اوّل تِسالونیکیان 5 - کتاب مقدس به زبان مازندرانی - گویش غربی

خِداوندی روز

¹ اِسا اِی بِرارِن، وَختا و زَمونایی خَوَری، نیازی نیِه یَچی شِمِنِه بَنویسَم.

² چون شِما شِه خِب دِنِنی گه خِداوند عیسایی دَگِرسنی روز هِتی دِزّی تَرا گه شُو دِلِه اِنِه، سَر رَسِنِه.

³ همون موقِه گه مَردِن گِنِنِه: «صِلح و سلامتی و اَمن و اَمانِه»، اَزما ناخوَکی هَلاکَت وِشونی سَر اِنِه، هَمونجور گه بَزائنی درد یَتِه حامِلِه زَنارِه بَیرِه، و وِشون نَتِنِنِه دَر بورِن.

⁴ ولی اِی بِرارِن، شِما تاریکی ای دِلِه دَنینی تا اون روز، هِتی دِزّی تَرا شِمارِ غافلگیر هاکِنِه.

⁵ چون دِشتِه شِما نُوری وَچیلِه و روزی وَچیلِنی؛ اَما شُو و تاریکی ای جا نیمی.

⁶ پَس هِتی بَقیِه ای تَرا شِرِه خُو نَزِنیم، بَلگی ویشار و هوشیار ووئیم.

⁷ چون اونانیگه فِسِنِنِه، شُو فِسِنِنِه، و اونانیگه مَس کِنِنِه، شُو مَس کِنِنِه.

⁸ ولی از اوجِه گه اَما روزی جَم هَسمی، وِنِه هوشیار ووئیم، و ایمون و مِحبتی زِرِه رِه شی تَن دَکِنیم، و نِجاتی اِمیدِ هِتی کِلاهخودی تَرا شی سَر بِلیم.

⁹ چون خِدا اَمارِه غضبی سِه تعیین نَکِردِه، بَلگی اَمِه خِداوند عیسی مسیحی طریق، نِجاتی بِدَس بیاردنی سِه تعیین هاکردِه

¹⁰ ویگه اَمِنِه بَمِردِه، تا چی ویشار ووئیم و چی بَفِت، وی هَمرا زندگی هاکِنیم.

¹¹ پَس هَمدیَرِ تَشویق هاکِنین، و ایمونی دِلِه تقویت هاکِنین، هَمونجور گه اَلَن هَم کِنِنی.

آخرین سِفارشا و دِعای خیر

¹² اِسا اِی بِرارِن، شِمِه جا خوایمی اونانیگه شِمِه میِن زَحمَت کَشِنِنِه و خِداوندی دِلِه شِمِه رَهبَر هَسِّنِه و شِمارِ نَصیحت کِنِنِه رِه، احترام بِلین،

¹³ و مِحبتی دِلِه هون کاری خاطری گه کِنِنِه وِشونِه خِیلی احترام بِلین. و هَمدیَری هَمرا صِلح و سلامتی ای دِلِه زندگی هاکِنین.

¹⁴ اِی بِرارِن، شِمِه جا خواهش کِمّی گه تنبلِ آدمِنِ نصیحت هاکِنین؛ ترسو آدمِنِ تَشویق هاکِنین؛ ضَعیفِ آدَمنِ کِمک هاکِنین؛ و هَمه ای هَمرا صبور ووئین.

¹⁵ شِمِه حَواس دَوو گه کَسی، بَدی رِه بَدی ای هَمرا جِواب نَدِه، بَلگی هَمِش هَینی دِمال دَووئین گه همدیر و مَردِنِ خِبی هاکِنین.

¹⁶ هَمِش خِشال ووئین؛

¹⁷ یَکسَرِه دِعا هاکِنین؛

¹⁸ هر وضعی دِلِه شِکر هاکِنین، چون خِدایی خواسِه مَسیحْ عیسایی دِلِه شِمِنِه هَینِه.

¹⁹ خِدایی روحی تَشِ نَکوشانین؛

²⁰ نَبِوّتها رِه کِچیک نِشمارین.

²¹ بَلگی هَمه چیرِه آزمود هاکِنین؛ و اونچی گه خِبِ رِه، قائِم بَچسبین.

²² هر جور بَدی ای جا دوری هاکِنین.

²³ اِسا خِدای صِلح و سلامتی شِه شِمارِ کامِلاً تقدیس هاکِنِه، و شِمِه روح و جان و تَن، تا اَمِه خِداوند عیسی مَسیحی بیموئَنی موقِه بی‌عیب بَمونِّه.

²⁴ ویگه شِمارِ خُونِّه، وفادارِ، و وی حتماً هَین کارِ کِنِّه.

²⁵ اِی بِرارِن، اَمِنِه دِعا هاکِنین.

²⁶ دِشتِه بِرارنِ یَتِه مِقَدّسِ خِشی هَمرا سلام بَرِسانین.

²⁷ خِداوندی حِضور، شِمارِ قَسَم دِمِه گه هَین نامِه رِه دِشتِه بِرارِنی سِه بَخونین.

²⁸ اَمِه خِداوند عیسی مَسیحی فیض شِمِه هَمرا دَوو. آمین.