اوّل تِسالونیکیان 1 - کتاب مقدس به زبان مازندرانی - گویش غربی

¹ پولُس و سیلاس و تیموتائوسی طرفی جا، تِسالونیکی ای کلیسایی شهری سِه گه خِدای پیر و خِداوندْ عیسی مَسیحی دِلِه دَرِنی: فیض و صِلح و سلامتی شِمِنِه بیِه.

هَین ایموندارِن سَرمَخش وونِنِه

² اَما خِدارِه هَمِش شِمِه خاطری شِکر کِمّی و شی دِعاهایی دِلِه یَکسره شِمِه جا یاد کِمّی،

³ شِمِه کار گه ایمونی راهی جا هَسِّه و زحمتی گه مِحبتی راهی دِلِه کَشِنِنی و شِمِه اِمیدی پایداری گه اَمِه خِداوند عیسی مسیحی دِلِئه، خِدا و اَمِه آسمونی پیری پِش شی یاد اُرمی.

⁴ چون اِی بِرارِن گه خِدایی عزیزِنی، اَما دِمّی گه خِدا شِمارِ انتخاب هاکِردِه.

⁵ چون اَمِه اِنجیل فقط گَبی هَمرا شِمارِ نَرسیِه، بَلگی قِوّتی دِلِه و روح القدسی دِلِه و اطمینانِ کاملی هَمرا شِمارِ بَرِسیِه؛ هَمونجور گه دِنِنی شِمِه خاطری چِتی شِمِه میِن رفتار هاکِردِمی.

⁶ شِما اَمِه جا و خِداوندی جا سَرمَخش بَیتِنی، چون خِیلی مِصیبتی دِلِه، خِدایی کلامِ هون خِشالی ای هَمرا گه روح القدس دِنِه، قَبول هاکِردِنی.

⁷ هَمونجور گه شِما دِشتِه مقدونیِه و اَخائیه ای ایموندارنی سِه سَرمَخش بَوِنی،

⁸ چون نا فقط خِداوندی کَلام شِمِه طریق مقدونیه و اَخائیه ای مَنطقِه هایی دِلِه دَپیتِه، بَلگی شِمِه ایمون داشتَن خِدارِه، تِکِ سَر دَکِتِه، جوریگه دِ لازم نیِه اَما یَچی بُئیم.

⁹ چون وِشون، شِه، از هَینگه چِتی شِما گرمی ای هَمرا اَمِه پِشواز بیمونی گَب زَنِنِه، و هَینگه چِتی بِتیشونی جا دَس بَکشینی و خِدایی سَمت دَگِرِسنی تا زینِّه و حَیقی خِدارِه خِدمَت هاکِنین

¹⁰ و تا آسِمونی جا خِدایی ریکائی بیموئَنی انتظارِ بَکِشین، گه خِدا مِردگونی جا وِرِه زینِّه هاکِردِه، یَعنی عیسی، گه اَمارِه هون غَضَبی جا گه اَزما اِنِه آزاد کِنِّه.