Wongeela Maatewos 7 - WAADAA LAMMATAA

Namarratti Murteessuun Hin Barbaachisu

¹ Yesuus, «Rabbi akka isinitti hin murteessine, isin namatti hin murteessinaa'a.

² Murtima isin namatti murteessitaniin isinittillee murteeffama. Safartuma isin namaaf safartaniin isiniifillee safarama.

³ Huuba ija obboleessa keetii keessa jiru maaf laalta! utubaa ija tee keessa jiru maaf arguu dadhabde?

⁴ Uduu utubaan ija tee keessa jiru, attamitti obboleessa keetiin, ‹Huuba ija tee keessaa sii baasa› jettaan?

⁵ Ati nama fakkeessaa'a! duraan dursii utubaa ija tee keessa jiru baasi. Achiin maayessa huuba ija obboleessa keetii keessa jiru baasu'uuf, midhaassitee arguu dandeetta.

⁶ «Waan woyyoome sariinii hin kenninaa'a; isinitti garagalanii isin ciniinanii. Meeshaa keessan ka gatii mi'a'aa booyyota afoo hin buusinaa'a!»

Kadhadhaa'a, Barbaadaa'a, Dhadhayaa'a

⁷ «Kadhadhaa'a isinii kennamaa; barbaadaa'a hin argattanii; balbala dhadhayaa'a isin jalaa banamaa.

⁸ Ka kadhatu maruu hin fudhata, ka barbaadullee hin argata, Ka balbala dhadhayuufillee hin banama.

⁹ Isin keessaa ilmi isaa yoo xoroshoo kadhate, ka dhagaa kennuuf eennu?

¹⁰ Yookiin yoo qurxummii kadhate, bofa kennaafii?

¹¹ Eegasuu isin hammeeyyii taatanii, ijoollee teessaniif kennaa mishaa kennuu yoo beettan, Abbaan keessan ka samii jiru worra kadhataniif, attamitti waan mishaa caalchisee hin kennine ree?

¹² Eeganaa «Waan namoonni akka isinii godhan barbaaddan, isinillee akkasuma isaaniif godhaa'a. Seerrinii fi raattonnillee kanuma barsiisan.»

Waan Karra Dhipho'oo

¹³ «Karra dhipho'oon seenaa'a! Karaan gara badi'ii fidu badha'a; karrillee badhoo waan taateef, worri karra saniin seenu heddu.

¹⁴ Karaan gara jireennaa fidu qadho'o; karrillee dhiphoo waan taateef, worri karaa jiru'uu san argatu diqqa'a.»

Mukaa Fi Daraaraa

¹⁵ Yesuus ammallee, «Raattota dharaa irraa uf eeggadhaa'a; hoolaa fakkaachu'uuf gogaa hoola'aa uffatanii, gara keessan hin dhufan; keessi isaanii ammoo akka Yayyii beeloftee ti.

¹⁶ Daraaraa hujii isaaniitiin isaan beettan. Qoree irraa woyinii, qummuudduu irraa hurbuu hin guuranii?

¹⁷ Akkasuma munni mishaan maruu daraaraa mishaa daraara. Munni badaan daraaraa badaa daraara.

¹⁸ Munni mishaan daraaraa badaa daraaruu yookiin munni badaan daraaraa mishaa daraaruu hin danda'u.

¹⁹ Munni daraaraa mishaa hin daraarre martinuu muramee ibiddatti gatama.

²⁰ Kanaaf daraaraa isaaniitiin isaan beettan.»

Ani Sirimaa Isin Hin Beeku

²¹ Yesuus, «Fedhii Abbaa kiyya ka samii jiruu nama hujutu jeennata sami'ii gala malee, ka, ‹Gooftaa, Gooftaa› jedhee na waamu marti hin galu.

²² Guyyaa san, namoonni hedduu, ‹Gooftaa, Gooftaa! maqaa keetiin raaga hin dubbannee? Maqaa keetiin jinnii hin baafnee? Maqaa keetiin baasa hedduu hin hunyee?› naan jedhan.

Jara Lamaan Mana Ijaartu

²³ Ani ammoo, ‹Isin dhartoota sirimaa isin hin beeku; narraa fagaadhaa'a› jedhee isinitti rageessa.»

²⁴ Yesuus, «Namni dubbii kiyya kana dhagayee hujii irra oolchu, namicha qaroo mana ufii dhagaa irratti ijaarate fakkaata.

²⁵ Roobni roobee, lolaan lola'ee, bubbeen bubbisee, mana san dhiibe. Manni ammoo lafa qarsaa irratti waan ijaarameeruuf hin jinne.

²⁶ «Namni dubbii kiyya kana dhagayee hujii irra hin oolchine, namicha gowwaa mana ufii shashareeirratti ijaarate fakkaata.

²⁷ Roobni roobee, lolaan lola'ee, bubbeen bubbisee, mana san dhiibe. Manni sunillee jigee akka malee butute» jedhe.

Baallii Yesuusii

²⁸ Yesuus hennaa dubbii kana dubbatee fixe, gumiin barumsa isaa hin baaseffate.

²⁹ Inni akka barsiisota seera Muuse'eetitti uduu hin ta'in, akka nama baallii qabuutitti waan isaan barsiiseef.