Wongeela Yohaannis 9 - WAADAA LAMMATAA

Yesuus Namicha Ballaa Fayyise

¹ Uduu karaa san irra lufa'aaru nama urga dhalate irraa jalqabee ballaa ta'e tokko arge.

² Darasoonnillee, «Barsiisaa'a, akka namni kun ballaa ta'ee dhalatuuf ka cubbuu hojjate eennu? Isa moo worra isaati? jedhanii isa gaafatan.

³ Yesuusillee akkana isaaniin jedhe, akka hujiin Rabbii isa irratti mudhatuuf malee, inni yookiin maatiin isaa cubbuu hin hojjanne.

⁴ Uduu hin halkanoofne hujii ka na ergee huja. Halkan eennullee hojjachuu hin dandeenne waan dhufuuf.

⁵ Ani adunyaa tana irra haga jiru, ifa adunya'aati»

⁶ Kana jedhee lafatti gadi tufee hancufaan biyyee dukkuuseeti dhoqqee ija ballichaa dibee,

⁷ «Gara haroo Salihoomiititti dhaqiitii dhiqadhu» jedheen, «Salihoom» jechuun ka ergame jechu'u. Kanaaf dhaqee dhiqatee, arga'aa deebi'e.

⁸ Ollaan isaatiif achiin dura worri hennaa inni kadhatu arga'aa turan. «Kun ka taa'ee kadhatu sanii mii?» jedhan.

⁹ Gariin, «Isuma» jedhan; Kuuwwan ammoo, «Waa, isa fakkaata malee, isaa miti» jedhan. Inni ammoo, «Anuma» jedhe.

¹⁰ Eeganaa, «Ijji tee attamiin sii banamte ree?» jedhaniin.

¹¹ Innillee deebisee, «Namichi Yesuus jedhamu biyyee jiisee ija tiyya dibee, gara haroo Salihoomii dhaqiitii dhiqadhu naan jedhe. Anillee dhaqee dhiqadhee, arge» jedhe.

¹² Isaan, «Inni amma eessa jira?» jedhanii isa gaafatan. «Hin beeku» jedhe.

Fariisonni Namicha Ijji Isaa Fayyiteef Qoratan

¹³ Namicha duraan ballaa ture gara Fariisotaa fidan.

¹⁴ Yesuus biyyee dhoqqeessee guyyaan ija isaa itti bane sun Sambata diqqa'a.

¹⁵ Kanaaf Fariisonni ammoo attamitti akka arge ammallee isa gaafatan. «Inni dhoqqee ijatti naa godhe hin dhiqadhe ijji tiyyallee hin argite!» isaaniin jedhe.

¹⁶ Fariisota keessaa gari gariin, «Namni kun Sambata waan hin kabajjineef Rabbiin irraa hin dhufne» jedhan, kuuwwan ammoo «Namni cubbamaan maalalee akkanaa kanniin godhuu attamitti danda'a?» jedhanii wol fooyan.

¹⁷ Sababaa kanaaf namicha ballaa sanniin, «Ati waan namicha ija tee banee maal jetta?» jedhaniin. Innillee, «Raatticha» isaaniin jedhe.

¹⁸ Yihuudonni namichi kun akka dura ballaa ta'e, maayessa ammoo akka ijji isaa argite haga worra isaa waamanii gaafatanitti hin amanne.

¹⁹ Isaannillee Ilmi keessan ka ballaa ta'ee dhalate jettan kanaa? Eegasuu amma attamitti arguu danda'e ree? jedhanii isaan gaafatan.

²⁰ Maatiin isaallee isaaniin, «Kun mucaa keenna ta'uu ballaa ta'ee dhalatuu isaa hin beenna.

²¹ Haata'uu ammoo amma attamiin akka arge hin beennu yookiin ija isaa eennu akka bane nu hin beennu isa gaafadhaa'a inni nama gudda'aa, inninuu waan ufii hin dubbataa» jedhan.

²² Maatiin isaa waan Yihuudota sodaataniif kana jedhan, ka inni Kiristoos jedhee ragu yoo jiraate, Yihuudonni mana sagada Yihuudotaatii akka isaan hin baafneef Yihuudonni waan woliigalaniiraniif.

²³ Kanaaf maatiin, «Inninuu nama uf danda'ee isa gaafadhaa'a!» jedhan.

²⁴ Kanaaf namicha ballaa ammallee isa waamanii, «Rabbiin kabajji namni kun cubbamaa ta'uu isaa nu hin beenna» jedhaniin.

²⁵ Innillee deebisee, «Ani cubbamaa ta'uu isaa ammoo hin beeku, ani ballaa akka ture, amma ammoo arguu kiyya callaa beeka» jedhe.

²⁶ Ammallee deebisanii, «Maal sii godhe? Attamitti ija tee bane?» jedhaniin.

²⁷ Innillee deebisee, «Qaraa isinitti himeera, isin ammoo na hin dhageenne, maaf lammaffaa dhagayuu feetan? Isinillee akkasuma darasaa isaa ta'uu feetanii?» isaaniin jedhe.

²⁸ Isaan ammoo isa arrabsaniiniiti, «Situ darasaa isaa ti, nu ammoo darasoota Muuse'ee ti.

²⁹ Rabbi akka Muuse'etti dubbate nu hin beenna. Namni kun ammoo, inni eessaa akka dhufe hin beennu!» jedhaniin.

³⁰ Namichillee deebisee akkana isaaniin jedhe, «Eessaa akka dhufe wollaaluun keessan kun waan maalalchiisa'a! Waa maraafuu inni ija tiyya baneera.

³¹ Ka Rabbiin sodaatu, fedha isaallee ka hojjatu yoo jiraate, isa sanii Rabbi dhagaya malee, cubbamoota akka hin dhageenne hin beenna.

³² Ka ijji isaa ballaa ta'ee dhalate, urga adunyaan uumamte irraa jalaqabee, ka ija ballaa fayyise dhagayamee hin beeku.

³³ Namni kun uduu Rabbiin irraa dhufuu dhabaatee silaa womaa godhuu hin danda'u.»

³⁴ Isaan ammoo deebisanii, «Nafti kee hoomaanuu cubbu'uun dhalate. Situ nu barsiisaa?» jedhanii gara diidaa isa baasan.

Qalbifannaa Ayyaanaatiin Ballaa Ta'uu'u

³⁵ Yesuusillee akka gara diidaa isa baasan hennaa dhagaye, «Ati Ilma Namaatitti amantaa?» jedheen.

³⁶ Innillee deebisee, «Gooftaa kiyya, ani isatti amanu'uufuu inni eennu?» jedhe.

³⁷ Yesuusillee, «Ati isa argiteerta innillee isuma si woliin qaaqa'aaru kana» jedheen.

³⁸ Innillee, «Gooftaa kiyya! Hin amana» jedhee sagadeef.

³⁹ Yesuusillee, «Worri hin argine akka argan, worri argan akka jaaman, ani gara adunyaa tanaa murti'iif dhufeera» jedhe.

⁴⁰ Fariisota keessaa worri isa woliin jiran ammoo kana dhagayanii, «Nu balla'aa?» jedhaniin.

⁴¹ Yesuusillee akkana isaaniin jedhe, «Ballaa uduu taatanii silaa cubbuu isinitti hin ta'u, amma ammoo hin argina jettan, cubbuun teessan ammoo akkasumatti jiraatti» jedhe.