اعمال رَسولان 12 - کتاب مقدس به زبان مازندرانی - گویش غربی

یَعقوبی بَکوشتَن

¹ هَمون موقِه ها هیرودیسِ پادشاه چَن نَفَرِ گه کلیسایی اعضا وِنِه رِه شِرو به اذیَت و آزار هاکِردِه.

² وی یعقوب یوحنایی بِرارِ شَمشیری هَمرا بَکوشتِه.

³ و وختی بَئیِه گه یَهودیِن هَین کاری جا خِشال بَوِنِه، پِطرسِ هَم هَماسیِه. هَین کار فطیری عیدی موقِه اِتِّفاق دَکِتِه.

⁴ هیرودیس بعد از هَینگه پِطرُسِ هَماسیِه، وِرِه زیندونی دِلِه دیم بَدا و چار تا دَسِه ی چارتایی سَربازِ وی نِگَهوونی ای سِه بِشتِه. و خوایسِه بعد از پِسَخی عید، وِرِه مَردِنی وَر مِحاکِمِه هاکِنِه.

⁵ پَس پِطرُسِ زیندونی دِلِه داشتِنِه، ولی کلیسا یَکسَرِه ویسِه خِدایی وَر دِعا کِردِه.

⁶ یَه شُو، پِش از هون روزی گه هیرودیس قصد داشتِه پِطرُسِ مِحاکِمه هاکِنِه، وی دِتا زَنجیلی هَمرا دَوِس وِه و دِتا سَربازی میِن بَفِت وِه و نِگَهوونِن هَم زیندونی دَری وَر کِشیک داوِنِه.

⁷ ناخوَکی خِداوندی یَتِه فِرِشتِه ظاهِر بَوِه و یَتِه نور زیندونی دِلِه بَتابِسِه. فِرشتِه پِطرسی پَلی رِه بَزو و وِرِه ویشار هاکِردِه، بُتِه: «تِن واش پِرِس!» دَرجا زنجیلیشون وی دَسایی جا وا بَوِه و بِنی ای سَر دیم بَخاردِه.

⁸ فِرشتِه وِرِه بُتِه: «شی کَمرِ دَوِن و شی کُوشِ دَکِن.» پِطرُس هَم هَینجور هاکِردِه. اَزما فِرشتِه وِرِه بُتِه: «شی قَوارِه شی دوش بِل و می دِمال بِرو.»

⁹ پِطرُسَم وی دِمالسَر زیندونی جا دیرگا بوردِه. پِطرس باوَر نَکِردِه اونچی فِرِشته کِنِّه، واقِعیِه، بَلگی فِکر کِردِه رویا وینِّه.

¹⁰ وِشون اَوَّلین و دِوّمین نِگَهوونِنی جا بِگذِشتِنِه و آهَنی دَروازه ای وَر بَرِسینِه گه شَهری سَمت وا وونِسِه. دَروازِه خِد به خِد وِشونی سِه وا بَوِه. وِشون دیرگا بوردِنِه و هَمونجور گه دِ راه شیوِنِه یَدَفِه فِرِشتِه غِیب بَوِه.

¹¹ پِطرس وختی سَریساب بَوِه، بُتِه: «اِسا دِ مِطمَئنمِه گه خِداوند شی فِرِشتِه رِه بَرِسانیِه و مِنِه هیرودیسی چَنگ و هون اذیت و آزاری گه یَهودی قوم وی توقع رِه داشتِنِه نِجات هادا.»

¹² وختی پِطرُس هَینِه بِفَهمِسِه، مریم، یوحنای مَعروف به مَرقُسی ماری خِنِه بوردِه. اوجِه خِیلی مَردِن جَم بَوِه وِنِه و دِ دِعا کِردِنِه.

¹³ وختی پِطرُس خِنِه ای دَرِ بَزو، یَتِه کِلفَت گه وی اِسم رُودا وِه بیمو تا دَرِ پِه هاکِنِه.

¹⁴ هون کِلفت وختی پِطرسی اَوازِ بِشناسیِه، خِشالی ای جا، هَینی عوض گه دَرِ پِه هاکِنِه، خِنِه ای دِلِه بوردِه و هَمه رِه بُتِه: «پِطرُس دَری پِشت اِسّا!»

¹⁵ هون کِلفَتِ بُتِنِه: «خِل بَوِه ای.» ولی وختی هون کِلفَتی اصرارِ بَئینِه، بُتِنِه: «لابِد وی فِرِشتِئِه.»

¹⁶ هَمون موقِه، پِطرس یَکسَرِه دَر زووِه. سَرآخَر، وختی دَرِ پِه هاکِردِنِه و وِرِه بَئینِه خِیلی تَجِّب هاکِردِنِه.

¹⁷ پِطرس شی دَسی هَمرا اِشارِه هاکِردِه گه ساکت ووئِن، و تعریف هاکِردِه گه چِتی خِداوند وِرِه زیندونی جا دیرگا بیاردِه. اَزما بُتِه: «یعقوب و بَقیِه بِرارِنِ هَین جَریانی جا باخَوَر هاکِنین.» اَزما یَجا دییَر بوردِه.

¹⁸ وختی صِب بَوِه، سَربازِنی میِن بَلبَشو بَوِه، چون نَئونِسِنِه پِطرسی سَر چی بیمو.

¹⁹ هیرودیس دَستور هادا هَمه جا پِطرُسی دِمال بَگِردِن. و وختی وِرِه نَنگیتِنِه سَربازِنی جا بازجویی هاکِردِه و وِشونی بَکوشتَنی حِکمِ هادا. اَزما پِطرس یَهودیِه ای جا قیصَریِه ای شهری سِه بوردِه و چَن وَخت اوجِه بَمونِسِه.

هیرودیسی بَمِردَن

²⁰ هیرودیس صور و صیدونی شهری مَردِنی هَمرا غیظ هاکِرد وِه. وِشون بْلاستوس، پادشاهی دَرباری خِدمتکارِ راضی هاکِردِنِه تا هیرودیسی وَر بیئِن تا آشتی هاکِنِن، چون وِشونی خِراک و مایَحتاج هیرودیسی مِلکی جا فَراهَم وونِسِه.

²¹ یَتِه مِعیَنِ روز، هیرودیس شی شاهانِه لیواس دَکِردِه، تَختی سَر هِنیشتِه و جَماعتی سِه سِخنرانی هاکِردِه.

²² مَردِن داد زووِنِه: «هَین یَتِه از خِدایِنی اَوازِ، نا آدَمی ای اَواز!»

²³ دَرجا، خِداوندی یَتِه فِرِشتِه هیرودیسِ بَزو، هَینِسه گه خِدارِه جَلال نَداوِه. اَزما کِرمیشون وی تَنِ بَخاردِنِه و وی بَمِردِه.

²⁴ ولی خِدایی کَلام ویشتَر و ویشتَر پِش شیِه و پَخش وونِسِه.

²⁵ وختی بَرنابا و شائول شی مأموریتِ تُوم هاکِردِنِه، اورشلیمی جا دَگِرِسِنِه و یوحنای مَعروف به مَرقُسِ هَم شی هَمرا بیاردِنِه.