اعمال رَسولان 23 - کتاب مقدس به زبان مازندرانی - گویش غربی

¹ پولُس شورایی اعضارِه هارشیِه و بُتِه: «بِرارِن، مِن تا اَمرِز پاکِ وِجدانی هَمرا خِدایی حِضور زندگی هاکِردِمِه.»

² وختی هَینِه بُتِه، کاهِن اعظم، حَنانیا، اونانیگه پولُسی ور اِسّاوِنِه رِه، دَستور هادا تا وی تِکی سَرِ بَزِنِن.

³ پولُس حَنانیا رِه بُتِه: «خِدا تِرِه زَنِّه، اِی اِسبی بَوِه دیفار! تو هون تَختی سَر نیشتی تا طِبق شریعَت مِنِه مِحاکمِه هاکِنی، ولی تو بَرخَلافِ شریعَت، دَستور دِنی مِنِه بَزِنِن؟»

⁴ اونانیگه پولُسی وَر اِسّاوِنِه، بُتِنِه: «خِدایی کاهنِ اعظمِ بی حِرمتی کِنّی؟»

⁵ پولُس بُتِه: «اِی بِرارِن، مِن نَئونِسِمِه کاهِنِ اعظمِ؛ چون توراتی دِلِه بَنوِشت بَوِه: ”شی قومی رَهبَرِ بَد نُو.“

⁶ اَزما پولُس گه دِنِّسِه اَقَدّی از وِشون عِلَمای فِرقه صَدّوقی و اَقَدّی عِلَمای فِرقِه فریسینِه، شورایی دِلِه بِلَنِ اَوازی هَمرا بُتِه: «اِی بِرارِن، مِن فَریسی و فَریسی‌زادِمِه، هَینی خاطری گه مِردِگونی زینِّه بَووئَنِ اِمید دارمِه دِ مِحاکمِه وومِه.»

⁷ وختی پولُس هَینِه بُتِه، فَریسیِن و صَدوقیِنی میِن جرّ و بَحث دَکِتِه و جَماعت دِ دَسِه بَوِنِه،

⁸ چون صَدوقیِن مِردِگونی زینِّه بَووئَن و فِرشتِه و روحِ اعتقاد نارِنِه، ولی فَریسیِن دِشتِه هَینِنِ اعتقاد دارِنِه.

⁹ یَتِه گَتِه بَلبَشو بَوِه! بَعضی از توراتی مَلِّمِن گه فَریسی وِنِه، پِرِسانِه و بدجور اعتراض هاکِردِنِه و بُتِنِه: «هَین مَردی ای دِلِه هیچ خَطایی نَویمّی. کِجِه دَری معلومِ گه یَتِه روح یا فِرِشتِه وی هَمرا گَب نَزو وو.»

¹⁰ دَعوا جوری بالا بَیتِه گه فرموندِه بَترسیِه نَکِنِه پولُسِ گِل گِلی هاکِنِن. پَس سَربازِنِ دَستور هادا جِر بورِن و پولُسِ وِشونی چَنگی جا دَر بیارِن، و قلعه ای دِلِه بَوِرِن.

¹¹ هَمون شُو، خِداوَند پولُسی وَر هِرِسا و بُتِه: «تی دِل قِرص ووئِه! هَمونجور گه اورشلیمی دِلِه مِنِه شَهادَت هادائی، رومی دِلِه هَم وِنِه شَهادَت هادی.»

پولُسی بَکوشتَنی دَسیسِه

¹² وختی صِب بَوِه، یهَودیِن هَمدیَری هَمرا دَسیسِه دَچینِه، قَسَم بَخاردِنِه تا پولُسِ نَکوشِن، هیچی نَخارِن و هیچی نَنوشِن.

¹³ هَین دَسیسِه ای دِلِه ویشتَر از چِل نَفر دَس داشتِنِه.

¹⁴ وِشون گَت گَتِه کاهنِن و مَشایِخی وَر بوردِنِه و بُتِنِه: «اَما قَسَم بَخاردِمی تا پولُسِ نَکوشیم، هیچی نَخاریم.

¹⁵ پس اِسا شِما و شورایی اعضا رومی فَرموندِه ای جا بَخواین وِرِه شِمِه وَر بیارِه، هَین ویهومه ای هَمرا گه خواینِنی دقیقتر وی قضیِه رِه بَررِسی هاکِنین. اَما آمادِمی پِش از هَینگه هَیجِه بَرِسِه وِرِه بَکوشیم.»

¹⁶ ولی پولُسی خِرزا هَین دَسیسِه ای جا خَوَردار بَوِه و قَلعه ای سِه بوردِه و پولُسِ سَریساب هاکِردِه.

