوری جا روشِنتَر آسِمونی جا مِن و می هَمراهِنی دُور بَتابِسِه. 14 هَمه بِنِه ای سَر دیم بَخاردِمی، و مِن یَتِه اَواز بِشنُسِمِه گه عبرانیِنی زِوونی هَمرا مِنِه بُتِه: ”شائول، شائول، چه مِنِه عذاب دِنی؟ مِخیشونِه لُو بَزوئَن تِنِه سَختِ، فقط شِرِه اَذیت کِنّی!“ 15 «بَپرسیمِه: ”خِداوندا، تو کی ای؟“ «خِداوَند بُتِه: ”من هَمون عیسامِه گه تو وِرِه عذاب دِنی. 16 پِرِس و شی لینگی سَر هِرِس. مِن هَینِسه تِنِه ظاهر بَوِمِه تا تِرِه شی خادِم و شی شاهِد هاکِنِم، تا اونچی ای دِلِه گه مِنِه بَئی و اونچی ای دِلِه تِرِه ظاهِر وومِه، شهادت هادی. 17 مِن تِرِه تی قوم و غیرِ یَهودِیِنی دَسی جا، گه تِرِه وِشونی وَر رَسامِّه نِجات دِمِه 18 تا وشونی چِشِ وا هاکِنی، جوریگه تاریکی ای جا نوری سِه، و شیطانی قِدرَتی جا خِدایی سَمت دَگِردِن، تا وِشونی گِناهِن بیامرزی بَوو، و بخاطر ایمونی گه مِنِه دارِنِه مِقَدَّسینی بَرَکاتی دِلِه سهمی دارِن.“ 19 «پَس هون موقِه، اِی آگْریپاسِ پادشاه، مِن آسِمونی رؤیائی جا گه میسِه بیمو سَرپیچی نَکِردِمِه. 20 بَلگی اَوَل دَمشقیِنی میِن، اَزما اورشلیم و دِشتِه یَهودیِه ای مَنطقِه ای دِلِه، و غیرِیهودیِنی میِن هَم هَین پِیغِمِ اعلام هاکِردِمِه گه وِنِه توبِه هاکِنِن و خِدایی سَمت دَگِردِن و شی عَملی هَمرا نِشون هادِن گه واقِعاََ توبِه هاکِردِنِه. 21 هَینِسه وِه گه یهودیِن مِنِه معبدی دِلِه هَماسینِه و خوایسِنِه مِنِه بَکوشِن. 22 ولی تا اَمرِز، خِدا مِنِه کِمَک هاکِردِه و اَلَن ایجِه اِسّامِه و هَمه ای سِه، از گَت تا کِچیک، شهادت دِمِه. اونچی گِمِه هیچی نیِه بِجِز اونچی پِیغَمبَرِن و موسای پیغمبر بُتِنِه گه وِنِه اِتِّفاق دَکِفِه: 23 هَینگه مَسیح وِنِه رَنج بَوینِه و اوّلین نَفَری ووئِه گه مِردِگونی جا زینِّه وونِه، تا روشِنایی رِه هَم اَمِه قوم و هَم دییَر قومارِه اِعلام هاکِنِه.» 24 وختی پولُس هَین گَبایی هَمرا شیجا دِفاع کِردِه، فِستوس داد بَزو: «پولُس، تو شی عَقلِ از دَس هادایی! زیادی عِلم، تِرِه خِل هاکِردِه.» 25 ولی پولُس جِواب هادا: «عالیجناب فِستوس، مِن خِل نیمِه، بَلگی عَقلی هَمرا حَیقَتِ گِمِه. 26 پادشاه شِه هَین کاری جا خَوَر دارنِه و مِنَم واضِح وِشونی هَمرا گَب زَمِّه، چون باوَر دارمِه هیچکِدیم از هَینِن وِشونی نظری جا دور نیِه، چون یَچی نَوِه گه خَلوَتی دِلِه یَواشک اِتِّفاق دَکِت وو. 27 اِی آگْریپاسِ پادشاه، تو پِیغَمبَرِنِ اعتقاد دارنی؟ دِمِّه گه دارنی.» 28 آگْریپاس پولُسِ بُتِه: «اَنّی زود خواینی مِنِه قانع هاکِنی مسیحی بَووم؟» 29 پولُس وی جِواب بُتِه: «خِدایی جا خوایمِه گه دیر یا زود، نا فقط شِما، بَلگی دِشتِه کَسایی گه اَمرِز می گَبِ اِشنُنِنِه، می تَرا بَوون، البته نا زنجیلی دِلِه!» 30 اَزما پادشاه پِرِسا و وی هَمرا فرموندار و بِرنیکی و بَقیِه مِجلسیِن هَم پِرِسانِه، 31 و وختی دِ گَب زووِنِه دیرگا بوردِنِه، هَمدیَرِ گِتِنِه: «هَین مَردی کاری گه بَمِردَن یا زیندونی مِستَحق ووئِه نَکِردِه.» 32 آگْریپاس فِستوسِ بُتِه: «اگه هَین مَردی نَخوایس وِه وی قضیِه امپراطوری جا رسیدگی بَوو، اَلَن هَم بِشِنِسِه وِرِه آزاد هاکِردَن.» |
@ 2024 Korpu Company