اعمال رَسولان 16 - کتاب مقدس به زبان مازندرانی - گویش غربی

تیموتائوس، پولُس و سیلاسِ هَمراهی کِنِّه

¹ پولُس اوَّل دِربِه و اَزما لِستْره ای شهری سِه بوردِه. اوجِه یَتِه شاگرد گه وی اِسم تیموتائوس وِه زندگی کِردِه گه وی مار یهودی و ایموندار وِه، ولی وی پیر یونانی وِه.

² لِستْره و قونیه ای دِلِه ای بِرارِن وی خِبی رِه گِتِنِه.

³ پولُس چون خوایسِه وی سَفری دِلِه وِرِه هَمراهی هاکِنِه، یَهودینی خاطری گه هون مَنطقه ای دِلِه زندِگی کِردِنِه، وِرِه خَتنِه هاکِردِه، چون هَمه دِنِسِنِه وی پیر یونانیِه.

⁴ وِشون وختی یَتِه شَهری جا یَت دییَر شَهر شیوِنِه، هون قانونایی گه رَسولِن و مَشایخ اورشلیمی دِلِه بُت وِنِه رِه، مَردِنِ گِتِنِه تا اونانِه رعایت هاکِنِن.

⁵ پَس، کلیسا ایشون ایمونی دِله قِوَّت گیتِنِه و هر روز وِشونی تعداد ویشتَر وونِسِه.

پولُس مقدونیه ای مَردی ای رویارِه وینِّه

⁶ اَزما، وِشون فْریجیه و غَلاطیه ای مَنطقِه ای سرتاسَرِ پِی بَزونِه، چون روح القُدُس وِشونِه از هَینگه کَلامِ آسیایی مَنطقِه ای دِلِه بَرِسانَن مَنع هاکِرد وِه.

⁷ وختی میسیه ای مَنطقِه ای دِلِه بَرِسینِه، تَقَلّا هاکِردِنِه بیطینیه ای سِه بورِن، ولی عیسایی روح وِشونِه اِجازه نَدا.

⁸ هَینِسه، میسیه ای جا رَد بَوِنِه و تْروآسی شهری سِه بوردِنِه.

⁹ شُویی موقِه، پولُس رویایی دِلِه بَئیِه گه یَتِه مَقدونیه ای مَردی وی پِش اِسّا و وِرِه التماس کِنِّه «مَقدونیه ای سِه بِرو و اَمارِه کِمک هاکِن.»

¹⁰ پولُس وختی هَین رویارِه بَئیِه، دَرجا مَقدونیه ای سِه بوردِمی، چون مِطمئِن بَوِمی خِدا اَمارِه داد هاکِردِه تا اِنجیلی خَوَرِخِشِ وِشونِه هادیم.

لیدیه، ایمون اُرنِه

¹¹ پَس، کَشتی ای هَمرا یَکراست تروآسی شهری جا ساموتْراکی ای جزیره ای سِه بوردِمی، و فردای هون روز نیاپولیسی سِه بَرِسیمی.

¹² از اوجِه فیلیپی شهری سِه بوردِمی گه یَتِه از شهرایی وِه گه رومیِن اوجِه زندگی کِردِنِه و مَقدونیه ای خاکی دِلِه دَوِه. و چَن روز هون شَهری دِلِه بَمونِسمی.

¹³ مِقَدّسِ شنبه ای روز شَهری جا دیرگا بیمومی و یَتِه روخِنِه ای وَر بوردِمی، هَین اِنتظاری هَمرا گه اوجِه یَتِجا دِعایی سِه دَرِه. پس هِنیشتِمی و زَناکِنِنی گه اوجِه جَم بَوِه وِنِه ای هَمرا گَب بَزومی.

¹⁴ وِشونی میِن یَتِه خِداپَرسِ زَنا تیاتیرایی شَهری جا دَوِه گه اَمِه گَبِ گوش داوِه. وی اِسم لیدیه وِه و اَرغونی پارچه گه خِیلی گِرون وِه رِه روتِه. خِداوَند وی دِلِ وا هاکِردِه تا پولُسی پِیغِمِ گوش هادِه.

¹⁵ وختی لیدیه شی خِنِوادِه ای هَمرا غِسلِ تَعمید بَیتِه، خِیلی اِصرار هاکِردِه و اَمارِه بُتِه: «اگه باوَر دارِنی گه خِداوَندِ ایمون بیاردِمِه، بیئین و می خِنِه ای دِلِه بَمونین.» سَرآخَر وی خواسِّه ای تَسلیم بَوِمی.

پولُس و سیلاس زیندونی دِلِه

¹⁶ یَکَش هون محلی گه هَمِش دِعا کِردِمی شیوِمی، یَتِه کِلفَتِ وَر بَخاردِمی گه غیبگویی روحِ داشتِه و فالگیری ای هَمرا شی اَربابِنِ خِیلی سود رَسانیِه.

¹⁷ وی اَما و پولُسی دِمال ایمو و دادی هَمرا گِتِه: «هَین مَرداکِنِن، خِدای مِتعالی خادِمِنِه و نِجاتی راه رِه شِمارِ اعلام کِنِنِه.»

¹⁸ وی خِیلی روزا هَینجور کِردِه. سَرآخَر پولُسی صَبر سَر بیمو و دَگِرِسِه هون روحیشونِه بُتِه: «به اِسمِ عیسای مَسیح ترِه دَستور دِمِه هَین کیجایی جا دیرگا بیئِی!» هَمون دَم، روحیشون ویجا دیرگا بیمو.

