دوّم تِسالونیکیان 3 - کتاب مقدس به زبان مازندرانی - گویش غربیاَمِنِه دِعا هاکِنین 1 سَرآخر، اِی بِرارِن، اَمِنِه دِعا هاکِنین تا خِداوندی کَلام تِن پِش بورِه و وی احترامِ دارِن، هَمونجور گه شِمه میِن هینجور بَوِه. 2 تا شَرورِ آدمن و گِناهکارنی جا آزاد بَووئیم، چون هَمه ایمون نارِنِه. 3 ولی خِداوَند وفادارِ؛ وی شِمارِ پایدار کِنِّه و هون شریری پِش شِمِه جا مِحافظت کِنِّه. 4 اَما خِداوندی دِلِه شِمارِ اطمینان دارمی، اونچی گه شِمارِ حِکم کِمّی رِه، بِجا اُرِنی و اَنجام دِنِنی. 5 خِداوند شِمِه دِلِ خِدایی مِحبت و مسیحی پایداری ای هَمرا هدایت هاکِنِه. هِشدار، تنبلِ آدمنی سِه 6 اِی بِرارِن، اَمِه خِداوند عیسی مَسیحی اِسمی هَمرا شِمارِ حِکم کِمّی گه هر بِراری جا گه تنبلی کِنِّه و طبقِ اونچی گه اَمِه جا بَیتِنی رفتار نَکِنِّه، دوری هاکِنین. 7 چون شِما شِه دِنِنی گه چِتی وِنِه اَمِه جا سَرمَخش بَیرین. چون هون موقِه ای گه اَما شِمِه هَمرا دَوِمی، تنبل نَوِمی 8 و هیچکسی نونِ مِفتی نَخاردِمی، بلگی سختی و زحمتی هَمرا شُو و روز کار هاکِردِمی، تا هیچکِدیم از شِمایی سَربار نَووئیم. 9 نا هَینی خاطری گه اَما هَین حقِّ نارمی، بَلگی شیجا یَتِه نِمونِه سَرمَخشی سِه شِمِنِه بِلیم. 10 چون حتّی هون موقِه گه شِمِه هَمرا دَوِمی، هَینِه شِمارِ حِکم هاکِردمی گه «اگه هر کی نَخواینِه کار هاکِنِه، نون هَم نَخارِه.» 11 چون اَما اِشنُمی گه شِمِه میِن بَعضیا تنبلی کِنِنِه. هَینِن کار نَکِنِنِه، بَلگی فِضولی کِنِنِه. 12 اِسا، خِداوندْ عیسی مَسیحی اِسمی دِلِه هینجور آدمِنِ حِکم کِمّی و وِشونِه تشویق کِمّی گه آروم و قرار بَیرِن، و شی روزی رِه دَر بیارِن. 13 ولی شِما اِی بِرارِن، خِبی هاکِردَنی جا خَسِّه نَووئین. 14 اگه یَنَفَر اونچی گه هَین نامِه ای دِلِه گه اَما گِمی رِه اِطاعت نَکِنِه، وِرِه نِشون هاکِنین و وی هَمرا رفت و آمد نَکِنین تا خِجالت بَکِشِه. 15 ولی وِرِه دِشمَن نَئُنین، بلگی هِتی یَتِه بِراری تَرا وِرِه هِشدار هادین. دِعای خیر 16 اِسا، خِداوندِ صِلح و سلامتی، شِه، هر موقِه و هر وضعی دِلِه شِمارِ صِلح و سلامتی دِنِه. خِداوَند شِما هَمه ای هَمرا دَوو. 17 مِن، پولُس، شی دَسی هَمرا هَین سلامِ نِویسِمِه. هَین دِشتِه می نامه‌هایی نِشونِئه. مِن هَینجور نِویسِمِه. 18 اَمِه خِداوند عیسی مَسیحی فیض شِما هَمه ای هَمرا دَوو. |
@ 2024 Korpu Company