اعمال رَسولان 17 - کتاب مقدس به زبان مازندرانی - گویش غربی

پولس و سیلاس تِسالونیکی ای دِلِه

¹ پولُس و سیلاس آمْفیپولیس و آپولونیایی شهرایی جا بِگذِشتِنِه و تِسالونیکی ای شهری سِه بیمونِه، گه اوجِه یَهودیِنی عبادتگاه وِه.

² پولُس طِبق شی عادت عبادتگاهی سِه بوردِه، وی سِه تا مِقَدّسِ شَنبِه وِشونی هَمرا مِقَدَّسِ نِوشتِه هایی جا بَحث کِردِه

³ و توضی داوِه و دَلیل اُردِه گه وِسِه مَسیح عذاب بَکِشِه و مِردِگونی جا زینِّه بَوو. وی گِتِه: «هَین عیسی گه وِرِه شِمِارِ اِعلام کِمِّه، هَمون مَسیحِ موعودِ.»

⁴ وِشونی جا بعضیا قانع بَوِنِه گه پولُس و سیلاسِ مِلحَق بَوون. و هَمینجور یَتِه گَتِه گروه خِداپَرَسِ یونانیِن و سَرشِناسِ زَناکِنِنی جا یَتِخِیلی، وِشونِه مِلحَق بَوِنِه.

⁵ ولی یَهودیِن حَسودی هاکِردِنِه و چَن تا شریرِ آدَمِنِ بازاری جا جَم هاکِردِنِه، یَه دَسِّه لات و لوت راه اِنگتنِه و شَهری دِلِه بَلوا هاکِردِنِه. وِشون پولُس و سیلاسی بَنگیتَنی سِه یاسونی خِنِه ای سِه هِجوم بَوِردِنِه تا وِشونِه جَماعتی دِلِه ای جا دیرگا بیارِن.

⁶ ولی وختی وِشونِه نَنگیتِنِه، یاسون و بِرارِنی جا بعضی دییَرِ شَهری حاکِمنی وَر بَکِشانینِه و داد بَزونِه گه «هَین مَرداکِنِن گه دِشتِه دِنیارِه زیر و رو هاکِردِنِه، اِسا ایجِه بیمونِه

⁷ و یاسون وِشونِه شی خِنِه بَوِردِه. هَینِن هَمه رومی پادشاه قیصری دَستوراتی جا سَرپیچی کِنِنِه و مِدَعینِه گه یَت دییَر پادشاه، به اِسم عیسی دَرِه.»

⁸ وختی مَردِن و شَهری حاکِمِن هَینِه بِشنُسِنِه، پَریشون بَوِنِه.

⁹ اَزما یاسون و بَقیِه ای جا ضِمانت بَیتِه، وِشونِه آزاد هاکِردِنِه.

پولُس و سیلاس بیریه ای شهری دِلِه

¹⁰ بِرارِن شُوئینِه دَرجا پولُس و سیلاسِ بیریه ای شهری سِه راهی هاکِردِنِه. وختی وِشون اوجِه بَرِسینِه، یَهودیِنی عبادتگاهی دِلِه بوردِنِه.

¹¹ هَین یَهودیِن هون یَهودیِنی جا گه تِسالونیکی ای دِلِه دَوِنِه نَجیب‌تر وِنِه، وِشون اِشتیاقی هَمرا پِیغِمِ قَبول هاکِردِنِه و هر روز مِقَدّسِ نِوِشتِه هارِه خونِسِنِه تا بَوینِن پولُس و سیلاسی گَب خِدایی کلامی تَرا هَسِّه یا نا.

¹² هَینجوری، یهودیِنی جا یَتِخیلی، و سَرشِناسِ یونانی زَناکِنِن و مَرداکِنِنی جا هَم یَتِخیلی ایمون بیاردِنِه.

¹³ ولی وختی تِسالونیکی ای یَهودیِن بِفَهمِسِنِه گه پولُس بیریه ای دِلِه هَم خِدایی کَلام اعلام کِنِّه، اوجِه بوردِنِه و مَردِنِ اَنتریک هاکِردِنِه و شهرِ آشوب بَکِشینِه.

¹⁴ بِرارِن دَرجا پولُسِ دریالُویی سَمت راهی هاکِردِنِه، ولی سیلاس و تیموتائوس بیریه ای دِلِه بَمونِسِنِه.

¹⁵ اونانیگه پولُسِ هَمراهی کِردِنِه وِرِه تا آتِن بیاردِنِه. بعد از هَینگه پولُسی جا سیلاس و تیموتائوسی سِه دستور بَیتِنِه گه هر‌ چی تِن تَر پولُسِ مِلحَق بَوون، اوجِه ای جا بوردِنِه.

پولُس آتِنی دِلِه

¹⁶ هون موقِه گه پولُس آتِنی دِلِه هون دِتایی اِنتظارِ کَشیِه، از هَینگِه وینِسِه شَهر بِتیشونی جا پِرِ، وی روحِ غِرصِه بَیتِه.

¹⁷ هَینِسه، عبادتگاهی دِلِه یهودیِن و خِداپَرَس یونانیِن، و هَم هر روز شَهری میدونی دِلِه هون مَردِنی هَمرا هَم گه اوجِه دَوِنِه بَحث کِردِه.