¹⁹ ولی هون کِلفَتی اَربابِن وختی بَئینِه وِشونی کسب و کاسِبی به باد بوردِه، پولُس و سیلاسِ بَیتِنِه و وِشونِه سَکَش هاکِردِنِه و شهری میدونی دِلِه رَئیسِنی وَر بَوِردِنِه.

²⁰ پَس وِشونِه قاضیِنی وَر بیاردِنِه و بُتِنِه: «هَین مَرداکِنِن یَهودینِه و اَمِه شَهرِ آشوب بَکِشینِه.

²¹ رَسم و رُسومایی رِه تبلیغ کِنِنِه گه اونانی قَبول هاکِردَن و بِجا بیاردَن اَما رومیِنی سِه جایِز نیِه.»

²² مَردِن پولُس و سیلاسِ هِجوم بیاردِنِه و وِشونی هَمرا هَمدَس بَوِنِه. و قاضیِن دستور هادانِه وِشونی لیواسِ در بیارِن و وِشونِه چُو بَزِنِن.

²³ وختی وِشونِه یَتِخِیلی چُو بَزونِه، وِشونِه زیندونی دِلِه دیم بَدانِه و زیندونبونِه دستور هادانِه خِیلی وِشونی مِواظِب ووئِه.

²⁴ وختی زیندونبون هَین دستورِ بَیتِه، وِشونِه دِلِه دیمی زیندونی دِلِه بَوِردِه و وِشونی لینگِ دار کینگه ای کَش زَنجیلی هَمرا دَوِسِّه.

²⁵ نِصفِ شُو، پولُس و سیلاس دِ دِعا کِردِنِه و سِرودی هَمرا خِدارِه پَرَسِش کِردِنِه و بَقیِه زیندونیِن هَم وِشونِه گوش داوِنِه

²⁶ گه یَدَفِه یَتِه گَتِه زِلزِلِه دَکِتِه، جوریگه زیندونی پِی لَرزه دَکِتِه و دَرجا زیندونی دَریشون وا بَوِه و دِشتِه زَنجیلیشون وا بَوِنِه.

²⁷ زیندونبون ویشار بَوِه، وختی زیندونی وا بَوِه دَرِ بَئیِه، شَمشیر بَکشیِه تا شِرِه بَکوشِه، چون خیال کِردِه زیندونی ایشون فِرار هاکِردِنِه.

²⁸ ولی پولُس دادی هَمرا، بُتِه: «شِرِه صَدمِه نَزِن گه اَما هَمه ایجِه دَرمی!»

²⁹ زیندونبون لَمپائیشونِه بَخوایسِه و هُولی هَمرا زیندونی دِلِه بوردِه و هَمونجور گه ترسی جا لَرزِسِه پولُس و سیلاسی لینگ دَکِتِه.

³⁰ اَزما، وِشونِه دیرگا بیاردِه و بَپُرسیِه: «آقایون، چی هاکِنِم تا نِجات بَیرم؟»

³¹ وِشون جِواب هادانِه: «عیسی مَسیحِ خِداوندِ ایمون بیار گه تو و تی خِنِوادِه نِجات گیرِنی.»

³² اَزما خِداوندی کَلامِ ویسِه و دِشتِه اونانیگه وی خِنِه ای دِلِه دَوِنِه ای سِه، بُتِه.

³³ هَمون موقِه از شُو، زیندونبون وِشونِه دیرگا بیاردِه، وِشونی زَخمِ بَشوردِه، و دَرجا وی و دِشتِه وی خِنِوادِه تَعمید بَیتِنِه.

³⁴ وی وِشونِه شی خِنِه بَوِردِه و وِشونی سِه سِفره پَهن هاکِردِه. وی و دِشتِه وی خِنِوادِه هَینی جا گه خِدارِه ایمون بیارد وِنِه خِیلی خِشال وِنِه.

³⁵ ولی وختی روز بَوِه، قاضیِن مأمورِنی زیندونبونی وَر بَرِسانینِه، بُتِنِه: «هون مَرداکِنِنِ آزاد هاکِن!»

³⁶ زیندونبون پولُسِ هَین پیغِمی جا خَوَردار هاکِردِه و بُتِه: «قاضیِن دَستور هادانِه گه شِمارِ آزاد هاکِنِم. پس اَلَن دیرگا بیئین و بورین بِسلامت.»

³⁷ ولی پولُس وی جِواب بُتِه: «اَما گه رومی تابعیتِ دارمی رِه بی مِحاکمِه و هَمه ای چِشی وَر چُو بَزونِه و زیندونی دِلِه دیم بدانِه. اِسا خواینِنِه یَواشکی اَمارِه آزاد هاکِنِن؟ اصلاََ! بِل شِه بیئِن و اَمارِه هَیجِه ای جا دیرگا بیارِن.»

³⁸ مأمورِن هَینِه قاضینِ بُتِنِه، وِشون وختی بِشنُسِنِه پولُس و سیلاس رومی تابعیتِ دارِنِه، خِیلی بَتِرسینِه

³⁹ پس بیمونِه و وِشونی جا عذرخوائی هاکِردِنِه و تا زیندونی دیرگا وَر وِشونِه هَمراهی هاکِردِنِه، خواهِش هاکِردِنِه گه شَهری جا بورِن.

⁴⁰ وِشون بعد از هَینگه زیندونی جا دیرگا بوردِنِه، لیدیه ای خِنِه ای سِه بوردِنِه. اوجِه بِرارِنِ بَئینِه و وِشونِه تَشویق هاکِردِنِه. اَزما اوجِه ای جا بوردِنِه.