اعمال رَسولان 25 - کتاب مقدس به زبان مازندرانی - گویش غربی

پولسی محاکمه فِستوسی وَر

¹ فِستوس سِه روز بعد از هَینگِه شی مَحلی فرمونداری ای سِه بیمو، قیصریه ای جا اورشَلیمی سِه بوردِه.

² اوجِه گَت گَتِه کاهنِن و یهودی قومی گَت گَتِه وی پِش حاضِر بَوِنِه و شی شکایَتِ پولُسی علِیه بُتِنِه.

³ وِشون اِصراری هَمرا فِستوسی جا بَخوایسِنِه وِشونی سَر مِنَّت بِلِه، پولُسِ اورشَلیمی سِه بَرِسانِه، چون کَمین نیشت وِنِه تا راهی دِلِه وِرِه بَکوشِن.

⁴ ولی فِستوس وِشونی جِواب بُتِه: «پولُس قیصریه ای شهر زیندونی دِلِه دَرِه و مِن شِه قصد دارمِه بِزودی اوجِه بورِم.

⁵ فِستوس بُتِه شِمِه دِلِه اونانیگه رَهبَرِنِه، بَتِنِّنِه می هَمرا بیئِن تا اگه هَین مَردی ای جا خَطایی سَر بَزو، شی شکایتِ وی علِیه بُئِن.»

⁶ فِستوس بعد از هَش دَه روز گه وِشونی هَمرا دَوِه، قیصریه ای سِه دَگِرِسِه. و فردای هون روز، مَحکمِه رِه تشکیل هادا و دستور هادا پولُسِ بیارِن.

⁷ وختی پولُس دِلِه بیمو، یَهودیِنی گه اورشلیمی جا بیمو وِنِه، وی دُور هِرِسانِه و بَدجور اِتهامایی وِرِه بَزونِه، ولی نَتِنِسِنِه اونانِه ثابت هاکِنِن.

⁸ پولُس شیجا دِفاع هاکِردِه و بُتِه: «مِن نا یَهودی شریعَتی علِیه خطایی هاکِردِمِه نا مَعبدی علِیه نا اِمپراطوری علِیه.»

⁹ فِستوس گه خوایسِه یَهودیِنی سَر مِنَّت بِلِه، پولُسِ بُتِه: «خواینی اورشَلیمی سِه بوری تا اوجِه هَین اِتهامایی سِه می پِش مِحاکمه بَووئی؟»

¹⁰ پولُس جِواب هادا: «مِن اَلَن امپراطوری مَحکمِه ای دِلِه اِسّامِه گه اونی دِلِه وِنِه مِحاکمه بَووم. شِما شِه خِب دِنِّنی گه مِن نسبت به یَهود هیچ خطایی نَکِردِمِه.

¹¹ اِسا اگه خَطایی هاکِردِمِه یا کاری میجا سَر بَزو گه مرگی مِستَحَق ووئِه، بَمِردَنی جا ترسی نارمِه. ولی اگه اِتهامایی گه هَینِن مِنِه زَنِنِه بیخِدیِه، هیچکَس نَتِنِّه مِنِه وِشونی دَس تَسلیم هاکِنِه. مِن خوایمِه قضیِه امپراطوری مَحکمِه ای دِلِه رسیدگی بَوو.»

¹² فِستوس بعد از هَینگِه شی شورایی اعضایی هَمرا مشورَت هاکِردِه بُتِه: «خوایسی تی قضیِه امپراطوری مَحکمِه ای دِلِه رسیدگی بَوو؟ پَس امپراطوری مَحکمِه ای سِه شونی!»

پولُس، آگریپاسی پِش

¹³ بعد از هَینگِه چند روز بِگذِشتِه، آگْریپاسِ پادشاه و بِرنیکی، فِستوسی خِشامَدگویی سِه، قیصریه ای شهری سِه بیمونِه.

