Wongeela Maatewos 20 - WAADAA LAMMATAA

Mammaaka Waan Hojjattoota Maasaa Woyni'ii

¹ «Jeennanni sami'ii nama maasaa woyinii ufiitiif hojjattoota qaxaru'uuf obboro'oon baye fakkaatti.

² Saantimii guyyaa tokkootiin haga wolii galeen maayessa gara maasaa woyinii ufiititti isaan erge.

³ Sa'aatii sadihitti bayee worra hujii hin qabne namoota biraa ka raasaa dhaabata'aaran arge;

⁴ Innillee isaaniin, ‹Maasaa woyinii kiyyaa dhaqa'aatii hojjadhaa'a! Waan isin barbaachisu ani isinii kennaa.› isaaniin jedhe. Isaanillee achi dhaqan.

⁵ Inni gara sa'aatii jahaatii fi gara sa'aatii sagaliitittillee bayee akkasuma godhe.

⁶ Gara sa'aatii kudha tokkootitti bayee namoota biraa ka dhaabataniiran argee, ‹Guyyaa guutuu hujii malee maaf as dhaabattan?› isaaniin jedhe.

⁷ Isaanillee ‹Nama nu qaxaru waan dhabneef as dhaabata'aarra› jedhaniin. ‹Inni ammo gara maasaa woyinii kiyyaa dhaqa'aa hujaa'a; waan isin gayu argatanii.› isaaniin jedhe.

⁸ Hennaa aduun dhiite, Abbaan maasaa woyinii sanii, ajajaa hojjattootaatiin, ‹Hojjattoota waamiitii, worra maayessa qaxarame irraa haga worra dura qaxarameetitti, mindaa isaanii kaffaliif.› jedheen.

⁹ Worri gara sa'aatii kudha tokkoffa'aatitti hujii galanillee dhufanii, marti isaaniituu mindaa guyyaa tokkoo fudhatan.

¹⁰ Worri duraan qaxaraman hennaa dhufan, isaan caalaa guddaa waan fudhatan seeyanii; isaanillee ammo mindama guyyaa tokkoo fudhatan.

¹¹ Haga fudhataniin maayessa abbaa maasaa woyini'ii irratti guunguman.

¹² ‹Hojjattoonni duubarra qaxaraman sa'aatii tokko calaa hujan, ati ammoo nu worra aduu keessatti gubbata'aa dadhaba'aa oolleen nuun wolqixxeessita› jedhanii abbaa maasaa woyini'iititti guunguman.

¹³ Inni deebisee isaan keessaa tokkochaan akkana jedhe, ‹Jaalalloo kiyya si hin yakkine, gatii guyyaa tokkootiin wolii hin gallee?

¹⁴ Ani ka maayessa kanaallee akkuma sii kenne kennu'uufii fedha; gayaa kee fudhadhuutii deemi; ani horii kiyyaan waan fedhe godhuu hin danda'uu?

¹⁵ Yookiin ati waan ani arjoomeef hinaaftaa?› jedhe.

¹⁶ Achiin maayessa Yesuus, «Worri maayessaa afoo, worri afo'oo maayessa ta'an worri waamame heddu, worri filatame ammo hago'o.» jedhe.

Yesuus Waan Du'aa Fi Du'aa Ka'uu Ufii Hennaa Sadaffaa Dubbate

¹⁷ Yesuusillee gara Yeruusaaleemii uduu deema'aaru karaa irratti hojja isaanii darasoota gara ufii waamee,

¹⁸ «Kunoo, nu gara Yeruusaaleemii baya'aarra. Ilmi namaa bulchoota gadootaatii fi barsiisota seeraatitti dabarfamee kennama. Isaanillee murtee du'aa itti murteessan.

¹⁹ Achiin maayessa isaan itti baldan, hin dhaanan, akka isa fannisaniif worra Yihuudota hin ta'initti dabarsanii isa kennan. Guyyaa saddaffa'aatitti du'aa hin ka'a.» isaaniin jedhe.

Kadhaa haadha Ilmaan Zabdewoosii

²⁰ Achiin maayessa haati ijoollee Zabdiwoosii ijoollee ufii woliin gara Yesuusii dhuftee, isa afo'otti jilbiiffattee, waan tokko akka godhuuf isa kadhatte.

²¹ Yesuus, «Maal barbaadda?» jedhe. Isiinillee, «Ijoollee tiyya lamaan tanniin jeennata kee keessatti tokko mirgaan tokko bita'aan akka taa'an naa godhi.» jetteen.

²² Yesuus ammo deebisee, «Isin waan kadhattan hin beettan. Mijuu rakko'oo ta ani dhugu'uuf ta'u dhuguu, cuuphama ani cuuphamu'uuf ta'u cuuphamuu dandeettuu?» jedhe. Isaanillee, «Ee hin dandeenna.» jedhaniin.

²³ Yesuusillee, «Mijuu ani dhugu ima dhuddan, cuuphaa ani cuuphamullee ima cuuphamtan. Haata'uu ammoo mirga kiyyaa fi bitaa kiyya ka teessisu anaa miti; huleen kun ka worra qophaayeef kennamu.» isaaniin jedhe.

²⁴ Darasoonni kudhanii waan kana hennaa dhagayan, obboleeyyan lamaan sanitti aaran.

²⁵ Yesuus ammo gara ufii isaan waamee akkana isaaniin jedhe, «Bulchoonni worra Yihuudota hin taane worra bulchan irratti guggurdonni worra isaan bulchan irratti baallii qaban akka mudhisan hin beettan.

²⁶ Isin biratti akkasii mit. Haata'uu ammoo isin keessaa guddaa ta'uu ka fedhu hojjataa keessan haata'uu.

²⁷ Isin keessaa afoo ta'uu ka fedhu, hojjataa keessan haa ta'uu.

²⁸ Akkasuma Ilmi Namaa lubbuu ufii kennee nama maraa furu'uuf dhufe malee, isaaf haa hojjataniif hin dhufne» jedhe.

Yesuus Ballaa Lamaan Fayyise

²⁹ Yesuus Iyyaariko'oo bayee hennaa deemu, gumiin hedduu isa faanaa deeman.

³⁰ Namoonni ballaan lamaan uduu karaa irra taa'aniiran, Yesuus karaa san irra akka lufa'aaru dhagayanii, «Gooftaa, Ilma Daawitii nu fayyisi» jedha'aa iyyan.

³¹ Gumiin akka isaan cadhisan teedeffatan; isaan ammoo ittuma caalchisanii laagaa gudda'aan, «Gooftaa'a, Ilma Daawitii, nu fayyisi» jedha'aa iyyan.

³² Yesuus dhaabatee isaan waamee, «Maal akka isinii godhu barbaaddan?» jedhe.

³³ Isaan deebisanii, «Gooftaa'a, ijji teenna akka banamtu barbaanna» jedhaniin.

³⁴ Yesuus waan isaan garaa isa nyaataniif, ija isaanii qaqqabe. Yoma san ijji isaanii banamtee, isaanillee isa faanaa deeman.