Wongeela Maatewos 27 - WAADAA LAMMATAA

Yesuusiin Gara Philaaxoosii Fidan

¹ Haga lafti bari'e bulchoonni gadootaatii fi manguddoonni gumi'ii maruu Yesuusiin ajjeesu'uuf mari'atan.

² Yesuusiin hidhanii gara bulchaa Philaaxoos Pheenxanichaatitti dabarsanii kennan.

Du'uu Yihuudaa Yesuusiin Dabarsee Kennee

³ Hennaa san Yihuudaan isa dabarsee kenne akka isatti murteeffame argee gaabbee, birrii soddomaa san bulchaa gadootaatii fi manguddootaa deebisee,

⁴ «Ani dhiiga nama Woyyu'uu dabarsee waan kenneef yakkeera» isaaniin jedhe. Isaan ammoo, «Maaltu nu dhibe ree? Hajaa keeti!» jedhaniin.

⁵ Yihuudaan birrii mana woyyuu keessatti gatee, deemee uf hudhee du'e.

⁶ Bulchoonni gadootaa birrii san fuudhanii, «Birriin kun gatii dhiigaa waan ta'eef, kennaa Mana Woyyu'uutitti makuun seeraa miti» jedhan.

⁷ Isaan mari'atanii namicha faara dhayu irraa lafa awwaala keessummootaa bitaniin.

⁸ Sababa kanaaf lafti sun haga adhaa, «Lafa dhiigaa» jedhamte.

⁹ Hennaa san wonti dubbii Ermiyaasiitiin isaan birrii soddoma akka gatii isaa taatuuf ijoolleen Israa'elii gariin salla'anii fuudhanii,

¹⁰ Akkuma Gooftaan ajajetti gatii lafa namicha faara dhayuuti jedhee dubbate sun raawwatame.

Yesuus Philaaxoosiin Afoo Dhiyaate

¹¹ Yesuusillee bulchaa afoo dhaabate; bulchaanillee, «Ati mootii Yihuudotaatii?» jedhee isa gaafate. Yesuus, «Maarre atuu jette» jedheen.

¹² Bulchoonni gadootaatii fi manguddoonnillee hennaa isa himatan womaa isaanitti hin deebifne.

¹³ Hennaa san Philaaxoosi namni hagamii akka sitti rageesse hin dhageettuu? jedheen.

¹⁴ Inni waan tokkollee hin deebifneef; Kanaafuu bulchaan guddisee maalale.

¹⁵ Hennaa ayyaanaa san mootiin biyyaa nama hidhame ka baniin jaalatu tokko isaanii hiikuu aadaa qaba.

¹⁶ Hennaa san nama dharaan beekkamu ka Baarbaan jedhamu tokko mana hidha'aa keessa jira.

¹⁷ Isaan walgayanii uduu jiran Philaaxoos, «Eennuun isinii hiika? Baarbaaniin moo Yesuusii Kiristoos jedhamu?» isaaniin jedhe.

¹⁸ Inni akka hinaaffa'aan dabarsanii isa kennan waan beekuuf.

¹⁹ Uduu inni teessoo murti'ii irra taa'eeru, haati manaa isaa waan isaatiif adha eebju'uun rakkoo gudda'atu narra gayeera. Nama qajeelaa kana womaa hin godhin jettee isatti ergite.

²⁰ Bulchoonni gadootaatii fi manguddoonni Baarbaaniin akka isaanii hiikaniif Yesuusiin ammoo akka ajjeessisaniif gumii shelatan.

²¹ Bulchaanillee deebisee, «Lamaan keessaa eennuun akka isinii hiiku feetan» isaaniin jedhe. Isaanillee, «Baarbaaniin nuu hiiki!» jedhan.

²² Philaaxoos eegasuu, «Yesuus Kiristoos ka jedhamu maal haa godhu ree?» isaaniin jedhe. Isaan martinuu, «Inni haa fannifamuu!» jedhan.

