Wongeela Maatewos 1 - WAADAA LAMMATAA

Hidda Dhaloota Yesuus Kiristoosii

¹ Hiddi dhaloota Yesuus Kiristoosii fiixaa Abrahaamiitii fi fiixaa Daawitii kana.

² Abrahaam Yisaaqiin uumate. Yisihaaq Yaaqoobiin uumate. Yaaqoobillee Yihuuda'aa fi obboleeyyan Yihuuda'aa uumate.

³ Yihuudaan Timaariin irraa Faaresii fi Zaaraa uumate. Faarees Hesromiin uumate. Hesromillee Aaraamiin uumate.

⁴ Aaraam Aminaadaabiin uumate; Amiinaadab Nahaasooniin uumate; Nahaasoonillee Salmooniin uumate.

⁵ Salmoon Rahaabiin irraa Bo'aaziin uumate; Bo'aaz Ruutiin irraa Iyyoobeediin uumate; Iyyoobeedillee Isseyiin uumate.

⁶ Issey mooticha Daawitiin uumate; Daawiti haadha manaa Oriiyo'oo irraa Salamooniin uumate.

⁷ Salamoon Rehobi'aamiin uumate; Rehobi'aam Abiiyaa uumate; Abiiyaanillee Asaafiin uumate.

⁸ Asaaf Iyyoshaafaaxiin uumate; Iyyoshaafaax Yooraamiin uumate; Yooraamillee Oziyaasiin uumate.

⁹ Oziyaas Yo'aataamiin uumate; Yo'aataamillee Akaaziin uumate; Akaazi Hisqiyaasiin uumate.

¹⁰ Hisqiyaas Minaasee uumate; Minaasseenillee Amooniin uumate; Amoon Iyyoosiyaasiin uumate.

¹¹ Iyyosiyaasillee hennaa boojuu Baabiloonii Ekoniiyaanii fi obboleewwan Ekoniiyaanii uumate.

¹² Boojjuu Babilooniitiin maayii Ikoniyaan Salaatiyaaliin uumate. Salaatiyaalillee Zarubabeeliin uumate.

¹³ Zarubaabeel Abiyuudiin uumate, Abiyuudillee Eliyaaqimiin uumate, Eliyaaqimillee Azariin uumate.

¹⁴ Azari Saadoqiin uumate. Saadoq Akiimiin uumate, Akiimillee Eliyudiin uumate.

¹⁵ Eliyuud Ala'azaariin uumate, Al'azaar Maattaaniin uumate, Mattaanillee Yaaqoobiin uumate.

¹⁶ Yaaqoobillee Yooseefiin uumate. Yooseefiin kun ka Maariyaamiin qaadhimate. Maariyaamiin tun ka, «Kiristoos» jedhamee maqaan itti moggaafame Yesuusiin deette.

¹⁷ Dhaloonni kun martinuu Abrahaamiin irraa haga Daawitii dhaloota kudha Afur. Daawitiin irraa haga boojuu Baabiloonii dhaloota Kudha Afur. Boojuu Baabiloonii irraa haga dhaloota Kiristoosii dhaloota kudha Afur.

Dhalachuu Yesuus Kiristoosii

¹⁸ Dhaloonni Yesuus Kiristoosii akkana. Haati isaa Maariyaam Yooseefiif kennamtee uduu jirtu, inni isi'itti uduu hin dhandhe Ayyaana Woyyu'uun ulfooftee argamte.

¹⁹ Yooseefiin isii qaadhimate kun nama qajeela'a. Kanaaf isii saalfachiisuu waan hin barbaanneef, dhossa'aan isii dhiisuu yaade.

²⁰ Uduu inni kana yaada'aaru, Maleekkaan Goofta'aa eebju'uun itti mudhateeti akkana isaan jedhe, «Yooseef Ilma Daawitii, qaadhimamtuun tee Maariyaam Ayyaana Woyyu'uun waan ulfoofteef isii fuudhuu hin sodaatin.

²¹ Isiin Ilma dhiiraa deetti; Innillee banii cubbuu irraa hin fayyisa maqaa isaallee Yesuus jettee waamta» jedheen.

²² Kun martinuu wonti Gooftaan karaa raagaatiin dubbate sun akka raawwatamuuf ta'e.

²³ Wonti dubbatame sunillee, «Durbi duudaan hin ulfoofti; Ilmallee hin deetti; maqaan isaa, ‹Amaanu'eel› jedhamee waamama;» «Amaanu'eel» jechuun, «Rabbi nu woliin jira» jechu'u.

²⁴ Yooseefillee hirribaa dammaqee, akkuma Maleekkaan Rabbii isa ajaje godhe. Qadhimamtuu ufiillee gara mana ufii fudhate.

²⁵ Haga isiin ilma hangafaa deettuutti inni isii bira hin geenne. Maqaa isaallee Yesuus jedheen.