اعمال رَسولان 22 - کتاب مقدس به زبان مازندرانی - گویش غربی

¹ «اِی بِرارِن و اِی پیرِن، می دِفاعیِه گه اَلَن شِمِه عَرض رَسامِّه رِه گوش هادین.»

² وختی وِشون بِشنُسِنِه گه پولُس عبرانینی زِوونی هَمرا وِشونی سِه گَب زَنِّه، ویشتَر ساکت بَوِنِه. اَزما پولُس بُتِه:

³ «مِن یَهودی مَردیمِه و کیلیکیه ای تارسوسی شهری دِلِه دِنیا بیمومِه، ولی هَین شَهری دِلِه گَت بَوِمِه. شی اَجدادی شریعَتِ کامِلاََ، گامالائیلی دَسِ بِن یاد بَیتِمِه و خِدایی سِه غیرَت داشتِمِه، هَمونجوری گه شِما هَمه اَمرِز دارِنی.

⁴ مِن ’اَهلِ طریقَتِ‘ تا مرگ آزار بَرِسانیمِه و وِشونِه چی زَنا و چی مَردی هَماسِن وِمِه و زیندونی دِلِه دیم داوِمِه.

⁵ کاهنِ اعظم و دِشتِه یهودی اعضایی شورا بَتِنِنِه هَین کاری سِه شهادت هادِن، چون وِشونی جا نامِه‌هایی بِرارنی سِه گه دَمشقی دِلِه دَرِنِه بَیتِمِه تا اوجِه بورَم و هَین اَهلِ طریقَتِ هَماسِم و مِجازاتی سِه اورشَلیمی سِه بیارِم.

⁶ «ولی وختی راه دِلِه دَمشقِ نَزیک وونِسِمِه، ظِهری موقِه، ناخوَکی یَتِه گَتِه نور گه آدَمی چِشِ زووِه آسِمونی جا می دُور بَتابِسِه.

⁷ بِنه ای سَر دیم بَخاردمِه و یَتِه صدا بِشنُسِمِه گه مِنِه گِتِه: ”شائول! شائول! چه مِنِه عذاب دِنی؟“

⁸ «بَپُرسیمِه: ”خِداوندا، تو کی ای؟“ «جِواب هادا: ”مِن هَمون عیسای ناصریمِه گه تو وِرِه عذاب دِنی.“

⁹ می هَمراهِن نورِ بَئینِه، ولی وی صِدا گه می هَمرا گَب زووِه رِه، نِشنُسِنِه.

¹⁰ «بُتِمِه: ”خِداوندا، چی هاکِنِم؟“ «خِداوَند مِنِه بُتِه: ”پِرِس و دَمشقی سِه بور. اوجِه اونچی گه تو وِنِه اَنجام هادی رِه، تِرِه گِنِنِه.“

¹¹ از اوجِه گه مِن هون نوری رووشِنایی جا کور بَوِمِه، می هَمراهِن می دَسِ بَیتِنِه و دَمشقی سِه بیمومی.

¹² «دَمشقی دِلِه، یَتِه دیندارِ مَردی گه وی اسم حَنانیا وِه و شریعَتی اَنجام هادائَنی دِلِه غیرت داشتِه زندگی کِردِه. وی دِشتِه یهَودیِنی دِلِه خِش نوم وِه.

¹³ حَنانیا بیمو و می وَر هِرِسا و بُتِه: ”شائول بِرار! بینا بَواش!“ هَمون دَم، اَی می چِش سو دَکِتِه و وِرِه بَئیمِه.

¹⁴ «حَنانیا بُتِه: ”اَمِه پیرِنی خِدا تِرِه اِنتِخاب هاکِردِه تا وی ارادِه رِه دِنّی و هون صالِحِ بَوینی و وی دِهِنی جا گَبایی رِه بِشنُئی.

¹⁵ چون تو دِشتِه مَردِنی وَر، وی شاهِد وونی و اونچی گه بَئی و بِشنُسی رِه، شهادت دِنی.