¹⁸ رَواقی و اِپیکوری ای فیلسوفِنی جا بعضیا هَم وی هَمرا بَحث کِردِنِه. بعضی از وِشون گِتِنِه: «هَین مِفت گَب زَن چی خواینِه بُئِه؟» بَقیِه گِتِنِه: «اِنگار غریبِ خِدایِنی تبلیغِ کِنِّه.» چون پولُس، عیسی و مِردگونی زینِّه بَووئَنی خَوَری وِشونی سِه گَب زووِه.

¹⁹ اَزما پولُسِ بَیتِنِه، ’آریوپاگوسی‘ دِلِه گه یَتِه کِچیکِ کِتی آتِنی دِلِه وِه و مَردِن اوجِه جَم وونِسِنِه بَوِردِنِه و وِرِه بُتِنِه: «بَتِمّی دِنّیم هَین جَدیدِ تَعلیمی گه تو دِنی، چیِه؟»

²⁰ تی گَب اَمِه گوش عجیب اِنِه. پَس خوایمی وی معنی رِه دِنّیم.»

²¹ دِشتِه آتِنیِن و غَریبه ایشون گه اوجِه زندگی کِردِنِه، کاری ناشتِنِه بِجِز هَینگه شی وَختِ تازِه عقایدی گب بَزوئَنی سَر بِلِن.

²² پَس پولُس ’آریوپاگوسی‘ میِن هِرِسا و بُتِه: «اِی آتِنی مَرداکِنِن، مِن شِمارِ هر لحاظی جا خِیلی دیندار بَئیمِه.

²³ چون وختی گه شَهری دِلِه گِرِسِمِه و اونچی گه شِما پَرَسِش کِردِنی رِه بَئیمِه، یَتِه قِروونگاه بَنگیتِمِه گه اونی سَر بَنوِشت بَوِه وِه: ”تَقدیم به خِدایی گه حَلا بِشناسی نَوِه“. اِسا مِن اونچی گه شِما اونِه نِشناسِنِنی و پَرَسِش کِنِنی رِه شِمارِ اِعلام کِمِّه.

²⁴ «خِدایی گه دِنیا و هر اونچی وی دِلِه دَرِه رِه خَلق هاکِردِه، آسِمون و زَمینی صاحابِ و معبدایی گه آدَمی ای دَسی جا بَسات بَوِه ای دِلِه زندگی نَکِنِّه.

²⁵ آدَمی ای دَس نَتِنِّه وِرِه خِدمتی هاکِنِه، جوریگه گِنی یَچی ای مِحتاج ووئِه، چون شِه ویگِه دِشتِه آدَمِنِ زندگی و نَفَس و هر چی دییَرِ بِبَخشیِه.

²⁶ وی دِشتِه مَردِنِ یَتِه آدَمی جا بِوجود بیاردِه تا دِشتِه زَمینی دِلِه زندگی هاکِنِن؛ و وِشونی سِه تعیین بَوِه وَخت و وِشونی زندگی ای مَحلی حَد و حِدودِ تعیین هاکِردِه.

²⁷ تا مَردِن خِدایی دِمال بَگِردِن و شاید وی دِمال بورِن، وِرِه بَنگیرِن، هر چَن خِدا اَما هیچ کِدیمی جا دور نیِه.

²⁸ چون وی دِلِئِه گه زندگی و حرکت و هَستی دارمی؛ هَمونجور گه شِه شِمِه شاعِرِنی جا بعضیا هَم بُتِنِه گه حَیقَتاً وی نَسلی جانِه.

²⁹ «اِسا گه خِدایی نَسلی جامی، خِب نیِه هَینجور فِکر هاکِنیم گه خِدا ووئَن هِتی طِلا یا نِقره یا سَنگی تَرائِه، یَتِه مِجَسَمِه ای تَرا گه آدَمی ای هنر و خیالاتی هَمرا بَتاشی بَوِه وو.

³⁰ قدیم، خِدا هَینجور نادونی ای جا چِش پوشی کِردِه. ولی اَلَن دِشتِه مَردِن، اِسا هر جا گه دَرِنِه رِه دستور دِنِه گه توبِه هاکِنِن.

³¹ چون وی یَتِه روزِ تعیین هاکِردِه گه اونی دِلِه هون آدَمی طریق گه مِعیَن هاکِردِه، دِنیارِه عِدالتی هَمرا داوری کِنِّه، و وِرِه مِردِگونی جا زینِّه هاکِردَنی هَمرا، هَمه رِه هَین جَریانی جا مِطمئِن هاکِردِه.»

³² وختی وِشون مِردِگونی زینِّه بَووئَنی خَوَری بِشنُسِنِه، بعضیا پوسخَن بَزونِه، ولی بَقیِه بُتِنِه: «اَما اَی هَم تیجا هَین جَریانی خَوَری اِشنُمی.»

³³ پس پولُس وِشونی جَمعی جا بوردِه.

³⁴ ولی چَن نَفر وِرِه مِلحَق بَوِنِه و ایمون بیاردِنِه. و وِشونی میِن دیونیسیوس گه ’آریوپاگوسی ‘ دَسِه ای جا وِه، یَتِه زَنا به اِسم داماریس، و چَن نَفر دییَر هَم، هون دَسِه ای جا وِنِه.