دوّم تِسالونیکیان 1 - کتاب مقدس به زبان مازندرانی - گویش غربی

¹ پولُس و سیلاس و تیموتائوسی طرفی جا، تِسالونیکی ای شهری کلیسایی سِه گه اَمِه پیر، خِدا، و خداوندْ عیسی مسیحی دِلِه دَرِنِه:

² فیض و صِلح و سلامتی، اَمِه پیر، خِدا، و خِداوندْ عیسی مَسیحی طرفی جا شِمِنِه بیِه.

شِکر هاکِردن

³ اِی بِرارِن، اَما همش وِنِه خِدارِه شِمِه خاطری شِکر هاکِنیم، دِرِس هَم هَینِه، چون شِمِه ایمون هینجور رشد کِنِّه و هر کِدیم از شِمِه ای مِحبَت همدیرِ ویشتَر وونِه.

⁴ هَینِسه، اَما شِه، خِدایی کلیساهایی دِلِه شِمارِ افتخار کِمّی، شِمِه پایداری و ایمونی خاطری گه دِشتِه اذیت و آزار و عذابایی دِلِه طاقت بیاردنی.

داوری مسیحی دَگِرسنی موقِه

⁵ هَین خِدایی عادِلانِه داوری ای نِشونِئه، تا شِما خِدایی پادشاهی ای لایق بَووئین گه اونیسِه هَم عذاب کَشِنِنی.

⁶ چون راساسی خِدا هینِه عادلانِه دِنِّه گه اونانیگه شِمارِ عذاب دِنِنِه، عذابی هَمرا عوض هادِه،

⁷ و شِمِارِ گه عذاب کَشِنِنی، و همینجور اَمارِه هَم راحتی دِنِه، هون موقِه گه خِداوندْ عیسی شی قِدّارِ فِرِشتِگونی هَمرا آسِمونی جا ظاهر وونِنِه.

⁸ اَلوک بَزِه تَشی دِلِه، و اونانیگه خِدارِه نِشناسِنِنِه و اونانیگه اَمِه خِداوند عیسایی اِنجیلِ اِطاعت نَکردنِه ای جا تقاص گیرنِه

⁹ وِشونی سِزا خِداوندی حضوری جا و وی جلالی قِوّتی جا، اَبَدی نابودیِه.

¹⁰ هَمونجور گه وی، اون روزی دِلِه گه اِنِه شی ایموندارنی میِن جلال گیرنِه، و دِشتِه اونانیگه وِرِه ایمون بیاردِنِه، بِهت کِنِنِه و شِما هَم وِشونی همرانی، چون اَمِه شهادتِ ایمون بیاردِنی.

¹¹ هَینِسه، اَما هَمِش دِ شِمِنِه دِعا کِمّی تا اَمِه خِدا شِمارِ شی هون دعوتی سِه گه بَخونِس بَوِنِه ای لایق دِنِّه و شی قِوّتی هَمرا هر خِبِ نیّت و هر کاری گه ایمونی جا سرچشمه گیرنِه رِه، اَنجام هادِه.

¹² تا اَمِه خِداوند عیسایی اِسم شِمِه دِلِه جلال بَیرِه، و شِما هَم طبقِ اَمِه خِدا و خِداوندْ عیسی مسیحی فیض، وی دِلِه جلال بیرین.