¹⁶ اِسا چی ای اِنتظارِ کَشِنی؟ پِرِس و وی اِسمِ بَخون و غِسلِ تَعمید بَئیر. و شی گِناهِنی جا پاک بَواش!“

¹⁷ «وختی اورشَلیمی سِه دَگِرِسِمِه و دِ مَعبدی دِلِه دِعا کِردِمِه، خَلسِه ای دِلِه بوردِمِه

¹⁸ و خِداوَندِ بَئیمِه گه بُتِه: ”عَجله هاکِن و هر چی زودتر اورشلیمی جا بور، چون وِشون تی شهادتِ می خَوَری قَبول نَکِنِنِه.“

¹⁹ «مِن بُتِمِه: ”خِداوندا، وِشون شِه دِنِنِّه گه مِن عبادتگاهایی دِلِه شیوِمِه و اونانیگه تِرِه ایمون داشتِنِه رِه، زیندونی دِلِه دیم داوِمِه و زووِمِه.

²⁰ وختی تی شاهد استیفانی خونِ ریختِنِه، مِن شِه اوجِه اِسّاوِمِه، هون کاری هَمرا مِوافِق وِمِه، و وی قاتِلِنی لیواسی مِواظب وِمِه.“

²¹ «خِداوند مِنِه بُتِه: ”بور؛ چون مِن تِرِه دیرِشِرِ جاهایی سِه، غیرِیهودیِنی وَر رَسامِّه.“‌»

²² مَردِن تا ایجِه پولُسی گَبِ گوش داوِنِه، ولی وختی هَینِه بُتِه شی اَوازِ بِلَن هاکِردِنِه و داد بَزونِه: «زمینِ هَینجور آدَمی جا پاک هاکِنین، نِنِه اجازِه هادائَن هَینجور آدَم زینِّه بَمونِّه!»

²³ هون موقِه ای گه وِشون شولی هَمرا شی قَوارِه شی سَری وَر دِکِت داوِنِه و خاک بِلَن کِردِنِه،

²⁴ فَرموندِه دستور هادا پولُسِ قلعه ای سِه بَوِرِن، شَلّاق بَزِنَن و ویجا بازخواس هاکِنَن تا مَعلوم بَوو چیسِه مَردِن هَینجوری وی علِیه داد کَشِنِنِه.

²⁵ وختی گه پولُسِ شَلّاق بَزوئَنی سِه وَسِّنِه، پولُس اَفسَری گه اوجِه اِسّاوِه رِه، بُتِه: «قانون شِمارِ هَین اِجازه رِه دِنِه یَنَفَر گه رومی تابعیَتِ دارنِه رِه بی هَینگِه مِحاکِمِه هاکِنین شَلاق بَزِنین؟»

²⁶ هون اَفسَر وختی هَینِه بِشنُسِه، فرموندِه ای وَر بوردِه و وِرِه بُتِه: «تو دِ چی کِنّی؟ چون هَین مَردی رومی تابعیتِ دارنِه!»

²⁷ فَرموندِه پولُسی وَر بیمو و ویجا بَپُرسیِه: «بُو هارشِم، تو رومی تابعیتِ دارنی؟» پولُس جِواب هادا: «اَرِه، دارمِه.»

²⁸ اَزما فرموندِه بُتِه: «مِن هَین تابعیَتی بِدَس بیاردَنی سِه، خِیلی بَها هادامِه.» پولُس وی جِواب بُتِه: «ولی مِن هَین تابِعیتی هَمرا دِنیا بیمومِه!»

²⁹ وِشون گه قَرار وِه ویجا بازخواس هاکِنِن، دَرجا شِرِه کِنار بَکِشینِه. فرموندِه هَم گه بِفَهمِس وِه یَتِه رومی رِه هَماسیِه، بَتِرسیِه.

پولُس یَهودی شورایی وَر

³⁰ فَردای هون روز، چون فرموندِه خوایسِه دقّتی هَمرا بِفَهمِه گه چه یَهودیِن پولُسِ مِتَّهم هاکِردِنِه، وِرِه زیندونی جا آزاد هاکِردِه و دستور هادا گَت گَتِه کاهنِن و دِشتِه یَهودی شورایی اعضا جَم بَوون. اَزما، پولُسِ جِر بیاردِه تا وِشونی پِش حاضِر بَوو.