اوّلین نامِه قُرنتیانی سِه 7 - کتاب مقدس به زبان مازندرانی - گویش غربی

عروسی ای خَوَری

¹ اِسا هون چیایی خَوَری گه میسِه بَنوِشت وِنی: «مَردی سِه خِب نیِه گه یَتِه زَنارِه دَس هاکِنِه.»

² ولی بی عِفَتی هایی وَسوسه ای خاطری گه دَرِه، هر مَردی وِنِه شی زَنارِه دارِه، و هر زَنا شی مَردی رِه دارِه.

³ مَرد وِنِه دِینی گه نِسبت به شی زَنا دارنِه رِه بِجا بیارِه و زَنا هَم وِنِه دِینی گه نِسبت به شی مَردی دارنِه رِه بِجا بیارِه.

⁴ چون زَن شی تَنی اختیارِ نارنِه بَلگی وی مَردی وی تَنی اِختیارِ دارنِه، و مَرد هَم شی تَنی اختیارِ نارنِه بَلگی وی زَنا وی تَنی اختیارِ دارنِه.

⁵ هَمدِیَرِ بی نَصیب نِلین، بِجز هینگِه اَقَدّی و همدیری رضایتی هَمرا ووئِه تا شی وَختِ دِعایی سِه بِلین. ولی اَزما اَی هَم هَمدِیَری هَمرا دَووئین، نَکِنِه شِیطان شِمارِ هَینی خاطری گه نَتِنِّنی شی دَمِ دارین وَسوَسِه ای دِلِه اِنگِنِه.

⁶ مِن هَینِه حِکم نَکِمِّه، بَلگی فقط جایِز دِمِّه.

⁷ کاش هَمه می تَرا وِنِه، ولی هر کی شی عطیِه رِه خِدایی جا بَیتِه؛ یَتِه یَجور عطیِه دارنِه و هون یَتّا یَجور دییَر.

⁸ اَذَبِن و بیوِه‌ زَناکِنِنِ گِمِه گه خِبِ می تَرا اَذَب بَمونِن.

⁹ ولی اگه نَتنِّنِه شی دَمِ بیرِن، وِنِه عروسی هاکِنِن، چون عروسی هاکِنِن بِهترِ تا هَوسی تَشی دِلِه بَسوجِن.

¹⁰ می حِکم اونانیگه عروسی هاکِردِنِه ای سِه هَینِه - نا می حِکم: بَلگی خِداوندی حِکم - گه زَن نِنِه شی مَردی ای جا سیوا بَوو.

¹¹ ولی اگه هَینجور هاکِردِه، دِ نِنِه شی هاکِنِه و یا هَینگه وِنِه شی مَردی ای وَر دَگِردِه. مَرد هَم نِنِه شی زَنارِه طلاق هادِه.

¹² بَقیه رِه گِمِه - مِن گِمِه نا خِداوَند - گه اگه یَتِه بِرار بی ایمونِ زَنا دارنِه و هون زَنا راضیِه گه وی هَمرا زندگی هاکِنِه، هون بِرار نِنِه شی زَنارِه طلاق هادِه.

¹³ اگه یَتِه زَنا، بی ایمونِ شی دارنِه و هون مَردی راضیِه وی هَمرا زندگی هاکِنِه، هون زَنا نِنِه شی مَردی رِه طلاق هادِه.

¹⁴ چون بی ایمونِ مَردی شی زَنایی خاطری تقدیس وونِه و بی ایمونِ زَنا شی مَردی ای خاطری تقدیس وونِه. وَگَرنَه، شِمِه وَچیلِه نَجِس وونِسِنِه؛ ولی هَینجور نیِه، بَلگی وِشون مِقدَّسِنِه.

¹⁵ ولی اگه اونیگه بی ایمونِ بَخواد سیوا بَوو، بِل هَینجور هاکِنِه. هَینجور موقِه دِ ایموندارِ بِرار یا خاخِر مَجبور نیِه وی هَمرا زندگی هاکِنِه. خِدا اَمارِه صِلح و سلامَتی ای سِه بَخونِسِه.

¹⁶ چون اِی زَن، کِجِه دَری دِنّی نَتِنّی شی مَردی رِه نِجات هادی؟ یا اِی مَرد، کِجِه دَری دِنّی گه نَتِنّی شی زَنارِه نِجات هادی؟

¹⁷ فقط، هر کی هَمونجور زندگی هاکِنِه گه خِداوَند ویسِه دَر نَظَر بَیتِه و خِدا اونیسِه وِرِه بَخونِسِه. هَین حِکمیِه گه مِن دِشتِه کلیساهایی دِلِه گِمِه.

¹⁸ مَگِه هیچکی دَوِه هون موقِه گه دِ بَخونِس وونِسِه خَتنِه هَسوِه وو؟ هینی دِمال دَنیوو گه خَتنِه ای نِشونِهارِه بَیرِه. مَگِه هیچکی دَوِه هون موقِه گه دِ بَخونِس وونِسِه خَتنِه نَوِه وو؟ هون آدَم خَتنِه بَووئَنی دِمال دَنیووئه.

¹⁹ چون خَتنِه بَووئَن یا نَووئن مِهم نیِه، بَلگی خِدایی احکامِ داشتن مِهمِه.

²⁰ هر کی هر وضعی دِلِه گه بَخونِس بَوِه بَمونِّه.

²¹ هون موقِه گه بَخونِس بَوِئی، نوکر وِه ای؟ نَتِرس. ولی اگه بَتِنّی شی آزادی رِه بِدَس بیاری، فرصتِ از دَس نَدِه.

