دوّمین نامه قرنتیانِ وَسین 13 - کتاب مقدس به زبان مازندرانی - گویش غربی

آخرین هِشدارها

¹ هَین سوّمین کَشِ گه شِمه بَئیَنی سِه اِمِه. «هر گَبی دِ یا سِه تا شاهِدی هَمرا ثابت وونِه.»

² مِن شی دِوِّمین دیداری دِلِه گه اوجِه دَوِمِه، اونانی رِه گه پِشتر گِناه هاکِرد وِنِه، و بَقیِه رِه هَم هِشدار هادامِه و اَلَن هَم گه اوجِه دَنیمِه اَی هَم هِشدار دِمِه گه اگه یَکَش دییَر شِمِه وَر بیئِم، وِشونِه رحم نَکِمِّه.

³ چون شِما یَتِه دلیلی دِمال دَرِنی گه ثابت هاکِنین گه مَسیح می طریق گَب زَنِّه. مسیح شِمِه پِش ضعیف نیِه، بَلگی شِمِه میِن قِوَّت دارنِه.

⁴ چون هر چَن ضَعفی دِلِه مَصلوب بَوِه، ولی خِدایی قِوَّتی هَمرا زندگی کِنِّه. چون اَما هَم وی دِلِه ضعیفمی، ولی شِمِه پِش وی هَمرا خِدایی قِوَّتی هَمرا زندگی کِمّی.

⁵ شِرِه آزمود هاکِنین تا بَوینین ایمونی دِلِه دَرِنی یا نا. شِرِه مَحَک بَزِنین. یا مَگِه هَینِه شی خَوَری نِفَهمِنِنی گه عیسی مَسیح شِمِه دِلِه دَرِه؟ مَگِه هینگِه هَین آزمودی دِلِه رَد بَووئین!

⁶ و اِمید دارمِه هَینِه بِفهمین اَما هَین آزمودی دِلِه رَد نَوِمی.

⁷ ولی اَمِه دِعا خِدایی پِش هَینِه گه خطا نَکِنین؛ نا تا معلوم بَوو گه اَما آزمودی جا سَربِلَن دیرگا بیمومی، بَلگی شِما اونچی گه دِرِس هَسِّه رِه، هاکِنین، حتّی اگه هینجوری نِشون هادِه گه اَما رَد بَوِمی.

⁸ چون نَتِمّی حَیقَتی علِیه هیچ کاری هاکِنیم، بَلگی هر چی کِمّی حَیقَتی سِه هَسِّه.

⁹ چون هون موقِه گه اَما ضعیف ووئیم و شِما قَوی، اَمِه خِشالی ای باعِث وونِه، و اَمِه دِعا هَینِه گه شِما اَی هَم جان بَیرین.

¹⁰ هَینسِه، مِن هَین چیارِه وختی شِمِه وَر دَنیمِه شِمِسِه نِویسِمِه تا وختی شِمِه وَر بیمومِه، مَجبور نَووم شی اقتداری جا تِنّی ای هَمرا رفتار هاکِنِم، هون اقتداری گه خِداوَند نا ویرون هاکِردَنی سِه، بَلگی بَنا هاکِردَنی سِه مِنِه هادا.

سرآخر

¹¹ سَرآخر، اِی بِرارِن، خِشال ووئین. شِمِه فِکر هَین ووئه گه اَی هَم جان بَیرین؛ و همدیرِ تسلّی هادین، همدیری هَمرا هَم نظر ووئین، صِلح و سلامتی ای دِلِه زندگی هاکِنین؛ گه خِدایی مِحبت و صِلح و سلامتی شِمِه هَمرا مونِّه.

¹² هَمدِیَرِ مِقَدّسِ خِشی هَمرا سلام هاکِنین.

¹³ دِشتِه مِقَدَّسین، شِمِنِه سلام رَسانِنِه.

¹⁴ خِداوند عیسی مَسیحی فِیض، خِدایی مِحَبَّت و روح القُدُسی رفاقت شِمِه هَمرا دَوو.