اوّل تِسالونیکیان 4 - کتاب مقدس به زبان مازندرانی - گویش غربی

زندگی ای گه خِدارِه راضی کِنِّه

¹ سَرآخر پس، اِی بِرارِن، اَما خِداوند عیسایی دِلِه شِمِه جا خوایمی و اِلتماس کِمّی هَمونجور گه اَمِه جا شِمارِ بَرسیِه گه چِتی وِنِه زندگی هاکِنین و خِدارِه راضی هاکِنین، هَمینجورم گه اَنجام دِنِنی، هَین کارِ ویشتَر و ویشتَر هاکِنین.

² چون شِما دِنِنی گه چی حِکمهایی خِداوند عیسایی طریقی جا، شِمارِ هادامی.

³ چون خِدایی اِرادِه هَینِه یَعنی شِمِه مِقَدَّس ووئن: گه شِرِه بی‌عفتی ای جا دور دارین.

⁴ تا هر‌ کدیم از شِما دِنِّه گه چِتی شی تَنِ مِقدّس ووئن و احترامی دِلِه دارِه.

⁵ نا شهوت و هوا و هوسی دِلِه، هِتی هون غیرِغیهودینی تَرا گه خِدارِه نِشناسِنِنِه،

⁶ تا هیچکَس هَین جریانی دِلِه شی بِراری حَق خطا یا سو استفادِه نَکِنِه، چون خِداوند دِشتِه هَین چیایی سِه تقاص گیرنِه، هَمونجور گه اَما پِشتَر شِمارِ بُتِمی و جِدی هِشدار هادامی.

⁷ چون خِدا اَمارِه نا ناپاکی ای سِه، بَلگی مِقدّس ووئنی سِه بَخونِسِه.

⁸ پَس، هر کی هَینِه رَد هاکِنِه، آدَمی رِه رَد نَکِنِّه، بَلگی خِدایی رِه رَد هاکِردِه گه شی مِقدّسِ روحِ شِمارِ دِنِه.

⁹ اِسا بِرارانِه مِحبتی خَوَری شِما نیاز نارِنی گه یَنَفَر یَچی شِمِنِه بَنویسِه، چون شِما شِه خِدایی جا یاد بَیتِنی گه هَمدیَرِ دوس دارین،

¹⁰ چون شِما راساسی دِشتِه بِرارِنِ مَقدونیه ای مَنطقه ای سَرتاسَری دِلِه دوس دارِنی. ولی اِی بِرارِن شِمِه جا اِلتماس کِمّی گه هَین کارِ ویشتَر و ویشتَر هاکِنین.

¹¹ و آرزو هاکِنین گه آرومِ زندگی دارین و شِمِه سَر شِمِه کاری دِلِه دَوو، و هَمونجور گه شِمارِ دستور هادامی شی دَسی هَمرا کار هاکِنین.

¹² تا وِشونی پِش گه کلیسایی دیرگا وَر دَرِنِه دِرِسی ای هَمرا زندگی هاکِنین و هیچکسی مِحتاج نَووئین.

خِداوند عیسایی دَگرسَن

¹³ ولی اِی بِرارِن، اَما نَخوایمی هون ایموندارِنی خَوَری گه بَمردنِه بی‌خَور ووئین، نَکِنِه گه هِتی بَقیِه مَردِنی تَرا گه اِمیدی نارِنِه، ماتم بَیرین.

¹⁴ چون از اوجِه گه اَما ایمون دارمی گه عیسی بَمِردِه و زینِّه بَوِه، پَس همینجور، خِدا اونانیگه عیسایی دِلِه بَمِردِنِه رِه، وی هَمرا اُرنِه.

¹⁵ چون اَما خِداوندی کلامی طریق هَینِه شِمارِ اعلام کِمّی گه: اَما گه زینِّمی و تا خِداوندی بیموئن بِجا بَمونِسمی، وِشونی جا گه بَمِردِنِه پِش نَکِتِمی.

¹⁶ چون خِداوَند شِه، یَتِه حِکم گه گَتِه دادی همرائه فرشتگونی رئیسی اَوازی هَمرا و خِدایی شیپوری اَوازی هَمرا، آسِمونی جا جِر اِنِه. و اَوّل مِردگون مسیحی دِلِه زینِّه وونِنِه،

¹⁷ اَزما، اَما گه زینِّمی و بِجا بَمونِسمی، وِشونی هَمرا اَبریشونی دِلِه لُو بَوِرد وومی تا خِداوندِ هوایی دِلِه بَوینیم، و هَینجوری هَمِش خِداوندی هَمرا دَرمی.

¹⁸ پَس هَین گَبیشونی هَمرا، هَمدیَرِ تشویق هاکِنین.