اول تیموتائوس 2 - کتاب مقدس به زبان مازندرانی - گویش غربی

هَمه ای سِه دِعا هاکِنین

¹ پس، پِش از هر چی، خوایمِه گه خواستها، دِعاها، شفاعتها و شِکر هاکردنا دِشتِه مَردِنی سِه بِجا بیارد بَوو،

² پادشاهِن و صاب منصبِنی سِه، تا بَتِنّیم آروم و راحتِ زندگی داریم، گه هر لحاظی جا دیندار و وقاری هَمرا ووئه.

³ هَین اَمِه نِجات دَهنده خِدایی نَظر خِب و وی بابِ دِلِ

⁴ گه خواینِه دِشتِه مَردِن نِجات بَیرِن و حَیقتِ بِشناسِن.

⁵ چون فقط یَتِه خِدا دَرِه، و خِدا و آدَمِنی میِن فقط یَتِه واسِطه دَرِه، یَعنی هون اِنسون گه مَسیحْ عیسائه؛

⁶ ویگه شی جانی هادائنی هَمرا، دِشتِه آدَمنی آزادی رِه بَخریِه. هَین حَیقَت خِبِ وَخت شهادت هادا بَوِه،

⁷ چون مِن هَینِسه تعیین بَوِمِه تا غیریَهودیِنی سِه یَتِه تعلیم دَهندِه و یَتِه رسول و یَتِه مَلِّم ایمون و حَیقتی دِلِه ووئِم - حَیقَتِ دِ گِمِه و دِرو نَزِمِه.

⁸ پَس می آرِزو هَینِ گه مَرداکِنِن هَمه جا دِعا هاکِنِن، و مِقَدّسِ دَسِ بی غیظ و دعوا مِرافِه لُو بَوِرِن.

⁹ هینجورم خوایمِه گه زَناکِنِن آبرومَندانِه لیواس شی تَن دَکِنِن، و نِجابت و حیایی هَمرا، نا گیس هاکِردِه می ای هَمرا، یا طِلا و مِرواری و یا گِرون قیمتِ لیواسیشونی هَمرا،

¹⁰ بَلگی خِبِ کارایی هَمرا، هَمونجور گه هون زَناکِنِنی لایقِ گه دینداری ای اِدّعا رِه دارِنِه.

¹¹ زَن وِنِه ساکِت ووئه و کاملِ اطاعتی هَمرا تعلیم بَیرِه.

¹² مِن نِلمِه گه یَتِه زَنا تعلیم هادِه یا یَتِه مَردی سَر تسلِط دارِه؛ بَلگی وِنِه ساکِت ووئه.

¹³ چون آدَم، اَوَّل خلق بَوِه و اَزما حوا.

¹⁴ و آدَم گول نَخاردِه، بَلگی زَن وِه گه گول بَخاردِه و نافرمون بَوِه.

¹⁵ ولی زَن وَچِه بیاردَنی هَمرا نِجات گیرنِه، اگه ایمون و مِحبت و مِقدّس ووئنی دِلِه، نِجابتی هَمرا بَمونِّه.