اوّلین نامِه قُرنتیانی سِه 14 - کتاب مقدس به زبان مازندرانی - گویش غربی

نَبِوّت هاکِردن و دییَر زِوونایی هَمرا گَب بَزوئن

¹ مِحبتی دِمال دَووئین و غیرتی هَمرا روحانی عطایا رِه بَخواین، بِخصوص هَینگه نَبِوّت هاکِنین.

² چون اونیگه دییَر زِوونی هَمرا گَب زَنِّه، نا آدَمِنی هَمرا بَلگی خِدایی هَمرا گَب زَنِّه. چون هیچکی وی گَبِ نِفَهمِنِه، ولی هون آدم خِدایی روحی طریقی جا رازیشونِه گِنِه.

³ ولی اونیگه نَبِوّت کِنِّه، آدَمنی هَمرا گَب زَنِّه، تا وِشونی ایمونِ تقویت و تشویق هاکِنِه، و اونانِه دِلداری هادِه.

⁴ اونیگه دییَر زِوونی هَمرا گَب زَنِّه شی ایمونِ تقویت کِنِّه، ولی اونیگه نَبِوّت کِنِّه کِلیسایی ایمونِ تقویت کِنِّه.

⁵ اِسا مِن خوایمِه گه دِشتِه شِما دییَر زِوونی هَمرا گَب بَزِنین، ولی ویشتَر خوایمِه گه نَبِوّت هاکِنین. اونیگه نَبِوّت کِنِّه، اونیگه دییَر زِوونی هَمرا گَب زَنِّه ای جا گَت تَرِ، مَگِه اونگه یَنَفَر ترجمه هاکِنِه تا کِلیسایی ایمون تقویت بَوو.

⁶ اِسا، اِی بِرارِن، اگه مِن شِمِه وَر بیئِم و دییَر زِوونایی هَمرا گَب بَزِنِم، چی منفعتی شِمارِ رَسامِّه، مَگِه هَینگه مکاشفه یا معرفت یا نَبِوّت یا تعلیمی شِمِسِه دارِم؟

⁷ حتّی اگه سازهایی گه جان نارِنِه، هِتی لَلِه وا و چنگی تَرا دِرِس بَزِه نَوون، چِتی بِشنِه بِفَهمِسَن چی آهنگی دِ بَزِه وونِه؟

⁸ اگه شیپور خِبِ صدا نَدِه، کی جنگی سِه آمادِه وونِه؟

⁹ شِمِه خَوَری هَم هَینجورِ. اگه شی زِوونی هَمرا گَبی بَزِنین گه نِشِنِه بِفَهمِسن، چِتی ینفر بِفهمِه گه چی گِنِنی؟ چون همون موقِه هِتی هَینی تَرائه گه هَوایی هَمرا گَب بَزِنین.

¹⁰ بی‌ گِمون دِنیایی دِلِه خِیلی جورواجورِ زِوون دَرِه، و هیچکِدیم بی‌معنی نینِه.

¹¹ ولی اگه مِن نَتِنَّم یَنَفر دییَری گَبی معنی رِه بِفهمِم، اونیسِه گه دِ می هَمرا گب زَنِّه یَتِه غریبِمِه و وی هَم میسِه غریبِئِه.

¹² شِمِه خَوَری هَم هَینجورِه. از اوجِه گه غیرتی هَمرا خِدایی روحی ظاهر بَووئنی دِمال دَرِنی، تَقلّا هاکِنین تا کلیسایی ایمونی تقویتی سِه تَرقّی هاکِنین.

¹³ هَینسِه، اونیگه دییَر زِوونی هَمرا گَب زَنِّه وِنِه دِعا هاکِنِه تا بَتِنِّه شی گَبِ ترجمه هاکِنِه.

¹⁴ چون اگه مِن دییَر زِوونی هَمرا دِعا هاکِنِم، می روح دِعا کِنِّه، ولی می عقل سودی نَوِرنِه.

¹⁵ پَس چی وِنِه هاکِنَم؟ شی روحی هَمرا دِعا کِمِّه، ولی شی عقلی هَمرا هَم دِعا کِمِّه؛ شی روحی هَمرا حمد و ثنایی سرود خومِّه، ولی شی عقلی هَمرا هَم حمد و ثنایی سرود خُومِّه.

¹⁶ به غیر از این، اگه تو روحی دِلِه شِکر هاکِنی، چِتی اونیگه نِفَهمِنِه گه تو چی گِنی، تی شِکر هاکِردنی سِه آمین بُئِه؟ چونگه نَئُونِّه تو دِ چی گِنی!

¹⁷ چون تو دِ دِرِس شِکر کِنّی، ولی تی شِکر هاکِردَن یَنَفر دییَری ایمونی تقویتی باعث نَوونِه.

¹⁸ خِدارِه شِکر کِمِّه گه شِما هَمه ای جا ویشتَر دییَر زِوونایی هَمرا گَب زَمِّه؛

¹⁹ با هَین وِجود، هَینِه دِمِّه کِلیسایی دِلِه پَنج تا کَلمه شی عَقلی هَمرا گَب بَزِنِم تا بقیِه رِه تعلیم هادا ووم، هَینی جا بِهتَرِ گه هِزارِن کلمه دییَر زِوونایی هَمرا گَب بَزِنِم.

