دوم تیموتائوس 3 - کتاب مقدس به زبان مازندرانی - گویش غربی

آخرین روزا

¹ ولی هَینِه دِن گه آخرین روزایی دِلِه، سَختِ روزگارِی اِنِه.

² چون مَردِن، خِد شیفتِه، پولدوس، مغرور، مِتِکبر، ناسزاگو، شی پیر و ماری جا اطاعت نَکِنِنِه، ناشِکر، ناپاک،

³ بی‌عاطفه، کینه ای، تِهمت زَن، بی‌بندوبار، وحشی، خِبی ای دِشمَن،

⁴ خیانتکار، بی مِلاحِظِه، غرور وِشونِه بَیتِه. گه عیاشی رِه خِدایی جا ویشتَر دوس دارِنِه

⁵ ظاهراً دیندارِنِه، ولی اونی قِوّتِ هَشا کِنِنِه. هینجور آدمایی جا دوری هاکِنین.

⁶ چون وِشونی میِن کَسایی دَرِنِه گه مَردِنی خِنِه ای دِلِه راه پیدا کِنِنِه، بی عَقلِ زَناکِنِنِ اَسیر کِنِنِه گه شی گِناهِنی باری بِن دِلا بَوِنِه و جورواجورِ هوا و هَوَس، وِشونِه هر طرف کَشانِّه،

⁷ هَین زَناکِنِن هَمِش تعلیم گیرِنِه، ولی هیچ وخت نَتِنِّنِه حَیقَتِ بِشناسِن.

⁸ هَمونجور گه یَنّیس و یَمْبْریس موسایی هَمرا مِخالفت هاکِردِنِه، هَین مَرداکِنِن هَم گه وِشونی فِکرا خرابِ و وِشونی ایمون رَدِّ، حَیقتی هَمرا مِخالفت کِنِنِه.

⁹ ولی وِشون به جایی نَرسِنِنِه. چون وِشونی نادونی دِشتِه مَردنی سِه معلوم وونِه، هَمونجور گه هون دِتایی نادونی هَم بَرملا بَوِه.

دِشتِه مِقدّسِ نِوشتِه ها خِدایی الهامِ

¹⁰ ولی تو، می تعلیم و می رفتار و می هدف و می ایمون و می صَبر و می مِحبت و می طاقتِ از نَزیک شاهد وِه ای

¹¹ و هون رنج و اذیت و آزاری گه اَنطاکیه و قونیه و لِستْره ای شهرایی دِلِه می سَر بیمو، هون رنج و اذیت و آزاریه گه طاقت بیاردِمِه؛ ولی خِداوَند دِشتِه هَین چیایی جا مِنِه نِجات هادا.

¹² راساسی، دِشتِه اونانیگه بَخوان مَسیحْ عیسایی دِلِه دینداری ای هَمرا زندگی هاکِنن، عذاب کَشِنِنِه؛

¹³ ولی شرورِ آدمن و شیّادِن بَدی ای دِلِه بَدتر وونِنِه، گول زَنِنِه و گول خارِنِه.

¹⁴ ولی تو، اونچی ای دِلِه گه یاد بَیتی و اونِه ایمون بیاردی پابرجا واش، چون دِنّی اونانِه کِنیشونی جا یاد بَیتی،

¹⁵ و چِتی از وَچِه وونی مِقدِّسِ نوشته هارِه دِنِّسِی، گه بَتِنِّه تِره حکمت هادِه و ایمونی طریقی جا گه مَسیحْ عیسایی دِلِه دَرِه، نِجاتی سِه بَرِسِه.

¹⁶ دِشتِه مِقَدّسِ نوشتِه ها خِدایی الهامِ، و تعلیم و سَراکو و اِصلاح و تربیتی سِه، صالحی ای دِلِه فایدِه دارنِه،

¹⁷ تا مَردِ خِدا کامِل بَوو، و هر خِبِ کاری سِه آمادِه.