اوّل یوحنا 1 - کتاب مقدس به زبان مازندرانی - گویش غربی

زندگی ای کَلام

¹ اونچی گه از اوَّل دَوِه، اونچی گه بِشنُسِمی و شی چِشی هَمرا بَئیمی، اونچی گه وِرِه هارشیمی و شی دَسی هَمرا لَمس هاکِردِمی، یَعنی زندگی ای کَلام گه اونِه شِمِار اعلام کِمِّی.

² زندگی ظاهر بَوِه؛ اَما اونِه بَئیمی و اونِه گِواهی دِمی. اَبَدی زندگی رِه شِمِارِ اعلام کِمّی، هَمون اَبَدی زندگی گه پیری هَمرا دَوِه و اَمارِه ظاهر بَوِه.

³ هون کَلام گه اَما بَئیمی و بِشنُسِمی رِه شِمِارِ اِعلام کِمّی تا شِما هَم اَمِه هَمرا رِفاقت دارین؛ حَیقَتاً هَم گه اَمِه رِفاقت پیری هَمرا و وی ریکا عیسی مَسیحی هَمرائِه.

⁴ اَما هَینِه شِمِسِه نِویسمی تا اَمِه خِشالی کامِل بَوو.

نوری دِلِه زندگی هاکِردَن

⁵ هَینِه پِیغِمی گه ویجا بِشنُسِمی و شِمِارِ اعلام کِمّی گه: خِدا نورِ و هیچ تاریکی ای اَصلاََ وی دِلِه دَنیِه.

⁶ اگه اَما بُئیم وی هَمرا رِفاقَت دارمی، در حالی گه تاریکی ای دِلِه زندگی کِمّی، دِرو زَمّی و حَیقَتِ عَمَل نَکِمّی.

⁷ ولی اگه نوری دِلِه زندگی هاکِنیم، هَمونجور گه وی نوری دِلِه دَرِه، هَمدیَری هَمرا رِفاقت دارمی و وی ریکا عیسایی خون اَمارِه دِشتِه گِناهی جا پاک کِنِّه.

⁸ اگه بُئیم گه گِناه نارمی، شِرِه گول بَزومی و اَمِه دِلِه حَیقتی دَنیِه.

⁹ اگه اَما شی گِناهِنِ اعتراف هاکِنیم، وی گو وَفادار و عادلِ، اَمِه گِناهِنِ بَخشِنِه و هر نادِرسی ای جا اَمارِه پاک کِنِّه.

¹⁰ اگه بُئیم گِناه نَکِردِمی، اَما وِرِه دِروزَن کِمّی و وی کَلام اَمِه دِلِه دَنیِه.