اعمال رَسولان 11 - کتاب مقدس به زبان مازندرانی - گویش غربی

پِطرس کلیسارِه گِزارِش دِنِه

¹ رَسولِن و بِرارِن، دِشتِه یَهودیِه ای مَنطقِه ای دِلِه بِشنُسِنِه گه غیرِیَهودیِن هَم خِدایی کَلامِ قَبول هاکِردِنِه.

² پَس وختی پِطرُس اورشَلیمی شهری سِه دَگِرِسِه، هون گروهی گه خَتنِه بَووئَنی طرفدار وِنِه ایراد بَیتِنِه و بُتِنِه:

³ «تو خَتنِه نَوِه ایشونی خِنِه ای دِلِه بوردی و وِشونی هَمرا غذا بَخاردی.»

⁴ پِطرُس دِشتِه جَریانِ از اوَّل تا آخر وِشونی سِه تَعریف هاکِردِه، بُتِه:

⁵ «مِن یافایی شهری دِلِه دِ دِعا کِردِمِه گه خَلسِه ای دِلِه یَتِه رویا بَئیمِه یَچی هِتی گَتِ سِفرِه ای تَرا گه چار گوشی جا آویزون وِه میسِه آسِمونی جا جِر بیمو.

⁶ وختی خِب هارشیمِه، حِیوونِن و وَحشی جاندارِن و خَزندِگون و پَرَندِگونِ اونی سَر بَئیمِه.

⁷ اَزما یَتِه اَواز می گوش بَرِسیِه گه گِتِه: ”پِطرُس، پِرِس، سَر بَورین و بَخار.“

⁸ «ولی مِن جِواب هادامِه: اصلاََ، خِداوندا، چون مِن هیچ وَخت حَروم و نَجِسِ چیرِه تِک نَزومِه.“

⁹ «دِوّمین کَش آسِمونی جا صِدا بیمو گه ”اونچی خِدا پاک هاکِردِه رِه تو نَجِس نِشمار.“

¹⁰ و هَین دَستور سِه کَش تِکرار بَوِه؛ اَزما دِشتِه هون چیا آسِمونی سَمت لُو بوردِه.

¹¹ «هَمون موقِه، سِه نَفَر گه قِیصَریِه ای شهری جا می وَر بَرِسانی بَوِه وِنِه، هون خِنِه ای دِلِه گه دَوِمِه بَرِسینِه.

¹² خِدایی روح مِنِه بُتِه وِشونی هَمرا بورِم و فَرق نِلِم. هَین شِش تا بِرار هَم می هَمرا بیمونِه و اَما هون مَردی ای خِنِه بوردِمی.

¹³ وی اَمِسِه تَعریف هاکِردِه گه چِتی شی خِنِه ای دِلِه یَتِه فِرِشتِه بَئیِه گه وِرِه بُتِه: ”چَن نَفَرِ یافایی سِه بَرِسان و شَمعونِ مَعروف به پِطرُسِ هَیجِه بیار.

¹⁴ وی تیسِه یَتِه پِیغِم اُرنِه گه اونی خاطری تو و تی خِنِوادِه نِجات گیرِنی.“

¹⁵ «وختی گَب بَزوئَنِ شِرو هاکِردِمِه، روح القُدُس وِشونی سِه بیمو، دِرِس هَمونجور گه اوَّل اَمِسِه بیمو وِه.

¹⁶ اَزما خِداوندی گَبِ شی یاد بیاردِمِه گه بُت وِه: ”یحیی اُوئی هَمرا غِسلِ تعمید داوِه ولی شِما روح القُدُسی هَمرا تعمید گیرِنی.“

¹⁷ پس اگه خِدا وِشونَم هَمون هَدیه ای رِه هادا گه اَمارِه هادا هون موقِه گه اَما عیسای مَسیحِ خداوندِ ایمون بیاردِمی، من کی وِمِه گه بَتِنَّم خِدایی کاری دَمِ بَیرِم؟»

¹⁸ وختی وِشون هَین گَبارِه بِشنُسِنِه، ساکِت بَوِنِه و خِدارِه جلال هادانِه و بُتِنِه: «پس خِدا غیرِیَهودیِنَم فِرصت هادا تا وِشون هَم شی گِناهِنی جا توبه هاکِنَن و اَبَدی زِندگی رِه بِدَس بیارِن!»

اَنطاکیه ای کِلیسا

¹⁹ هون ایموندارِنی گه بعد از اِستیفانی اذیت و آزار پَخش و پَلا بَوِه وِنِه، تا فینیقیه و قبرس و اَنطاکیه ای سَمت سَفر هاکِردِنِه. وِشون فقط خِدایی کلامِ یَهودیِنِ اِعلام کِردِنِه و وَس.

²⁰ ولی وِشونی میِن چَن نَفر قِبرس و قیرَوانی آدَمِنی جا دَوِنِه، وِشون وختی گه اَنطاکیه ای سِه بَرِسینِه یونانیِنی هَمرا هَم گَب بَزونِه و عیسای خِداوندی خَوَرِخِشِ وِشونِه هادانِه.

²¹ خِداوندی دَس هَم وِشونی هَمرا دَوِه و خِیلیا ایمون بیاردِنِه و خِداوَندِ مِلحَق بَوِنِه.

²² وختی هَین خَوَر اورشَلیمی کلیسارِه بَرِسیِه، بَرنابارِه اَنطاکیِه ای سِه بَرِسانینِه.

²³ وختی بَرنابا اوجِه بَرِسیِه و خِدایی فیضِ بَئیِه، خِشال بَوِه و هَمه رِه تَشویق هاکِردِه تا دِشتِه دِلی هَمرا خِداوَندِ وفادار ووئِن،

²⁴ چون بَرنابا خِبِ مَردی وِه، وی ایمون و روح القُدُسی جا پِر وِه. هَینِسه یَتِه گَتِ جَماعت خِداوندِ ایمون بیاردِنِه.

²⁵ پس بَرنابا، تارسوسی شهری سِه بوردِه تا شائولِ بَنگیرِه.

²⁶ و وختی وِرِه بَنگیتِه، وِرِه اَنطاکیه ای سِه بیاردِه. وِشون اوجِه یَه سال تِموم کلیسایی آدَمِنی هَمرا جَم وونِسِنِه و یَتِه گَتِ جَماعتِ تَعلیم داوِنِه. اَنطاکیه ای دِلِه وِه گه اَوَّلین کَش عیسایی شاگِردِنِ ’مَسیحی‘ بُتِنِه.

²⁷ هون روزا چَن تا پِیغَمبر اورشَلیمی جا اَنطاکیه ای سِه بیمونِه.

²⁸ یَتِه ای اِسم گه آگابوس وِه، پِرِسا و خِدایی روحی هَمرا پِشگویی هاکِردِه گه دِشتِه دِنیایی دِلِه بَدجور قَحطی اِنِه. هَین قَحطی کلودیوسی امپراطوری حِکومَتی دورِه اِتِّفاق دَکِتِه.

²⁹ پَس شاگِردِن تصمیم بَیتِنِه هر کِدیم شی تَوانی اَنّا، یَهودیِه ای بِرارِنی سِه کِمَک بَرِسانِن.

³⁰ پَس هَینجور هاکِردِنِه و هون پولایی گه جَم هاکِرد وِنِه رِه بَرنابا و شائولِ هادانِه تا مَشایِخی دَس بَرِسانِن.