²⁰ اِی بِرارِن، فکر هاکِردنی دِلِه هِتی وَچیلِه ای تَرا نَووئین، بَلگی بَدی هاکِردَنی دِلِه هِتی وَچیله ای تَرا ووئین. ولی، فکر هاکِردنی دِلِه گَتِ آدم ووئین.

²¹ توراتی دِلِه بَنوِشت بَوِه گه: «خِداوَند گِنِه، ”دییَر زِوونایی هَمرا غَریبِه ایشونی تِکی هَمرا هَین قومی هَمرا گَب زَمِّه. با هَین وِجود، حتّی وِشون مِنِه گوش نَدِنِنِه.»

²² پَس دییَر زِوونا، یَتِه نِشونِئه نا ایموندارِنی سِه بلگی بی ایمونِنی سِه، ولی نَبِوّت یَتِه نِشونِئه ایموندارِنی سِه و نا بی ایمونِنی سِه.

²³ پس، اگه دِشتِه کلیسایی آدَمِن هی وَر جَم بَوون و هَمه دییَر زِوونایی هَمرا گَب بَزِنِن، و همون موقِه اونایی گه هیچی ای جا خَوَر نارِنِه یا اونایی گه ایمون نارِنِه مِجلسی دِلِه بیئِن، مَگِه نُنِنِه گه شِما خِلِنی؟

²⁴ ولی اگه هَمه نَبوّت هاکِنِن، و اونانیگه هیچی ای جا خَوَر نارِنِه و یا اونانیگه ایمون نارِنِه مِجلسی دِلِه بیئِن، هَمه باعث وونِنِه گه هون آدم قانع بَوو گه گِناهکارِ، و وی هَمه ای پِش قِضاوت وونِه.

²⁵ هون آدمی دِلی رازا فاش وونِه، همون موقِه شی دیمِ بِنِه ای سَر اِلنِه، خِدارِه پَرَسِش کِنِّه و اعلام کِنِّه گه: «حَیقَتاً خِدا شِمِه میِن دَرِه.»

²⁶ پَس اِی بِرارِن، منظور چیِه؟ وختی گه هی وَر جَم وونِنی، هر کی حمد و ثنایی سرودی، تعلیمی، مکاشفه‌ای، زِوونی و یا ترجمِه‌ای دارنِه. بِلین هَینِن هَمه ایمونی تقویتی سِه به‌کار بورِه.

²⁷ اگه ینفر دییَر زِوونی هَمرا گَب بَزِنِه، بِلین فقط دِ نفر یا نهایتاً سِه نَفر اونَم نوبتی گَب بَزِنِن و یَنَفر هَم ترجمِه هاکِنِه.

²⁸ ولی اگه ینفر دَنیوو ترجمه هاکِنِه، هر کدیم از وِشون کلیسایی دِلِه ساکت بَمونِّن و شی دِلی دِلِه و خِدایی هَمرا گَب بَزِنِن.

²⁹ بِلین وِشونی جا دِ یا سِه نفر گه نَبِوّت کِنِنِه گَب بَزِنِن و بقیه وِشونی گبِ سَبِک سنگین هاکِنِن.

³⁰ و اگه یَنَفَر دییَر گه اوجِه نیشتِه یَتِه مکاشفه‌ بَیرِه، اوّلین نفر وِنِه ساکت بَوو.

³¹ چون هَمه بَتِنِّنی نوبَتی نَبِوّت هاکِنین تا هَمه تعلیم بَیرِن و هَمه تَشویق بَوون.

³² اَنبیایی روح اَنبیایی مِطیعه.

³³ چون خِدا، هرج و مَرجی خِدا نیِه، بَلگی صِلح و سلامتی ای خِدائِه، هَمونجور گه مِقدَّسینی دِشتِه کلیساهایی دِلِه هَینجورِ.

³⁴ زَناکِنِن وِنِه کلیسایی دِلِه ساکِت بَمونِن. چون وِشونِه اجازِه هادا نَوِه گه گَب بَزِنِن، بَلگی وِنِه طبقِ اونچی گه شریعت گِنِه، مِطیع ووئِن.

³⁵ اگه یَچی دَرِه گه خواینِنِه یاد بَیرِن، خِنِه ای دِلِه شی مَردی ای جا بَپُرسِن، چون کلیسایی دِلِه گَب بَزوئن زَنایی سِه عیبِ.

³⁶ مَگِه خِدایی کَلام، شِمِه جا بیمو یا فقط شِمارِ بَرِسیِه؟

³⁷ اگه ینفر شِرِه پِیغمبر یا آدَمی گه خِدایی روحِ دارنِه دِنِّه، وی وِنِه تأیید هاکِنِه گه اونچی شِمِسِه نِویسِمِه یَتِه حِکم، خِداوندی جائه.

³⁸ اگه ینفر هَینِ تأیید نَکِنِه، وی شِه هَم تأیید نَوونِه.

³⁹ پَس، اِی می بِرارِن، دِشتِه غیرتی هَمرا نَبِوّت هاکِردَنی دِمال دَووئین، و دییَر زِوونایی گَب بَزوئَنی دَمِ نَئیرین.

⁴⁰ ولی هَمه چی وِنِه دِرِس و به قاعدِ اَنجام بَوو.