اول تیموتائوس 3 - کتاب مقدس به زبان مازندرانی - گویش غربی

کلیسایی ناظرن و شَماسِن

¹ هَین گَبِ بِشِنِه اعتماد هاکِردَن: گه اگه یَنَفَر آرِزو دارِه گه کلیسایی ای نِظارتی کارِ دارِه، خِبِ کاری دِمال دَرِه.

² پس، یَتِه ناظر وِنِه هیچی وی زندگی ای دِلِه دَنیوو گه اونی خاطری سرکوفت بَخارِه، یَتِه زَن دارِه، هوشیار ووئه، شی دَمِ دارِه، با آبرو ووئه، مِهمون دوس ووئه و بَتِنِّه تعلیم هادِه؛

³ نا عرق خوار، نا زورگو، بَلگی آروم ووئه؛ نا جنگی، نا پولدوس.

⁴ وی وِنِه شی خِنِواده رِه خِب بَچِرخانِه، شی وَچیلِه رِه جوری بار بیارِه گه دِشتِه احترامی هَمرا، ویجا اطاعت هاکِنِن.

⁵ چون اگه کَسی نَئونِّه گه چِتی وِنِه شی خِنِوادِه رِه بَچرخانِه، چِتی بَتِنِّه خِدایی کلیسایی مِراقب ووئه؟

⁶ و تازِه ایمون نیارد وو، نَکِنِه مغرور بَوو و اِبلیسی تَرا محکوم بَوو.

⁷ بِعلاوِه، وی وِنِه هون مردِنی میِن گه کلیسایی دیرگا دَرِنِه هَم خِش نوم ووئِه تا رِسوا نَوو و اِبلیسی تَلِه نَکِفِه.

⁸ هَمینجور کلیسایی شَماسِن وِنِه باوقار ووئِن؛ دُو رو نَووئن، شرابی گرفتار نَووئن، نادِرِسِ سودی حِرصِ نَزِنِن.

⁹ وِشون وِنِه ایمونی رازِ، یَتِه پاکِ وِجدانی هَمرا دارِن.

¹⁰ و وِشون وِنِه اَوَّل آزمود بَوون، اَزما اگه ثابت هاکِردِنِه گه بی عیبِنِه، بِلین شَماسی ای کاری دِلِه خِدمَت هاکِنِن.

¹¹ همینجور، وِشونی زَناکِنِن هَم وِنِه باوقار ووئِن، تِهمت نَزِنِن، بَلگی هوشیار ووئن و هَمه چی ای دِلِه وفادار ووئن.

¹² هر کدیم از شَماسِن وِنِه یَتّا زَنا دارِه و شی وچیلِه و خِنوادِه رِه خِب بَچرخانِه.

¹³ چون اونانیگه شَماسِنی مقامی دِلِه خِبِ خِدمَت هاکِرد وون، یَتِه خِبِ مقام گیرِنِه و هون ایمونی دِلِه گه مَسیحْ عیسایی دِلِئه، گَتِه اطمینان بِدس اُرِنِه.

¹⁴ اِمیدِ دارمِه گه خِیلی زود تی وَر بیئِم، ولی هَینِنِه تِنِه نِویسِمِه تا،

¹⁵ اگه می بیموئن عقب دَکِتِه، دِنّی گه خِدایی خِنِواده ای میِن گه زینِّه خِدایی کلیسا و حَیقتی سِتون و پِی هَسِّه، چِتی وِنِه رفتار هاکِردن.

¹⁶ راساسی گه دینداری ای راز خِیلی گَتِه: ویگه جسمی دِلِه ظاهر بَوِه، خِدایی روحی طریقی جا تأیید بَوِه، فرشتگون وِرِه بَئینِه، قومیشونی میِن اعلام بَوِه، دِنیایی دِلِه وِرِه ایمون بیاردِنِه، جلالی هَمرا، لُو، بَوِرد بَوِه.