اعمال رَسولان 13 - کتاب مقدس به زبان مازندرانی - گویش غربی

برنابا و شائولی سفر اِنجیلی پِیغِمی سِه

¹ اَنطاکیِه ای کلیسایی دِلِه مَلِّمِن و پیغمبَرِن دَوِنِه: بَرنابا، شَمعون مَعروف به نیجِر، لوکیوسِ قیرَوانی، مَنائِن گه هیرودیسِ حاکمی ناتَنی بِرار وِه، و شائول.

² موقِه ای گه وِشون روزِه وِنِه و دِ خِدارِه پَرَسِش کِردِنِه، روح القُدُس بُتِه: «بَرنابا و شائولِ هون کاری سِه گه مِن وِشونِه دعوت هاکِردِمِه، سیوا هاکِنین.»

³ اَزما، بعد از روزِه و دِعا، هون دِتایی سَر دَس بِشتِنِه و وِشونِه سَفری سِه راهی هاکِردِنِه.

برنابا و شائول قبرسی دِلِه

⁴ هَینجوری، هون دِتا گه روح القُدُسی طرفی جا بَرِسانی بَوِه وِنِه، سِلوکیه ای بَندری سِه بوردِنِه و اوجِه ای جا کَشتی ای هَمرا قبرِسی سِه بَرِسینِه.

⁵ وختی سَلامیسی شَهری دِلِه بوردِنِه، یَهودیِنی عبادتگاهایی دِلِه خِدایی کَلامِ اعلام هاکِردِنِه. اونان ”یوحَنای“ معروف به ”مَرقُسِ“ شی هَمرا بَوِرد وِنِه تا وِشونِه کِمک هاکِنِه.

⁶ وِشون دِشتِه جزیره رِه بَگِرِسِنِه تا پافوسی شَهری سِه بَرِسینِه. اوجِه یَتِه یَهودی مَردی گه وی اِسم باریِشوع وِه رِه بَئینِه گه دِردِرو پیغَمبَر و جادوگر وِه.

⁷ وی رومی فرموندار ’سِرگیوس پولُسی‘ رَفِق وِه. فرموندار گه عاقِلِ مَردی وِه، بَرنابا و شائولِ شی کَفا بَخونِسِه، چون خوایسِه خِدایی کَلامِ بِشنُئِه.

⁸ ولی هون جادوگر گه وی اِسمی معنی عالِم وِه وِشونی هَمرا مِخالِفَت هاکِردِه و تَقلّا کِردِه نِلِه فَرموندار ایمون بیارِه.

⁹ ولی شائول، گه وِرِه پولُس هَم گِتِنِه، روح القُدُسی جا پِر بَوِه، هون مَردی ای چِشی دِلِه رِه هارشیِه و بُتِه:

¹⁰ «تو اِی اِبلیسی وَچِه، تو اِی دِشتِه خِبیهایی دِشمن، اِی گه مَکر و فَریبی جا پِری، هَینی جا گه خِداوندی راسِ راها رِه وَل هاکِنی دَس نَکِشِنی؟

¹¹ دِن گه خِداوندی دَس تی بَزوئَنی سِه تی سَری وَر دَرِه. اِسا کور وونی و تا چَن وَخت آفتابِ نَوینی.» دَرجا، وی چِش تیرِه و تار بَوِه، شی دور چَرخ گیتِه و ینَفَری دِمال گِرِسِه گه وی دَسِ بَیرِه و راهِ وِرِه هَم هادِه.

¹² وختی فرموندار هَین جریانِ بَئیِه، ایمون بیاردِه، چون تَعلیمی گه خِداوندی خَوَری داوِنِه ای جا بِهت هاکِرد وِه.

پولُس و بَرنابا اَنطاکیه ای دِلِه

¹³ پولس و وی هَمراهِن دَریایی راهی جا، از پافوس پِرجِه ای سِه بوردِنِه گه پامفیلیِه ای مَنطقِه ای دِلِه وِه. ولی اوجِه یوحنای معروف به مَرقُس وِشونی جا سیوا بَوِه و اورشَلیمی سِه دَگِرِسِه.

¹⁴ ولی وِشون پِرجِه ای جا رَد بَوِنِه و اَنطاکیه پیسیدیه ای مَنطقِه ای سِه بَرِسینِه. مِقَدّسِ شَنبِه روز، عبادتگاهی دِلِه بیمونِه و هِنیشتِنِه.

¹⁵ بعد از هَینگه تورات و پِیغمبَرِنی نِوِشتِه رِه بَخونِسِنِه، عبادتگاهی رَئیسِن وِشونی سِه پِیغِم بَرسانینِه و بُتِنِه: «بِرارِن، اگه گَبی دارِنی گه مَردِنِ تشویق کِنِّه، بُئین.»