²³ Bulchaan wonti inni godhe, balleessaan isaa maali'i? jedhe. Isaan ammoo haa fannifamuu jedha'aa iyya'aa guddisanii wocan.

²⁴ Philaaxoos booressuu ta'a malee womaa godhuu akka hin dandeenne haga arge, bisaan fudhateeti, dhiiga nama qajeela'aa kana irraa ani qulqullu'u; isintu itti gaafatama jedhee, gumii afo'otti harka ufii dhiqate.

²⁵ Gumiin martinuu deebisanii, «Dhiinni isaa nu'uu fi ijoollee teenna irra haa ta'uu» jedhan.

²⁶ Achiin maayessa inni Baarbaaniin isaanii hiikee, Yesuus ammoo tumamee akka fannifamu dabarsee kenneen.

²⁷ Hennaa san hidhattoonni bulcha'aa, Yesuusiin gara dallawa bulcha'aa geessanii, hidhattoota maraa isa biratti wolitti qaban.

²⁸ Uffatallee isa irraa mulqanii uffata diimaa itti uwwisan.

²⁹ Gaalee qoree irraa Korbobboo maranii mataa isaa irra kaayan. Ulee harka mirgaatiin qabsiisanii, afoo isaatitti jilbiiffatanii, «Mootii Yihuudi'ii, nageenni siif haata'u!» jedha'aa itti balda'aa,

³⁰ Itti tufan, uleellee harkaa fuudhanii mataa keessa dhayan.

³¹ Haga itti baldaniin maayessa, uffata diimaa irraa mulqanii uffata isaa itti uwwisanii fannisu'uuf achi fidan.

Yesuus Fannifame

³² Hennaa bayan namicha Simoon jedhamu ka biyya Qareena'aa arganii, fannoo Yesuusii akka baatu hunnaan isa giddisiisan

³³ Isaan hulee golgootaa jedhamtu dhufan; «Golgootaa» jechuun «Hulee buqqee mata'aa» jechu'u.

³⁴ Daadhii woyini'ii ka hadhooftu'uun makame haa dhugu'uuf kennaniif. Afaaniin qabee dhuguu jibbe.

³⁵ Haga fannisaniin maayessa uffata isaatitti hiree hixaa buusanii qoodaman.

³⁶ Achuma taa'anii eega'aa turan.

³⁷ Isaan barreeffama ittiin isa himatan, «Yesuusiin kun mootii Yihuudi'iiti» jedhu, mataa isaa gubbaa kaayan.

³⁸ Hennaa san shiftoonni lamaa tokko mirgaan, tokko bita'aan isa woliin fannifaman.

³⁹ Worri isa bira lufanillee mataa ufii sochoosa'aa arrabsa'aanii turan.

⁴⁰ «Ati ka mana woyyuu diiddee guyyaa sadihitti ijaartu, mee uf fayyisi. Ilma Rabbii yoo taate mee fannoo irraa gadi bu'i.» jedhaniin.

⁴¹ Akkasuma bulchoonni gadootaa, barsiisonni Seeraatii fi manguddoota woliin itti balda'aa akkana jedhan.

⁴² «Inni kaawwan fayyiseera; uf fayyisuu hin danda'u. Inni mootii Israa'elii yoo ta'e, mee amma fannoo irraa gadi haa bu'uu; nullee itti amannaa.

⁴³ Rabbitti amanateera, ‹Ani Ilma Rabbiiti› waan ufiin jedheeruuf, yoo jaalateen mee amma Isa haa oolchuu» jedhan.

⁴⁴ Akkasuma shiftoonni isa woliin fannifamanillee isa arrabsan.

Du'uu Yesuusii

⁴⁵ Sa'aatii jahaa irraa jalqabee haga sa'aatii sagalii biyyi martuu hin dukkanoofte.

