دوّمین نامه قرنتیانِ وَسین 4 - کتاب مقدس به زبان مازندرانی - گویش غربی

اِنجیلی نور

¹ پَس چون هون رحمتی سِه گه اَمارِه هادا بَوِه هَینجور خِدمتی رِه دِ کِمّی، نااِمید نَوومی.

² بَلگی جاهادا و شرم آورِ راهایی جا دوری هاکِردِمی، و حِقِّ بازی ای هَمرا رفتار نَکِّمی و خِدایی کَلامِ دَسکاری نَکِمّی، بَلگی حَیقتِ آشکارا گِمی، و تَقّلا کِمّی خِدایی حِضور، هَمه ای وِجدانی پِش تأیید بَووئیم.

³ حتّی اگه اَمِه اِنجیل نامفهومِ، اونانیسِه نامفهومِ گه هَلاکتی راهی دِلِه دَرِنِه.

⁴ هَین دِنیایی خِدا، بی ایمونِنی فِکرارِ کور هاکِردِه تا مسیحی جَلالی اِنجیلی نور گه خِدایی دیمِ رِه، نَوینِن.

⁵ چون اَما شِرِه موعظه نَکِّمی، بَلگی اعلام کِمّی گه عیسی مَسیح خِداوَندِ، و شیجا، فقط عیسایی خاطری، و هون هَم فقط هِتی شِمِه نوکرِنی تَرا گَب زَمّی.

⁶ چون هَمون خِدا گه بُتِه: «نور، تاریکی ای جا بَتابِه،» شی نورِ اَمِه دِلی دِلِه بَتابانیِه تا خِدایی جَلالی بِشناسیَنی هَمرا، مسیحی دیمی دِلِه، اَمارِه نورانی هاکِنِه.

⁷ ولی هَین گنجیشونِه گِلی پیلَکیشونی دِلِه دارمی، تا معلوم ووئِه گه هَین گَتِه قِدرت خِدایی جائِه نا اَمِه جا.

⁸ اَما هر طرف سختی ای دِلِه دَرمی، ولی نِشکِسِمی؛ بِهت کِمّی، ولی نااِمید نیمی؛

⁹ عذاب کَشِمی، ولی وِل هاکِرد نَوِمی؛ بِنِه بَخاردمی، ولی کم نیاردمی؛

¹⁰ هَمِش عیسایی مرگِ شی تَنی دِلِه دِ وَرمی تا عیسایی زندگی هَم اَمِه تَنی دِلِه ظاهر بَوو.

¹¹ چون اَما گه زینِّمی، هَمِش عیسایی خاطری مرگی سِه بِسپارِس وومی تا وی زندگی اَمِه تَنی دِلِه گه از بِین شونِه ظاهِر بَوو.

¹² پَس، مَرگ اَمِه دِلِه کار کِنِّه، ولی زندگی شِمِه دِلِه.

¹³ مزموری کیتابی دِلِه بیمو گه «ایمون بیاردِمِه، پَس گَب بَزومِه.» هَمین ایمونِ روحی هَمرا، اَما هَم ایمون دارمی و گَب زَمّی.

¹⁴ چون دِمّی ویگه عیسای خِداوَندِ مِردِگونی جا زینِّه هاکِردِه، اَمارِه هَم عیسایی هَمرا زینِّه هاکِردِه، و شِمِه هَمرا وی حِضوری سِه اُرنِه.

¹⁵ هَینِن هَمه شِمِه خاطِریِه، تا هر اَنّا گه خِدایی فیض مَردِنی سِه ویشتَر و ویشتَر وونِه، شِکر هاکِردن هَم خِدایی جَلالی سِه ویشتَر بَوو.

¹⁶ پَس نااِمید نَوومی. هر چَن اَمِه ظاهر دِ از بِین شونِه، اَمِه باطن هر روز تازه تر وونِه.

¹⁷ چونگه اَمِه کِچیک و زود گِذَرِ رَنجیشون، اَبَدی جَلال اَمِسِه اُرنِه گه نِشِنِه هون رنجیشونی هَمرا قیاس هاکِردن.

¹⁸ پَس اونچی گه بِشِنِه بَئیَنِ، نِشِمی، بَلگی اونچی گه نِشِنِه بَئیَنِ، اِشِمی، چونگه هون چیایی گه بِشِنِه بَئیَن زود گِذرِ، ولی هون چیایی گه نِشِنِه بَئیَن اَبَدیِه.