اوّلین نامِه قُرنتیانی سِه 2 - کتاب مقدس به زبان مازندرانی - گویش غربی

پولُس مسیحی مصلوب ووئَنِ اعلام کِنِّه

¹ اِی بِرارِن، هون موقِه گه شِمِه وَر بیمومِه، نیمومِه گه خِدایی رازیشونِه شِمِسِه، گَت گَتِه گَب یا حکمتی هَمرا اعلام هاکِنِم.

² چون تصمیم بَیت وِمِه شِمِه میِنی هیچی رِه نَئُنِم اِلّا عیسی مَسیح، هون هَم مَصلوب بَوِه عیسی.

³ مِن ضَعف و تَرس و لَرزی هَمرا شِمِه وَر دَوِمِه،

⁴ و می گَبا و می پِیغِم حکیمونِه کلماتی هَمرا گه قانع کِنِّه، نَوِه، بَلگی اونانِه خِدایی روح و خِدایی قِوَّتی هَمرا بُتِمِه.

⁵ تا شِمِه ایمون نا آدَمنی حکمتی هَمرا، بَلگی خِدایی قِوَّتی هَمرا ووئِه.

حکمت، خِدایی روحی جا

⁶ با هَین وِجود، اَما گَتِه آدمنی میِن حکمتِ گِمی، هر چَن نا حکمتی گه هَین زَمونِه ای جا ووئه یا اونانیگه هَین زَمونِه ای حاکِمِنی جانِه، گه بَمِردَنی سِه مَحکومِنِه،

⁷ بَلگی اَما خِدایی حکمتی جا گه راز هَسِّه و جاهادائه گَب زَمّی، همون حکمتی گه خِدا اونِه پِش از هَینگَه دِنیارِه خلق هاکِنِه اَمِه جَلالی سِه مِعیَّن هاکِردِه.

⁸ هَین زَمونه ای حاکِمِن هیچکدیم هَین حکمتِ نِفَهمِسِنِه، چون اگه اونِه فَهمِسِنِه، خِداوندِ جلالِ مصلوب نَکردِنِه.

⁹ هَمونجور گه اِشعیای پیغمبری کیتابی دِلِه، بَنوِشت بَوِه: «اونچی رِه گه هیچ چِشی نَئیِه، هیچ گوشی نِشنُسِه، و هیچکسی فِکر نَرسیِه رِه، خِدا شی دوسدارنی سِه فَراهم هاکِردِه.»

¹⁰ خِدا هَین چیارِه شی روحی طریقی جا اَمِسِه آشکار هاکِردِه. چون خِدایی روح هَمه چیرِه، دَکلاش وَکلاش کِنِّه حتّی خِدایی جَلترین رازیشونَم.

¹¹ چون کیِه گه آدَمی ای فِکرایی جا خَوَر دارِه، اِلّا شِه وی روح گه وی دِلِه دَرِه؟ هَینِسه، فقط خِدایی روحِ گه خِدایی فِکرایی جا خَوَر دارنِه.

¹² اِسا اَما نا هَین دِنیایی روح، بَلگی یَتِه روحِ بِدس بیاردمی گه خِدایی جائِه، تا اونچی خِدا اَمارِه هدیه هادارِه، دِنّیم.

¹³ و هَینی جا گَب زَمّی، اونَم نا هون کلماتی گه آدَمی ای حِکمتی جا یاد بَئیت ووئیم، بَلگی هون کلماتی هَمرا گه خِدایی روح اَمارِه یاد دِنِه؛ هَینِسه روحانی حَیقَتارِه اونانیسِه گه خِدایی روحِ شی دِلِه دارِنِه گِمی.

¹⁴ آدمی گه هوا و هوسی دِمال دَوو هون چیایی گه خِدایی روحِ ربط دارنِه رِه قَبول نَکِنِّه، چون وی نظر نادونیِه، و نَتِنِّه اونِه بِفَهمِه، چون فقط خِدایی روحی هَمرا بِشِنِه اونی دِرِسی رِه تشخیص هادائن.

¹⁵ آدَمی گه خِدایی روحِ دارنِه هَمه چی ای خَوَری داوری کِنِّه، ولی هیچکی نَتِنِّه وی خَوَری داوری هاکِنِه.

¹⁶ «چون کیِه گه خِداوندی فِکرِ بِفَهمِه تا وِرِه تعلیم هادِه؟» ولی اَما مَسیحی فکرِ دارمی.