دوّمین نامه قرنتیانِ وَسین 3 - کتاب مقدس به زبان مازندرانی - گویش غربی

جدیدِ عهدی نوکرِن

¹ مَگِه یَکَش دییَر شیجا تعریف هاکردَنِ شِرو کِمّی؟ یا بعضیایی تَرا، لازِمِ شِمارِ سِفارش نامِه هادیم یا شِمِه جا سِفارش نامِه هایریم؟

² شِما شِه اَمِه سِفارش نامِه هَسِّنی، یَتِه نامِه گه اَمِه دِلی سَر بَنوِشت بَوِه گه هَمه بَتِنِّنِه اونِه بَخونِن و بِشناسِن.

³ شِما نِشون هادانی گه مسیحی نامِه نی، گه اَمِه طریق شِمار بَرسیِه گه مِرَکّبی هَمرا بَنوِشت نَوِه، بَلگی زینِّه خِدایی روحی هَمرا اَمِسِه بَنوِشت بَوِه، و نا سَنگی لُوحی سَر، بَلگی آدمنی دِلی لُوحی سَر بَنوِشت بَوِه.

⁴ اَما مسیحی طریقی جا خِدایی وَر هَینجور اطمینانی دارمی.

⁵ نا اونگِه شِه لیاقت داریم گه اِدّعا هاکِنیم یَچی اَمِه دَس بَر اِنِه، بَلگی اَمِه لیاقت خِدایی جائه.

⁶ خِدا وِه گه اَمارِه لیاقت هادا گه تازه عهدی نوکَرِن ووئیم- عهدی گه خِدایی روحی سَر پابرجائه، نا اونچی ای سَر گه یَتِه بَنوِشت ویشتَر نیِه. چون ’بَنوِشت‘ کِشِنِه، ولی خِدایی روح زندگی دِنِه.

⁷ اِسا، اگه هون خِدمتی گه مرگی سِه خَتم وونِسِه و سنگی لوحی سَر حَک بَوِه وِه جلالی هَمرا ظهور هاکِردِه، جوریگه بَنی اسرائیلی قوم نَتِنِّسِنِه موسایی دیمی جَلالی خاطری اونِه هارشِن، هر چَن هون جَلال دِ از بِین شیوِه.

⁸ چَنّی ویشتَر، هون خِدمتی گه خِدایی روحی طریقی جائه جَلالی هَمرا هَسِّه.

⁹ چون اگه خِدمتی گه محکومیتی سِه خَتم وونِسِه جلالی هَمرا وِه، چَنی ویشتَر خِدمتی گه صالِح بِشمارِسَنی سِه خَتم وونِه جلالی جا پِرِ.

¹⁰ چون اونچی گه یه وختی پِرجلال وِه، اِسا در قیاسِ هَین جلال گه سَرتَرِ، دِ جلالی نارنِه.

¹¹ و اگه اونچی گه از بِین شیوِه جَلالی هَمرا وِه، اونچی بِجا مونِّه چَنی ویشتَر جلالی هَمرائه.

¹² پَس چونگه هَینجور اِمیدی دارمی، جِرأتی هَمرا گَب زَمّی؛

¹³ نا موسایی تَرا گه یَتِه نِقاب شی دیمی سَر بَکِشیِه تا بنی اسرائیلی قوم اونچی ای عاقبتِ گه دِ از بِین شیوِه رِه، نَوینِن.

¹⁴ ولی وِشونی فِکرا تاریک بَوِه چون هَمون نِقاب عتیقِ عهدی بَخونسنی موقِه تا اَمرِز بِجا بَمونِسِه و بَئیت نَوِه، چون فقط مسیحی دِلِه بَئیت وونِه.

¹⁵ حتّی تا اَمرِز، هر وَخت موسایی توراتِ خُونِنِه، یَتِه نِقاب وِشونی دِلی سَر بِجا مونِّه؛

¹⁶ ولی هر وَخت یَنَفَر خِداوندی وَر گِردِنِه، نِقاب بَئیت وونِه.

¹⁷ خِداوَند، روحِ و هر جا خِداوندی روح دَوو، اوجِه آزادی دَرِه.

¹⁸ و اَما هَمه گه بی نِقابِ دیمی هَمرا، خِداوندی جَلالِ، یَتِه آینِه ای تَرا ویمّی، هِتی هَمون عکسی تَرا، یَتِه جلالی جا، یَت دییَر جلالی سِه گه ویشتَر وونِه عوض وومی، و هَین خِداوندی جا شِرو وونِه گه روحِ.