¹⁷ پولُس یَتِه از اَفسرِنِ داد هاکِردِه و بُتِه: «هَین جَوونِ فرموندِه ای وَر بَوِر، چون ویسِه یَتِه خَوَر دارنِه.»

¹⁸ هون اَفسَر وِرِه فرمونده ای وَر بَوِردِه و وِرِه بُتِه: «پولُسِ زیندونی مِنِه داد هاکِردِه و میجا بَخوایسِه هَین جَوونِ شِمِه وَر بیارِم؛ خواینِه شِمارِ یَچی بُئِه.»

¹⁹ فرموندِه هون جَوونی دَسِ بَیتِه، وِرِه یَتِه گوشِه بَکِشیِه و بَپُرسیِه: «چی خواینی مِنِه بُئی؟»

²⁰ پولُسی خِرزا بُتِه: «یَهودیِن هَمدَس بَوِنِه شِمِه جا بَخوان گه فَردا پولُسِ شورایی وَر بَوِرین، هَین ویهومِه ای هَمرا گه خواینِنِه دقیقتر وی قضیِه رِه بَررِسی هاکِنِن.

²¹ وِشونی دَرخواسِ قَبول نَکِنین، چون ویشتَر از چِل نَفَر وی کَمین نیشتِنِه. وِشون قَسَم بَخاردِنِه تا وِرِه نَکوشِن، هیچی نَخارِن و نَنوشِن. اِسا آمادِنِه، و فقط منتَظِرِنِه شِما وِشونی دَرخواسِ قَبول هاکِنین.»

²² فرموندِه، جَوونِ مِرخَص هاکِردِه و وِرِه قَدِغَن هاکِردِه، بُتِه: «هیچکَسِ نُو هَین چیارِه مِنِه خَوَر هادایی.»

پولُسِ قیصریه ای سِه رَسانِنِه

²³ پس فرموندِه دِ نَفَر از شی اَفسَرِنِه شی کَفا بَخونِسِه و وِشونِه بُتِه: «دویست تا پیادِه سَرباز، هَفتاد تا سوارِه سَرباز و دویست تا نِیزه‌دارِ آمادِه هاکِنین تا اَمشو ساعتِ نِه قیصریه ای سِه بورِن.

²⁴ پولُسی سِه هَم یَتِه اَسب فَراهَم هاکِنین و وِرَم صحیح و سالم فِلیکْسِ فَرمونداری تَحویل هادین.»

²⁵ یَتِه نامِه هَم، هَینجوری بَنوِشتِه:

²⁶ «کْلودیوس لیسیاسی جا عالیجناب فِلیکْسِ فرمونداری سِه: سَلام،

²⁷ یَهودیِن هَین مَردی رِه بَیتِنِه، قَصد داشتِنِه وِرِه بَکوشِن، ولی مِن شی سَربازِنی هَمرا بوردِمِه وِرِه نِجات هادامِه، چون بِشنُس وِمِه رومی تابعیَتِ دارنِه.

²⁸ چون خوایسِمِه دِنِّم چیسِه وِرِه اِتِهام زَنِنِه، وِرِه وِشونی شورایی وَر بَوِردِمِه.

²⁹ بِفَهمِسِمِه وی اِتهام شِه وِشونی شریعتی مربوطِ و وی جُرم اَنّی نیِه گه وی سِزا مرگ یا حَبس ووئِه.

³⁰ اَزما وختی خَوَردار بَوِمِه وی علِیه دَسیسِه دَچینِه، دَرجا وِرِه شِمِه وَر بَرِسانیمِه. وی شاکیِنِ هَم دستور هادامِه تا شکایَتی گه ویجا دارِنِه رِه، شِمِه وَر بیارِن.»

³¹ هَینجوری، سَربازِن طِبقِ دستور، پولُسِ شوئینِه شی هَمرا آنتیپاتْریسی شهری سِه بَوِردِنِه.

³² فردای هون روز، پیادِه سَربازِن قلعه ای سِه دَگِرِسِنِه، فقط سوارِه سَربازِن وِرِه هَمراهی کِردِنِه.

³³ وختی سواره‌ سَربازِن قیصریه ای شهری سِه بَرِسینِه، هون نامِه رِه فَرمونداری تَحویل هادانِه و پولُسِ هَم وی وَر بیاردِنِه.

³⁴ فَرموندار نامِه رِه بَخونِسِه و پولُسی جا بَپُرسیِه کِجائیِه. وختی بِفَهمِسِه کیلیکیه ای مَنطَقه ای جائِه،

³⁵ وِرِه بُتِه: «وختی تی شاکیِن ایجِه بَرِسینِه، تی گَبِ گوش دِمِه.» اَزما دَستور هادا تا پولُسِ هیرودیسی کاخی دِلِه زیر نظر دارِن.