²² چون اونیگه خِدایی طرفی جا نوکَری ای سِه بَخونِس بَوِه، خِداوَند وِرِه آزاد هاکِردِه. هَمونجور اونی هَم گه آزادی ای دِلِه بَخونِس بَوِه، مَسیحی نوکرِ.

²³ یَه قیمتی هَمرا بَخری بَوِنی، آدَمِنی نوکَر نَووئین.

²⁴ پس، اِی بِرارِن، هر کی هر وضعی دِلِه گه بَخونِس بَوِه، هَمون وَضعی دِلِه خِدایی حِضور بَمونِّه.

اَذبِن و بیوِه زَناکِنِن

²⁵ و ولی اَذَبِنی خَوَری، خِداوندی جا حِکمی نارمِه؛ ولی بعنوان کَسی گه خِداوندی رَحمَتی طریق قابل اعتمادِ، شی گَبِ زَمِّه.

²⁶ مِن فِکر کِمِّه گه هَین زَمونِه ای سختیایی خاطری، آدَمی ای سِه بِهترِ هَمون وضعی دِلِه گه دَرِه، بَمونِّه.

²⁷ اگه زَن دارنی، سیوا بَووئَنی دِمال دَنیواش، و اگه زَن نارنی، زَن بَوردنی دِمال دَنیواش.

²⁸ ولی اگه زَن بَوِری، گِناه نَکِردی؛ و اگه یَتِه اَذَبِ کیجایی هَمرا عروسی هاکِنِه، گِناه نَکِردِه. با هین وِجود، اونانیگه عروسی کِنِنِه هَین زندگی ای دِلِه سختی کَشِنِنِه و مِن نَخوایمِه شِما زَجر بَکِشین.

²⁹ بِرارِن، می منظور هَینگه وَخت کَمِ. بعد از این، اونانیگه زَن دارِنِه جوری زندگی هاکِنِن گه اِنگار زَن نارِنِه؛

³⁰ و اونانیگه عزادارِنِه، جوری رَفتار هاکِنِن گه اِنگار عَزادار نینِه؛ و اونانیگه خِشالِنِه، جوری رَفتار هاکِنِن گه اِنگار خِشال نینِه؛ و اونانیگه یَچی خَرینِنِه، جوری رَفتار هاکِنِن گه اِنگار هیچی نَخرینِه؛

³¹ و اونانیگه هَین دِنیایی جا مَنفعت وَرِنِه، جوری رَفتار هاکِنِن گه اِنگار مَنفعتی نَوِرِنِه. چون هَین دِنیایی اَلَنی وضع دِ گِذِرنِه.

³² می خواسِّه هَینِه گه هر دِلواپسی ای جا دور ووئین. اَذَبِ مَردی خِداوندی کارایی دِلواپسِ، هَینی دِلواپسِ گه چِتی خِداوندِ خِشال هاکِنِه؛

³³ ولی زَن دارِ مَردی هَین دِنیایی کارایی دِلواپسِ، هَینی دِلواپسِ گه چِتی شی زَنارِه خِشال هاکِنِه،

³⁴ و وی حواس خِدا و وی زَنایی میِن رَسد وونِه. هینجوری، اَذَب و یا نومزِدارِ کیجا، خِداوندی کارایی دِلواپَسِ، هَینی دِلواپسِ گه چِتی جسمی دِلِه و روحی دِلِه مِقدّس ووئِه. ولی شی دارِ زَنا هَین دِنیایی کارایی دِلواپسِ، هَینی دِلواپسِ گه چِتی شی مَردی رِه خِشال هاکِنِه.

³⁵ مِن هَینِنِه شِمِه مَنفعتی سِه گِمِه، نا هَینگه شِمِه دَمِ بَیرِم. بَلگی می منظور هَینِه گه دِرِس زندگی هاکِنین و بی هیچ دِلواپسی ای شِرِه خِداوندی سِه وقف هاکِنین.

³⁶ اگه یَنَفَر گِمون هاکِنِه گه دِ شی نومزِه ای هَمرا دِرِس رَفتار نَکِنِه، اگه خِیلی هَوَسیِه، و وِنِه هینجور هَم ووئه، بِلین اونچی گه وی نظر دَرِه رِه هاکِنِه: بِلین عروسی هاکِنِن، هَین گِناه نیِه.

³⁷ ولی اگه یَنَفَر شی تَصمیمی سَر دَرِه و فشاری دِلِه دَنیِه، بَلگی بَتنِّه شی دَمِ بَیرِه و شی تصمیمِ بَیتِه گه فعلاً شی نومزِه ای هَمرا عروسی نَکِنِه، هون هَم دِ خِبِ کار کِنِّه.

³⁸ پَس اونیگه شی نومزه ای هَمرا عَروسی کِنِّه، خِبِ کار کِنِّه؛ ولی اونیگه عروسی نَکِنِّه، حتّی کارِ بهتری هَم هاکِردِه.

³⁹ یَتِه زَنا تا وختی گه وی مَردی زینِّئِه، وی پابندِ. ولی اگه وی مَردی بَمِردِه، آزادِ تا هر کی گه خواینِه رِه بَوِرِه، فقط خِداوندی دِلِه.

⁴⁰ با هَین وِجود، مِن فِکر کِمِّه اگه شی نَکِنِه، خِشوَخت تَرِ؛ و گِمون کِمِّه گه مِنَم خِدایی روحِ دارمِه!