¹⁶ پولُس هِرِسا و دَسی هَمرا اِشارِه هاکِردِه، بُتِه: «اِی یَهودی مَردِن، و شِما اِی خِداتَرسِن، گوش هادین!

¹⁷ هَین یَهودی قومی خدا، اَمِه پیرِنِ اِنتخاب هاکِردِه و اَمِه قومِ هون موقِه ای گه وِشون مصری مِلکی دِلِه غریب وِنِه رِه سَربِلَن هاکِردِه و قِوَّتی هَمرا وِشونِه هون مِلکی جا دیرگا بیاردِه،

¹⁸ و نزیکِ چِل سال صحرایی دِلِه وِشونِه تَحمِل هاکِردِه.

¹⁹ وی بعد از هَینگه هَفتا قوم گه کَنعانی دِلِه دَوِنِه رِه از بِین بَوِردِه، اونِنی مِلکِ وِشونِه اِرثیِه هادا.

²⁰ هَین جریان حِدودِ چار صد و پَنجاه سال طول بَکشیِه. «بعد از هون، خِدا تا سَموئیلِ پِیغَمبری دورِه، داوَرِنِ وِشونِه هادا.

²¹ اَزما وِشون یَتِه پادشاه بَخوایسِنِه و خِدا، شائول، قِیسی ریکا، بنیامینی قَبیلِه ای جارِه وِشونِه هادا، گه چِل سال حِکومت هاکِردِه.

²² بعد از هَینگه شائول بَرکِنار بَوِه، داوودِ اِنتخاب هاکِردِه تا وِشونی پادشاه بَوو و وی خَوَری شهادت هادا و بُتِه: ”مِن داوود یِسی ای ریکارِه، مَردی بَئیمِه گه خِیلی می دِل نیشِنِه، وی دِشتِه می خواسِّه رِه بِجا اُرنِه.“

²³ «خِدا طِبق شی وَعدِه، هَین مَردی ای نَسلی جا، یَهودی قومی سِه یَتِه نِجات دهندِه یَعنی عیسی رِه بیاردِه.

²⁴ پِش از هَینگه عیسی بیئِه، یحیی دِشتِه یَهودی مَردِنی سِه توبه ای غِسلِ تَعمیدِ اعلام کِردِه.

²⁵ وختی یحیی شی خِدمَتِ تُوم کِردِه، بُتِه: ”مِنِه کی دِنِّنی؟ مِن وی نیمِه، بَلگی وی بعد از مِن اِنِه و مِن حتّی لایق نیمِه وی کُوشی بَنِّ وا هاکِنِم.“

²⁶ «اِی بِرارِن، اِی ابراهیمی وَچیلِه ای نَسل، و اِی خِداتَرسِنی گه شِمِه میِن دَرِنِه! هَین نِجاتی پِیغِم اَمِسِه بَرِسانی بَوِه.

²⁷ چون اورشلیمی مَردِن و وِشونی گَت گَتِ عیسی رِه نِشناسینِه، و پِیغَمبَرِنی بُتِه ایشونِه گه هر مِقَدّسِ شَنبِه وِشونی سِه بَخونِس وونِسِه رِه نِفَهمِسِنِه. وِشون وی مَحکوم هاکِردنی هَمرا پیغَمبَرِنی بُتِه ایشونِه اَنجام بَرِسانینِه.

²⁸ با هَینگه وِشون هیچ دَلیلی وی بَکوشتنی سِه نَنگیتِنِه، پیلاتُسی جا بَخوایسِنِه وِرِه اعدام هاکِنِه.

²⁹ و وختی دِشتِه اونچی گه وی خَوَری بَنوِشت بَوِه وِه رِه، اَنجام هادانِه، وِرِه صَلیبی جا جِر بیاردِنِه، مقَبره ای دِلِه بِشتِنِه.

³⁰ ولی خِدا وِرِه مِردِگونی جا زینِّه هاکِردِه.

³¹ خِیلی روزا عیسی شِرِه اونانیسِه گه وی هَمرا جلیلی جا اورشلیمی سِه بیمو وِنِه ظاهر هاکِردِه، گه اَلَنم وِشون قومی سِه وی شاهِدِنِنِه.

