دوّم تِسالونیکیان 2 - کتاب مقدس به زبان مازندرانی - گویش غربی

بی دینِ مردی

¹ اِسا، اِی بِرارِن، اَمِه خِداوند عیسی مَسیحی دَگِرسنی خَوَری و اَمِه جَم بَووئَن وی وَر، شِمِه جا خواهِش کِمِّی

² هیچی شِمِه فِکرِ خراب نَکِنِه و پریشون نَووئین، چی یَتِه روح، چی یَتِه گَبی طریق، چی یَتِه نامِه گه اِنگار اَمِه جا ووئه گه گِنِه، گه خِداوندی دَگِرسنی روز بَرِسیه.

³ و نِلین هیچکی، هیچ جوری شِمارِ گول بَزِنِه. چون اون روز نینِه، مَگِه هَینگه اَوَّل مَردِن خِدایی علیِه پِرِسَن و اون بی دینِ مَردی گه هلاکَتی ریکائه، ظهور هاکِنِه.

⁴ وی هر چی ای هَمرا گه خِدا بَخونِس وونِه یا پَرَسش وونِه مخالِفَت کِنِّه، و شِرِه وِشونی جا سَرتَر دِنِّه، جوریگه خِدایی معبدی دِلِه نیشنِه و اعلام کِنِّه شِه خِدائه.

⁵ یَعنی شِمِه یاد دَنیِه وختی گه شِمِه هَمرا دَوِمِه هَین چیارِه شِمارِ گِتِمِه؟

⁶ شِما دِنِنی گه اَلَن چی وی دَمِ گیرنِه، تا وی، شی وختی موقِه بیِه.

⁷ چون هَین بی‌دینی ای راز همین اَلَن هَم دِ کار کِنِّه، فقط تا موقِه ای گه، اونیگه تا اَلَن وی دَمِ گیرنِه، از بِین بورِه.

⁸ هون موقِه، هون بی‌دینِ مَردی اِنِه، گه خِداوند عیسی شی دَم نَفسی هَمرا وِرِه هلاک کِنِّه و شی پِر شکوهِ بیموئنی هَمرا وِرِه نابود کِنِّه.

⁹ هون بی دینِ مَردی ای بیموئن، شیطانی کاری طریق هَسِّه، دِشتِه قِوّت و دِردِرو نِشونِه ها و معجزاتی هَمرا، و عجیبِ چیایی گه گِمراه کِنِّه

¹⁰ و دِشتِه شرورِ حیلِه هایی هَمرا اونانیگه هلاکتی راهی دِلِه دَرِنِه، چون وِشون نَخوایسِنِه حَیقتِ دوس دارِن تا نِجات بَیرِن.

¹¹ پَس خِدا وِشونِه یَتِه سختِ فریبی دِلِه گرفتار کِنِّه، جوریگه وِشون اونچی گه دِروئِه رِه باور کِنِنِه

¹² تا دِشتِه اونانیگه حَیقتِ باور نَکِردِنِه و هر چی گه نادِرِس وِه ای جا کیف هاکِردنِه، مَحکوم بَوون.

قائِم هِرِسین

¹³ ولی اِی بِرارِن گه خِدایی عزیزِنی، اَما وِنِه همش خِدارِه شِمِه خاطری شِکر هاکِنیم، چون خِدا شِمارِ نوبری تَرا اِنتِخاب هاکِردِه گه نجِات بَیرین. اون تقدیسی طریق گه خِدایی روحی هَمرا اَنجام وونِه، و حَیقتِ ایمون داشتنی هَمرا.

¹⁴ هینجور وِه گه وی شِمارِ اَمِه اِنجیلی طریق بَخونِسِه، تا اَمِه خِداوند عیسی مَسیحی جلال شِمِه نصیب بَوو.

¹⁵ پَس، اِی بِرارِن، قائِم هِرِسین و هون تعلیمایی گه اَمِه جا یاد بَیتِنی رِه بَچِسبین، چی اَمِه گَبایی جا چی اَمِه نامِه هایی هَمرا.

¹⁶ اِسا، شِه اَمِه خِداوند عیسی مَسیح، و اَمِه پیر، خِدا گه اَمارِه دوس داشتِه و فیضی طریق، اَمارِه اَبَدی تسلّی و خِبِ اِمید هادا،

¹⁷ شِمِه دِلِ تسلّی هادِه و هر خِبِ کار و گِفتاری دِلِه، پابرجا هاکِنِه.