اول پِطرُس 1 - کتاب مقدس به زبان مازندرانی - گویش غربی

¹ پِطرُسی طرفی جا، عیسی مَسیحی رَسول، اِنتخاب بَوِه ایشون گه پونتوس و غَلاطیه و کاپادوکیه و آسیا و بیطینیه ای مَنطقِه، غریبِنی دِلِه پَخش و پَلانی؛

² اونانیگه طبقِ خِدای پیری پیشدانی، و خِدایی روحی کاری طریق گه تقدیس کِنِّه، عیسی مسیحی اِطاعَت هاکِردَنی سِه و وی خون گه وِشونی سَر بَپاشی بَوِه، انتِخاب بَوِنِه: فیض و صِلح و سلامتی فَت و فِراوون شِمنِه بیِه.

زینِّه اِمید

³ مِوارک ووئه خِدا و اَمِه خِداوند عیسی مَسیحی پیر گه شی گَتِه رَحمَتی هَمرا، عیسی مسیحی زینِّه بَووئَنی طریق مِردِگونی جا، اَمارِه زینِّه اِمیدی سِه یَتِه تازه تولِّد هادا،

⁴ و اِرثی گه از بِین نَشونِه و فاسد نَوونِه و بَپیس نَوونِه گه اونِه آسِمونی دِلِه شِمِنِه دارِنِه؛

⁵ و شِما گه خِدایی قِوّتی هَمرا و ایمونی طریق حِفظ بَوِنی، هون نجاتی سِه گه آمادِه بَوِه تا آخرِ زَمون معلوم بَوو.

⁶ شِما هینی خاطری خِیلی خِشالِنی، هر چَن مجبور بَوِنی گه یه مدتِ کِتاه جورواجورِ آزمودهایی دِلِه غم و غِرصه ای جا پِر بَووئین،

⁷ تا شِمِه ایمونی اصالت آزمودی دِلِه ثابت بَوو، و هون روز گه عیسی مَسیح ظهور کِنِّه حمد و ثنا و جلال و احترامی باعث بَوو، هَمون ایمون گه طِلایی جا خِیلی بااِرزِشترِ گه هر چَن از بِین شونِه، ولی تَشی هَمرا آزمود وونِه.

⁸ با هَینگه شِما عیسی مسیحِ نَئینی، وِرِه دوس دارِنی؛ و هر چَن اَلَن وِرِه نَوینِنی، وِرِه ایمون دارِنی و خِشالی کِنِنی، هون خِشالی ای هَمرا گه نِشِنِه بُتَن و پِرجلالِ،

⁹ شی ایمونی نتیجه رِه بِدس اُرِنی گه شِمِه جانی نِجاتِ.

¹⁰ هَین نِجاتی خَوَری، پِیغمبرن دِقّتی هَمرا تحقیق کِردِنِه. پیغمبرنی گه هون فیضی خَوَری گه قرار وِه شِمِنِه ووئه، شِمِسِه نَبِوَّت کِردنِه،

¹¹ وِشون تقلّا کِردنِه بِفَهمِن موقه ای گه مسیحی روح وِشونی دِلِه، مسیحی رنجها و جلالایی جا گه بعد از هون اِنِه پِشگویی هاکِردِه، کِرِ و چی موقِه رِه نِشون داوِه

¹² وِشونی سِه معلوم بَوِه گه نا شِخدرِه بَلگی شِمارِ خِدمَت کِردنِه، هون موقِه گه اون چیایی خَوَری گَب زووِنِه گه اَلَن هونِه اِنجیلی پِیغِم رَسِنِنی جا اِشنُنِنی، اونانی جا گه روح القُدُسی طریق گه آسِمونی جا بَرِسانی بَوِه، هون خَوَرِخِشِ شِمارِ دِنِنِه. حتّی فِرشتِگونَم آرزو دارِنِه هَین چیارِه بَوینِن.

مِقَدَّس ووئین

¹³ پَس شی فِکرارِ اَنجام هادائنی سِه حاضِر هاکِنین، و هوشیار ووئین، و شِمِه اِمید کامِلاً هون فیضی سَر دَوو گه عیسی مَسیحی ظهوری موقِه شِمارِ هادا وونِه.

¹⁴ هِتی هون مطیعِ وَچیلِه ای تَرا، هون هوا و هَوَسایی تَرا نَووئین گه نادونی ای دورانی دِلِه داشتِنی

¹⁵ ولی همون گه شِمارِ بَخونِسِه، قُدوسِ، شِما هَم دِشتِه شی رفتار و کِرداری دِلِه مِقَدَّس ووئین؛

¹⁶ چون توراتی دِلِه بَنوِشت بَوِه: «مِقَدَّس ووئین، چون مِن قُدّوسمِه.»

¹⁷ اگه وِرِه پیر خُونِنی گه هرکسِ بدونِ هَینگه ویجا هواخواهی هاکِنِه وِرِه وی اعمالی جا داوری کِنِّه، پَس خِداتَرسی ای هَمرا شی غریبی دورانِ سَر هاکِنین،

¹⁸ چون دِنِّنی شِمِه آزادی هون بیخِدی راهایی دِلِه گه شی پیرِنی جا اِرث بَوِرد وِنی، هون چیایی هَمرا گه از بِین شونِه، هِتی طِلا و نِقره ای تَرا بَخری نَوِه

¹⁹ بلگی مسیحی با اِرزشِ خونی هَمرا بَخری بَوِه، هون بی نقص و بی عیبِ وَرکایی هَمرا،

²⁰ وی پِش از هَینگه دِنیا به وجود بیِه تعیین بَوِه، ولی هَین آخرِ زَمون هایی دِلِه شِمِه خاطری آشکار بَوِه.

²¹ شِما گه وی طریق خِدارِه ایمون بیاردنی، هون خِدایی گه وِرِه مِردِگونی جا زینِّه هاکِردِه و جلال هادا، تا شِمِه ایمون و اِمید خِدارِه ووئه.

²² اِسا گه حَیقَتی اِطاعت هاکِردنی هَمرا شی جانِ پاک هاکِردنی تا بی ریا بِرارونِه مِحبت دارین، همدیرِ خالِص و پاکِ دِلی هَمرا دوس دارین.

²³ چون شِما یَکش دییَر دِنیا بیمونی، نا هون تِخمی جا گه از بِین شونِه بَلگی هون تِخمی جا گه از بِین نَشونِه، یَعنی خِدایی کلامی طریق گه زینِّه هَسِّه و تا اَبَد بِجا مونِّه.

²⁴ چون، «دِشتِه جِسم هِتی واشی تَرائه و دِشتِه وی جلال واشی گُلی تَرائه؛ واش خِشک وونِه و وی گُلیشون کَلِنِه،

²⁵ ولی خِداوندی کلام تا اَبَد بِجا مونِّه.» و هَین کلام، هون خِبِ خَوَرِخِشِ گه شِمارِ اعلام بَوِه.