اوّلین نامِه قُرنتیانی سِه 8 - کتاب مقدس به زبان مازندرانی - گویش غربی

بِتیشونی پیشکَش بَوِه خِراک

¹ و اِسا بِتیشونی پیشکَش بَوِه خِراکی خَوَری: دِمّی گه «اَما هَمه معرفتِ دارمی.» همین معرفت غِروری باعث وونِه، ولی مِحبت آدمِ بَنا کِنِّه.

² اگه یَنَفَر گِمون کِنِّه یَچی دِنِّه، حَلا اونچی گه وِنِه دِنِّه رِه نَئُونِّه.

³ ولی اونیگه خِدارِه دوس دارنِه، خِدا وِرِه اِشناسِنِه.

⁴ پَس بِتیشونی پیشکش بَوِه خِراکی بَخاردنی خَوَری، دِمّی گه هَین دِنیایی دِلِه «بِت هیچِ،» و «اِلّا یَتِه خِدا، خِدای دییَری دَنیِه.»

⁵ چون هر چَن دَرِنِه اونانیگه خِدایِن بَخونِس وونِنِه، چی زَمینی دِلِه و چی آسِمونی دِلِه، هَمونجور گه واقعاً هَم یَتِخِیلی’خِدایِن‘ و یَتِخِیلی’خِداوندِن‘ دَرِه -

⁶ با هین وجود، اَما فقط یَتِه خِدا دارمی، یَعنی آسمونی پیر، گه هَمه چی ویجائِه و اَما ویسِه هَسمی؛ و فقط یَتِه خِداوَند دَرِه، یَعنی عیسی مَسیح، گه هَمه چی وی طریقی جائه و اَما وی طریقی جا هسمی.

⁷ هر چَن هَمه هَین معرفتِ نارِنِه. ولی بعضیا تا اَلَن جوری بِتیشونِه عادت هاکِردِنِه گه اگه همین اَلَن هَم هَینجور خِراکهایی بَخارِن، خیال کِنِنِه هون خِراک راساسی بِتیشونی پیشکَش بَوِه؛ و از اوجِه گه وِشون ضعیفِ وِجدان دارِنِه، نَجِس وونِنِه.

⁸ «خِراک، اَمارِه خِدارِه نَزیک نَکِنِّه»؛ نا نَخاردَنی هَمرا بَدتَر وومی، نا بَخاردَنی هَمرا بِهتر.

⁹ ولی مِواظب ووئین شِمِه هَین حَق، هینی باعث نَوو گه ضعیفِ آدَمن لَغزش بَخارِن.

¹⁰ چون اگه اونیگه یَتِه ضعیفِ وِجدان دارنِه، تِرِه گه هَینی خَوَری معرفت دارنی، بِت خِنِه ای دِلِه غذایی سَر بَوینِه، مَگِه وی هَم وسوسه نَوونِه بِتیشونی پیشکَش بَوِه خِراکِ بَخارِه؟

¹¹ هَینجوری، تی معرفت باعث وونِه هون ضعیفِ آدم هلاک بَوو گه مَسیح وی خاطری بَمِردِه.

¹² پس وختی هَینجوری شی بِرارِنی علِیه گِناه کِنِنی و وِشونی ضَعیفِ وِجدانِ زخمی کِنِنی، مسیحی علِیه دِ گِناه کِنِنی.

¹³ هَینِسه، اگه خِراک می بِراری لغزشی باعث وونِه، هیچ وخت گوشت نَخارمِه تا وی لَغزِشی باعث نَووم.