سوّم یوحنا 1 - کتاب مقدس به زبان مازندرانی - گویش غربی

¹ شیخی جا، عزیزِ گایوسِ گه مِن وِرِه ’حَیقَتی‘ دِلِه دوس دارمِه.

² اِی عزیز، می دِعا هَینِه گه هَمه چی شِمِسِه خِب پِش بورِه و سَلامت ووئین، و هَمینجور تی جان هَم سلامتی ای دِلِه دَوو.

³ چون خِشال بَوِمِه هون موقِه گه بِرارِن بیمونِه و تی وفاداری گه حَیقتی دِلِه زندگی کِنِّی رِه گِواهی هادانِه.

⁴ هیچی مِنِه هَینی جا ویشتَر خِشال نَکِنِّه گه بِشنُئَم می وَچیلِه ’حَیقَتی‘ دِلِه زندگی کِنِنِه.

⁵ اِی عزیز، تو دِشتِه کارایی دِلِه بِرارِنی سِه، شی اَمانتِ هَم دِنی، بِخصوص هَینگه تی وَر غَریبِنِه.

⁶ وِشون هَم کلیسایی وَر تی مِحبتِ گِواهی هادانِه؛ پَس خِب کاری کِنّی اگه وِشونِه اونجور گه خِدایی شَأنِ، سفری سِه راهی هاکِنی.

⁷ چون وِشون هون اِسمی خاطری سَفر هاکِردِنِه و غیرِیهودیِنی جا هیچ کِمکی نَیتِنِه.

⁸ پَس اَما وِنِه هَینجور آدَمِنی تَرا رِه کِمَک هاکِنیم تا بَتِنّیم وِشونی هَمرا حَیقَتی سِه هَمکار ووئیم.

⁹ مِن یَچی کلیسایی سِه بَنوِشتِمِه، ولی دیوتْرِفیس گه دوس دارنِه شِرِه اوِّل دِنِّه، اَمِه اِقتدارِ اَهمیَّت نَدِنِه.

¹⁰ پَس اگه مِن بیئِم، کارایی گه وی کِنِّه رِه رسیدگی کِمِّه، چون غَرَضی هَمرا اَمِه علِیه گِنِه، هَینِ هَم قانع نَوِه، بِرارِنِ هَم قَبول نَکِنِّه؛ و وی بِرارِنی هَم گه خواینِنِه وِشونِه قَبول هاکِنِنی دَمِ گیرنِه و کلیسایی جا دیرگا کِنِّه.

¹¹ اِی عزیز، بَدی رِه شی سَرمَخش نَکِن، بَلگی خِبی ای جا سَرمَخش بَئیر، اونیگه خِبِ کار کِنِّه خِدایی جائِه، ولی اونیگه بَدِ کار کِنِّه خِدارِه نَئیِه.

¹² هَمه دیمیتریوسی خَوَری خِبِ گِواهی دِنِنِه، حتّی خِدِ حَیقت. اَما هَم هَینجور گِواهی دِمی و دِنّی گه اَمِه گِواهی راسِ.

سَرآخر

¹³ خِیلی چیا داشتِمِه تِنِه بَنویسِم، ولی نَخوایمِه قَلَم و مِرَکّبی هَمرا ووئِه.

¹⁴ اِمید دارمِه خِیلی زود تِرِه بَوینِم و رُو دَر رُو گَب بَزِنیم.

¹⁵ سَلامت ووئین! رَفِقِن تِنِه سَلام رَسانِنِه. تَک تَکِ رَفِقِنِ به اِسم سَلام بَرِسان.