اعمال رَسولان 18 - کتاب مقدس به زبان مازندرانی - گویش غربی

پولُس قُرِنتُسی دِلِه

¹ بعد از هین، پولُس آتنی جا قُرِنتُسی شهری سِه بوردِه.

² اوجِه یَتِه یَهودی مَردی ای هَمرا، گه وی اِسم آکیلا وِه آشنا بَوِه. آکیلا پونتوسی مَنطقِه ای جا وِه. وی شی زَنا پْریسکیلایی هَمرا جدیداً ایتالیایی جا بیمو وِه، چون رومی امپراطور کْلودیوس دستور هادا وِه گه دِشتِه یَهودیِن رومی جا بورِن. پولُس وِشونی بَئینی سِه بوردِه،

³ و هَینی خاطری گه وی هَم وِشونی تَرا چادِر دوتِه، وشونی وَر بَمونِسِه و مَشغولِ کار بَوِه.

⁴ پولُس هر مِقدَّسِ شَنبه عبادتگاهی دِلِه یَهودیِن و یونانیِنی هَمرا بَحث کِردِه و تَقَلّا کِردِه وِشونِه قانع هاکِنِه.

⁵ وختی سیلاس و تیموتائوس مَقدونیه ای جا بیمونِه، پولُس دِشتِه شی وَختِ خِدایی کَلامی سِه بِشت وِه، یَهودیِنِ شهادت داوِه گه مسیحِ موعود هَمون عیسائِه.

⁶ ولی وختی یَهودیِن پولُسی هَمرا مِخالفت هاکِردِنِه و عیسی رِه ناسِزا بُتِنِه، پولُس هون شهری گَرد و خاکِ شی لیواسی جا هِلاکِنیِه و وِشونِه بُتِه: «شِمِه خون شِه شِمِه گِردَن دَوو! مِن تقصیر کار نیمِه. بعد از هین، غیرِیهودیِنی وَر شومِه.»

⁷ اَزما عبادتگاهی جا دیرگا بوردِه و تیتوس یوستوسی خِنِه بوردِه گه خِداپَرسِ آدَم وِه و عبادتگاهی وَر خِنِه داشتِه.

⁸ ولی عبادتگاهی رئیس کْریسپوس دِشتِه شی خِنِواده ای هَمرا خِداوَندِ ایمون بیاردِنِه. هَمینجورم قُرِنتُسی اَهالی ای جا خِیلیا وختی پِیغِمِ بِشنُسِنِه، ایمون بیاردِنِه و غِسلِ تَعمید بَیتِنِه.

⁹ یَتِه شُو خِداوَند رویایی دِلِه پولُسِ بُتِه: «نَتِرس! گَب بَزِن و ساکت نَواش!

¹⁰ چون مِن تی هَمرامِه و هیچکی نَتِنِّه شی دَسِ دِراز هاکِنِه تا تِرِه صدمِه بَزِنِه، چون هَین شهری دِلِه خِیلی آدَم دارمِه.»

¹¹ پَس، پولُس یَه سال و نیم اوجِه بَمونِسِه و خِدایی کلامِ وِشونِه تعلیم هادا.

¹² ولی هون موقِه گه گالیو، اَخائیه ای مَنطقِه ای حاکِم وِه، یَهودیِن هَمدَس بَوِنِه پولُسی سَر بَریختِنِه و وِرِه مَحکَمِه ای سِه بیاردِنِه.

¹³ وِشون بُتِنِه: «هَین آدَم مَردِنِ قانع کِنِّه خِدارِه یَتِه رَوِشی هَمرا گه خلافِ شَریعَتِ پَرَسِش هاکِنِن.»

¹⁴ اَزما وختی پولُس خوایسِه گَب بَزِنِه، گالیو یَهودیِنِ بُتِه: «اِی یَهودیِن اگه جُرم یا بَدجور جِنایَتی دَر کار وِه، مِن دلیلی داشتِمِه شِمِه شکایتِ گوش هادَم.

¹⁵ ولی از اوجِه گه شِمِه مِرافِه کلمات و اِسمها و شِمِه شریعَتی مَسئَلِه هَسِّه، پَس شِما شِه هونِه بَررِسی هاکِنین. مِن نَخوایمِه هَینجور چیایی خَوَری داوَری هاکِنِم.»

