پطرسی دِوّمین نامِه 3 - کتاب مقدس به زبان مازندرانی - گویش غربی

خِداوندی روز

¹ اِی عَزیزِن، هَین دِوّمین نامِئه گه دِ شِمِنِه نِویسِمِه. هر دِتا نامِه رِه هَین نیّتی هَمرا شِمِنِه بَنوِشتِمِه تا شِمِه یاد بیارِم و شِمِه پاکِ فِکرارِ شوقی سِه بیارِم،

² تا هون کلامی گه مِقدَّس پِیغمبرنِ پِشتر بُتِنِه، و خِداوند و اَمِه نِجات دَهَنده ای حِکم، گه رسولنی طریق شِمارِ هادا رِه شی یاد بیارین

³ پِش از هر چی، دِنّین گه آخرین روزایی دِلِه اونانی گه مسخره کِنِنِه، اِنِنِه گه شی پلیدِ خواسِّه هایی دِمال دَرِنِه و مَسخره وار

⁴ گِنِنِه: «پَس وی بیموئنی وَعدِه چی بَوِه؟ چون از وختی گه اَمِه پیرِن بَمِردِنِه، هَمه چی هَمونجوریه گه از اوَّلِ دِنیا وِه!»

⁵ چون، وِشون عمداً هَین حَیقتِ ندید گیرِنِه گه آسِمونِن پِشتر دَوِه و زمین اُوئی جا و اُوئی طریق و خِدایی کلامی هَمرا شِکل بَیتِه؛

⁶ و هَمین اُوئی طریق، هون دِنیایی گه اون موقِه وجود داشتِه غَرق و نابود بَوِه.

⁷ ولی هَمون کلامی هَمرا، آسِمونِن و زَمینی گه اَلَن وینِنی، تَشی سِه جَم بَوِه، و تا بی دینِنی هلاک بَووئن و داوری ای روزی سِه دارِنِه.

⁸ ولی اِی عَزیزِن، هَین حَیقتِ ندید نَئیرین گه خِداوندی وَر یَتِه روز هِتی هزار سالِ و هِزار سال هِتی یَتِه روزی تَرائه.

⁹ برخلافِ بعضیایی گِمون خِداوَند شی وعده ای اَنجام هادائنی دِلِه دیر نَکِنِّه، ولی هینجور نیِه، بَلگی شِمِه هَمرا صَبورِ، چون نَخواینِه هیچکَس هَلاک بَوو، بَلگی خواینِه هَمه توبِه هاکِنِن.

¹⁰ ولی خِداوَند عیسایی دَگِرِسنی روز هِتی دِزّی تَرا اِنِه، هون موقِه آسِمونِن یَتِه گَتِه صدایی هَمرا از بِین شونِه و سِتارگون تَش گیرِنِه و نابود وونِنِه، زمین و دِشتِه وی کارا معلوم وونِه».

¹¹ اِسا گه دِشتِه هَین چیا دِ نابود وونِنِه، شِما وِنِه چیجور مَردِنی ووئین؟ شِما وِنِه یَتِه مِقدَّس و دیندارِ زندگی دارین

¹² خِدایی روزی چِش بِرا ووئین و هَینِسه گه خِدایی روز زودتر بیِه تَقلّا هاکِنین، هون روزی دِلِه گه آسِمونِن تَش گیرِنِه و نابود وونِنِه، و آسِمونی ستارگون تَشی گَرمی ای جا ذوب وونِنِه.

¹³ ولی اَما طبقِ وی وَعدِه، جَدیدِ آسِمونِن و جدیدِ زَمینی چِش بِرامی گه اونی دِلِه هر چی گه خدایی دیدی جا دِرِسِ، دَرِه.

¹⁴ پَس اِی عَزیزِن، اِسا گه هَین چیایی اِنتِظارِ کَشِنِنی، خِیلی تقلّا هاکِنین گه وی دید بی‌لکه و بی‌عیب ووئین، و صِلح و سلامتی ای دِلِه دَووئین.

¹⁵ و اَمِه خِداوندی صَبرِ نِجات دِنِّین، هَمونجور گه اَمِه عزیزِ بِرار پولُس هَم طِبقِ هون حکمتی گه وِرِه هادا بَوِه، شِمِنِه بَنوِشتِه.

¹⁶ وی شی دِشتِه نامه‌هایی دِلِه وختی گه هَین چیایی جا گَب زَنِّه نِویسِنِه. وی نامه‌ هایی دِلِه چیایی بَنوِشت بَوِه گه اونِنی بِفَهمِسَن سَختِ، و نادونِ آدمِن و سِس ایمونِن هونی دِلِه دَس وَرِنِه، هَمونجور گه دییَر مِقَدّسِ نِوشتِه هایی هَمرا هَینجور کِنِنِه، و هَین وِشونی نابودی ای باعث وونِه.

¹⁷ پَس شِما اِی عَزیزِن، اِسا گه هَینِه دِنِّنی، مِواظب ووئین نَکِنِه بی‌دینِنی نادِرِسِ راهی دِلِه گِمراه بَووئین، و شی پایداری رِه از دَس هادین،

¹⁸ بَلگی اَمِه خِداوند و نِجات دَهَنده عیسی مَسیحی فیض و بِشناسینی دِلِه رشد هاکِنین، گه وِرِه از اَلَن تا اَبَد جلال ووئه! آمین.