³² «اِسا اَما هَین خَوَرخِشِ شِمارِ دِمی گه خِدا اونچی گه اَمِه پیرِنِ وَعدِه هادا وِه رِه،

³³ عیسایی زینِّه هاکِردَنی هَمرا، اَمِسِه گه وی وَچیلِمی وَفا هاکِردِه. هَمونجور گه دِوِّمین مَزموری دِلِه بَنوِشت بَوِه: «”تو می ریکائی؛ اَمرِز، مِن تِرِه مولود هاکِردِمِه.“

³⁴ «خِدا وِرِه مِردگونی جا زینِّه هاکِردِه تا دِ فسادی سِه نَگِردِه، خِدا هَینجور بُتِه: «‌”مِن مِقَدَّس و مِطمئنِ بَرکات گه داوودِ وعدِه هادا بَوِه، شِمارِ دِمِه.“

³⁵ و هَمینجورَم یَت دییَر مَزموری دِلِه گِنِه: «تو نِلنی تی مِقَدَّس، فِسادِ بَوینِه.“

³⁶ «داوود بعد از اونگه خِدایی اِراده ای هَمرا شی دورِه ای مَردِنِ خِدمت هاکِردِه، بَمِردِه و شی اَجدادِ مِلحق بَوِه، و فِسادِ بَئیِه.

³⁷ ولی اونیگه خِدا وِرِه زینِّه هاکِردِه، فِسادِ نَئیِه.

³⁸ «پَس، اِی بِرارِن، دِنّین گه هَین مَردی ای طریق گِناهِنی آمِرزِش شِمارِ اعلام وونِه.

³⁹ اِسا هر کی عیسی رِه ایمون بیارِه، وی توسِط صالِح بِشمارِس وونِه، هر اونچی ای دِلِه گه نَتِنِّسِنی موسایی شَریعَتی تَوسِط صالِح بِشمارِس بَووئین.

⁴⁰ پس مِواظِب ووئین پِیغَمبَرِنی هَین بَنوِشت شِمِه سَر نیِه گه گِنِه:

⁴¹ «”هارشین، اِی کسایی گه مِزاغ چینِنی، بِهت هاکِنین و نابود بَووئین، چون شِمِه روزگاری دِلِه کاری کِمِّه، گه هر چی اونِه شِمِسِه تعریف هاکِنِن هیچ وَخت باوَر نَکِنِنی.“

⁴² وختی پولُس و بَرنابا عِبادَتگاهی جا دیرگا شیوِنِه، مَردِن وِشونی جا خواهِش هاکِردِنِه گه شَنبِه بعدی هَم هَین جَریانی خَوَری وِشونی سِه گَب بَزِنِن.

⁴³ بعد از هَینگه جَماعَت عِبادَتگاهی جا بوردِنِه، خِیلی از یَهودیِن و هون خداپَرَسِ مَردِن گه یَهودی بَوِه وِنِه، پولُس و بَرنابایی دِمال راه دَکِتِنِه. پولُس و برنابا هَین دَسِه ای هَمرا گَب بَزونِه و وِشونِه تشویق کِردِنِه گه خِدایی فیضی دِلِه اِدامِه هادِن.

⁴⁴ شَنبِه بَعدی، حِدوداََ، دِشتِه شَهری مَردِن جَم بَوِنِه تا خِداوندی کَلامِ بِشنُئِن.

⁴⁵ ولی وختی یَهودیِن جَماعتیشونِه بَئینِه، حَسودی ای جا پِر بَوِنِه و بی حِرمتی ای هَمرا هر چی پولُس گِتِه رِه مِخالِفَت کِردِنِه.

⁴⁶ اَزما پولُس و بَرنابا جِرأتی هَمرا بُتِنِه: «لازِمِ وِه خِدایی کَلام پِش از هَمه شِمِسِه بُتِه بَوو. ولی وختی اونِه رَد هاکِردِنی و شِرِه اَبَدی زندگی ای لایِق نَئونِسِنی، پَس اَلَن اَما غیرِیَهودیِنی سَمت شومی.

⁴⁷ چون خِداوَند اَمارِه هَینجور بُتِه گه: «”مِن تِرِه غیرِ یَهودیِنی سِه نُور بَساتِمِه، تا نِجاتِ دِنیایی چار سوک بَرِسانی.“

⁴⁸ وختی غیرِیهودیِن هَینِه بِشنُسِنِه، خِشال بَوِنِه و خِداوندی کَلامِ حِرمَت بِشتِنِه، و اونانیگه اَبَدی زندگی ای سِه اِنتخاب بَوِه وِنِه، ایمون بیاردِنِه.

⁴⁹ هَینجوری خِداوندی کَلام دِشتِه هون مَنطقه ای دِلِه دَپیتِه.

⁵⁰ ولی یَهودیِن، متِعَصِب و سَرشِناسِ زَناکِنِن و شهری مَرداکِنِن گه رَهبر وِنِه رِه اَنتِریک هاکِردِنِه و وِشون پولُس و بَرنابا رِه اَذیت و آزار هاکِردِنِه. پس پولُس و بَرنابا رِه هون مَنطقه ای جا دیرگا هاکِردِنِه.

⁵¹ وِشون هَم هون شَهری خاکِ شی لینگی جا هِلاکِنّینِه و قونیه ای شَهری سِه بوردِنِه.

⁵² شاگِردِن روح القُدُس و خِشالی ای جا پِر وِنِه.