¹⁶ پَس وِشونِه داوَری ای تَختی پِشی جا دیرگا هاکِردِه.

¹⁷ دِشتِ وِشون عبادتگاهی رئیس سوسْتِنِسی سَر بَریختِنِه و وِرِه حاکمی تَختی پِش بَزونِه. ولی گالیو هیچکدیم از هَینِنِه اَهمیّت نَدا.

پولُس اَنطاکیه ای سِه گِردِنِه

¹⁸ پولُس بعد از هینگِه خِیلی زِمِن قُرِنتُسی دِلِه بَمونِسِه، بِرارِنی هَمرا خِدافظی هاکِردِه و دَریایی راهی جا سوریه ای سِه بوردِه. هَین سَفری دِلِه، پْریسکیلا و آکیلا هَم وی هَمرا دَوِنِه. پولُس کِنخْریه ای دِلِه شی کَلِّه رِه بَتاشیِه، چون هَینجور نَذر هاکِرد وِه.

¹⁹ وختی اَفِسُسی شهری سِه بَرِسینِه، پولُس شی هَمسَفَرِنی جا سیوا بَوِه و شِه عبادتگاهی سِه بوردِه و یَهودیِنی هَمرا بَحث هاکِردِه.

²⁰ هون موقِه گه وِشون پولُسی جا بَخوایسِنِه یَذِرِه ویشتَر وِشونی هَمرا بَمونِّه، پولُس قَبول نَکِردِه.

²¹ و وِشونی هَمرا خِدافظی هاکِردِه، بُتِه: «اگه خِدا بَخواد اَی هَم شِمِه وَر اِمِه.» اَزما یَتِه کَشتی سِوار بَوِه و اَفِسُسی جا بوردِه.

²² وختی قیصریه ای دِلِه کَشتی ای جا جِر بیمو، بوردِه و کلیسایی مَردِنِ مِلاقات هاکِردِه، اَزما اَنطاکیه ای سِه راه دَکِتِه.

²³ چن وَخت اوجِه بَمونِسِه و اَی سَفری سِه راهی بَوِه، وی دِشتِه غَلاطیه و فْریجیه ای مَنطقِه ای گِذر به گِذرِ گِرِسِه و دِشتِه شاگِردِنِ تَقویت کِردِه.

آپولس اَفِسُسی شهری دِلِه تعلیم دِنِه

²⁴ هون روزا، یَتِه یهودی گه وی اِسم آپولُس و اسکِندریه ای جا وِه اَفِسُسی سِه بیمو. وی سِخَنرانی هاکِردَنی دِلِه اِسّا وِه و مِقَدّسِ نِوِشتِه هارِه خِیلی دِنِّسِه؛

²⁵ خِداوندی راهی دِلِه آموزش بَئیت وِه و روحی حرارتی هَمرا گَب زووِه و دِرِسی ای هَمرا عیسایی خَوَری تعلیم داوِه، هر چَن فقط یحیایی تَعمیدی جا خَوَر داشتِه.

²⁶ آپولُس جِرأتی هَمرا یَهودینی عبادَتگاهی دِلِه گَب بَزوئَنِ شِرو هاکِردِه. ولی وختی پْریسکیلا و آکیلا وی گَبِ بِشنُسِنِه، وِرِه یَتِه گوشِه بَکشینِه و خِدایی راه رِه دِرستَر وِرِه هَم هادانِه.

²⁷ وختی آپولُس قصد هاکِردِه اَخائیه ای مَنطقِه ای سِه بورِه، بِرارِن وِرِه تَشویق هاکِردِنِه و شاگِردِنی سِه بَنوِشتِنِه وِرِه گَرمی ای هَمرا قَبول هاکِنِن. وختی آپولُس اوجِه بَرِسیِه، اونانیگه فیضی جا ایمون بیارد وِنِه رِه، خِیلی کِمَک هاکِردِه.

²⁸ چون هَمه ای چِشی وَر یهودیِنی هَمرا بَحث کِردِه، و وِشونی عَقایدِ قِوّتی هَمرا رَد کِردِه، و مِقَدّسِ نِوشتِه هایی هَمرا ثابت کِردِه گه مَسیحِ موعود هَمون عیسائِه.