⁴⁶ Gara sa'aatii sagaliititti Yesuus, «Elohee, Elohee, lamaa sabaktanii?» jedhee laagaa gudda'aan iyye. Akkas jechuun, «Rabbii kiyya, Rabbii kiyya, maaf na dhiifte?» jechu'u.

⁴⁷ Namoonni achi dhaabatan dhagayanii, «Namichi kun Eliyaasiin waamata'aara» jedhan.

⁴⁸ Yomasan isaan keessaa tokko fiigee dhufee, carqii qaccee ule'eetitti hidhee dhangaggooftuu keessatti cuuphee, akka afaan isaatitti coccophu godhe.

⁴⁹ Kuuwwan ammoo dhiisanii, «Dhiisi mee! Eeliyaas dhufee akka isa fayyisu arginaa!» jedhan.

⁵⁰ Yesuusillee lammaffaa laagaa gudda'aan iyyee lubbuu ufii kenne.

⁵¹ Golgi mana woyyuu olii haga gadii bakka lammatti biinxame Lafti hin sochoote, Dhagaanillee hin babbaqaqe;

⁵² Awwaallan hin banaman; worra amanta'aan woyyoomanii du'anii turan keessaa, hedduun isaanii fooniin ka'an.

⁵³ Du'aa ka'insaan maayessa awwaallan keessaa bayanii, heddu isaanii gara qachaa woyyiti'ii galanii, namoota heddutti mudhatan.

⁵⁴ Ajajaa loltoota dhibbaatii fi worri isa woliin Yesuusiin eega'aa turan, raafamaaf sochii ta'e arganiiti, «Kun dhugamaan Ilma Rabbiiti» jedhanii guddisanii sodaatan.

⁵⁵ Worri Yesuusiin tajaajila'aa Galiilaa irraa isa faana deeman dubartoonni heddu fago'oo hennaa laalan isaan achuma jiran.

⁵⁶ Isaan keessaa Maariyaam ta biyya Magidala'aa, Maariyaamii haadha Yaaqoobiitii fi haadha Yoosaa, Maariyaamii haadha ijoollee Zabdewoosii fa'atu ture.

Yesuus Awwaalame

⁵⁷ Hennaa galgalaaye, Namichi dureessi Yooseef jedhamu tokko qachaa Armaatiya'aatii achi dhufe; innillee akkasuma darasaa Yesuusii ture.

⁵⁸ Innillee gara Philaaxoosii dhaqee reeffa Yesuusii kadhate. Philaaxoosillee akka kennaniif ajaje.

⁵⁹ Yooseefillee reeffa isaa fuudhee woccuu qulqullu'uun sattare.

⁶⁰ Awwaala dhaga'aa ka goda keessatti ufiif bocate keessa kaayee dhagaa gudda'aan balbala awwaalaa cufee deeme.

⁶¹ Maariyaamiin biyya Magidala'aatii fi Maariyaamiin lammaffaan achi kolba awwaalaa afoo taa'anii turan.

Worra Goda Awwaalaa Eegu

⁶² Ganama guyyaa qophi'iitiin maayessa bulchoonni gadootaatii fi Fariisoonni Philaaxoosiin biratti wolgayaniit,

⁶³ «Gooftaa'a, dogoggorsaan sun uduu lubbu'uun jiru, ‹Guyyaa sadihiin maayessa hin ka'a› akka jedhe qaabanne.

⁶⁴ Eegasuu darasoonni dhufanii halkan hatanii, gumi'iin, ‹Inni du'aa ka'e› akka hin jenne; dogoggorri maayessaa ka duraa caalaa hamaa waan ta'uuf awwaala haga guyyaa sadihii jabaatanii akka eegan ajaji jedhaniin

⁶⁵ Philaaxoosillee, «Worra eegu hin qabdanii dhaqa'aatii akka beettanitti eessisaa'a» isaaniin jedhe.

⁶⁶ Isaanillee deemanii worra eegan woliin dhaqanii dhagaa awwaalaa irratti chaappeessanii eessisan.