¹⁴ و چون خِیلی روزا اوجِه بَمونِسِنِه، فِستوس پولُسی قضیه رِه پادشاهی سِه تعریف هاکِردِه و بُتِه: «ایجِه یَتِه مَردی دَرِه گه فِلیکْس وِرِه زیندونی دِلِه داشتِه.

¹⁵ وختی اورشَلیم دَوِمِه، گَت گَتِه کاهنِن و یهودی مَشایِخ وِرِه اِتهامایی بَزونِه و خوایسِنِه وی مَحکوم بَوو.

¹⁶ «وِشونِه بُتِمِه رومیِنی دِلِه رَسم نیِه گه مِتَهمی رِه، پِش از اونگه شی شاکیِنی هَمرا رو به رو بَوو و بَتِنِّه اِتهامایی گه وِرِه زَنِنِه رِه شیجا دِفاع هاکِنِه، تَسلیم هاکِنِن.

¹⁷ وختی وِشون ایجِه بیمونِه، مِن مَتَّل نَکِردِمِه و فردای هون روز، مَحکَمِه رِه تَشکیل هادامِه و دستور هادامِه وِرِه می وَر بیارِن.

¹⁸ وختی وی شاکیِن پِرِسانِه تا گَب بَزِنِن، وِرِه هیچکِدیم از بَدِ کارایی گه مِن اِنتِظار داشتِمِه، مِتَهم نَکِردِنِه.

¹⁹ بَلگی شی دینی خَوَری و عیسی نومی گه بَمِردِه و پولُس اِدعا کِردِه زینِّئِه، جَرّ و بَحث هاکِردِنِه.

²⁰ مِن گُو نَئونِسِمه چِتی وِنِه هَینجور قضیه رِه بَررِسی هاکِردَن، ویجا بَپُرسیمِه خواینِه اورشَلیمی سِه بورِه تا اوجِه هَین اِتهامایی سِه مِحاکِمه بَوو.

²¹ ولی وختی گه پولُس بَخوایسِه تا زیندونی دِلِه بَمونِّه و وی قضیِه امپراطوری مَحکمه ای دِلِه رسیدگی بَوو، دَستور هادامِه وِرِه دارِن، تا روزی گه بَتِنِّم وِرِه امپراطوری وَر بَرِسانِم.»

²² اَزما آگْریپاس، فِستوسِ بُتِه: «دوس دارمِه شِه وی گَبارِه بِشنُئِم.» فِستوس بُتِه: «فَردا اِشنُنی.»

²³ فردای هون روز، آگْریپاس و بِرنیکی دَبدَبِه و کَب کَبه ای هَمرا بیمونِه و نظامی فرموندهِن و شَهری سَرشناسِ مَرداکِنِنی هَمرا مَحکمِه ای سالنی دِلِه بوردِنِه. فِستوسی دَستوری هَمرا پولُسِ بیاردِنِه.

²⁴ فِستوس بُتِه: «اِی آگْریپاسِ پادشاه، و اِی دِشتِه حِضار! دِشتِه یهودی مَردِن چی ایجِه و چی اورشلیمی دِلِه، هَین مَردی ای جا گه وینِنی می وَر شکایت هاکِردِنِه. و داد و بیداد هاکِردِنِه گه نِنِه زینِّه بَمونِّه.

²⁵ ولی مِن بِفَهمِسِمِه گه وی کاری نَکِردِه گه وی سِزا بَمِردَن ووئِه. و چون وی شِه بَخوایسِه امپراطوری مَحکَمِه ای دِلِه بورِه، مِنَم تَصمیم بَیتِمِه وِرِه رومی سِه بَرِسانِم.

²⁶ ولی مِن نَئومِه امپراطوری سِه چی بَنویسِم، هَینِسه وِرِه شِمِه وَر بیاردِمِه، مَخصوصاََ شِمِه وَر اِی آگْریپاسِ پادشاه، تا ویجا بازخواس هاکِنیم و مِن یَچی بَنوِشتی سِه دارِم.

²⁷ چون عقلانی نیِه یَتِه زیندونی رِه امپراطوری وَر بَرِسانِم ولی نَنویسِم وی اِتهاما چیِه.»