Wongeela Maarqoos 6 - WAADAA LAMMATAA

Yesuus Naazireetitti Tuffatame

¹ Yesuus achiillee bayee gara qachaa ufii dhaqe; darasoonnillee isa faanaa deeman.

² Guyyaa Sambata Diqqa'aa Inni Mana sagada Yihuudotaatitti barsiisuu jalqabe. Worri isa dhagayan heddu isaanii maalalfatanii, «Namni kun waan kanniin eessaa argate? Ogummaa attamiititu isaa kennameera? Baasa akkanaa kanniin attamitti huja?

³ Inni ogeessa muka bocu, ilma Maariyaamiitii mii? Ilmaan haadhaallee Yaaqoob, Yooseef, Yihuuda'aa fi Simoon fa'aa mii? intallan haadhaallee as nu bira jiranii mii?» jedhanii tuffatanii isa didan.

⁴ Yesuusillee, «Raanni tokko biyya biraatitti malee, biyya ufii, fira ufiitii fi mana ufiititti hin kabajjamu» isaaniin jedhe.

⁵ Inni achitti dhukkubsattoota hagoo irra harka ufii kaayee fayyise malee, baasa biraa achitti hujuu hin dandeenne.

⁶ Amantaa dhabuu isaaniitiinillee guddisee maalale. Yesuus gandoota biraatii gara ganda biraa naannaya'aa barsiisa'aa ture.

Yesuus Ergamoota Kudha Lamaa Erge

⁷ Achiin maayii inni darasoota kudha lamman gara ufii waamee, ayyaannan battii irratti baallii kenneefii, lama lama godhee isaan erge.

⁸ Imala keessaniif ulee malee, xoroshoo fi korojoo akka hin qabanne, birriillee sabbatatti akka hin guduunfanne isaan ajaje.

⁹ «Luka teessanitti kophee godhadhaa'a, uffata uffattan malee ka biraa hin qabatinaa'a.

¹⁰ Hulee kamittuu gara manaa yoo seentan haga achii baatanitti achuma taa'aa'a.

¹¹ Bakka isin hin simannee fi hin dhageeffanne maratti achii yoo baatan ragaa akka isaanitti ta'u daaraa luka keessanii dhadhayadhaa'a; dhugamaan isiniin jedha guyyaa gaafa murti'ii qachatti tana caalaa biyya Soodomiitii fi Gamoora'aa hin salphata.» isaaniin jedhe.

¹² Isaanillee bayanii akka baniin aagii galan lallaban.

¹³ Jinnii hedduu baasanii dhukkubsattoota hedduullee Zayitii itti diba'aa fayyisan.

Du'uu Yohaannisii Cuupha'aa

¹⁴ Gurri Yesuusii waan dhagayameeruuf, mootichi Heroodis waan kana dhagaye. «Yohaannisii cuupha'atu du'aa ka'eera; kanaafuu baafni kun isaan hojjatama'aara» jedhe.

¹⁵ Worri kuuwwan, «Inni Eeliyaasi» jedhan; kuuwwan ammoo, «Inni raattota durii keessaa tokko» jedhan.

¹⁶ Heroodis hennaa waan kana dhagaye, «Kun Yohaannisii ani morma isaa mursiisetu du'aa ka'e» jedhe.

¹⁷ Heroodis haadha manaa obboleessa ufii ta Filiphoosii Heroodiyaadaa fuudhee ture; inni isi'iif jedhee itti ergee Yohaannisiin qabsiisee mana hidha'aatitti hiisise.

¹⁸ Sababaanillee waan Yohaannis Heroodisiin, «Haadha manaa obboleessa keetii fuudhuun seeraa miti» jedha'aanii tureef.

¹⁹ Herodiyaadaan ammoo Yohaannisitti gadoo qabattee isa ajjeesu'uuf barbaadde. Haata'uu ammoo isi'iif hin danda'amne.

²⁰ Sababaanillee Heroodis Yohaannis nama qajeela'aa fi Woyyuu akka ta'e beekee sodaatee eessisa'aa ture. Heroodiis hennaa dubbii Yohaannisii dhagaye akka malee yaaddaye. Ta'ullee gammachu'uun isa jalaa dhagaya'aa ture.

²¹ Heroodis guyyaa qaabachuu dhalatuu ufii kabajju'uuf, hoggantoota, ajajoota loltuu kumaatii fi bulchoota Galiila'aatii hennaa nyaata qopheesse, Herodiyaadaan karaa argatte.

²² Mucattiin Herodiyaada'aa hennaa ol seentee sirbite, Heroodisii fi worra isa woliin taa'an maraa gammachiifte. Mootiinillee mucatti'iin, «Woma barbaadde maraa na kadhadhu sii kennaa» jedheen.

²³ «Wodhakkaa mootummaa kiyyaallee yoo ta'e woma feete maraa na kadhadhu sii kennaa» jedhee kakate.

²⁴ Mucattiinille baateeti haadhaan, «Maal kadhadhu?» jette; isiinillee, «Mataa Yohaannisii cuupha'aa kadhadhu» jetteen.

²⁵ Yoma san daddaftee gara mooti'ii seentee, «Mataa Yohaannisii cuupha'aa amma qori'itti akka naa kennitu barbaada» jettee kadhatte.

²⁶ Mootiinillee guddisee gadde; haa ta'uu ammoo sababa keessummoota afo'otti isi'ii kakateef, waan isiin jette dhooggatuu hin feene.

²⁷ Hennama san mootiin worra eegu keessaa loltuu tokko mana hidha'aatitti ergee, mataa Yohaannisii akka fidu ajaje. Innillee dhaqee morma isaa muree,

²⁸ mataa isaa qorii keessa kaayee fidee mucati'ii kenne. Mucattiinillee haadhatti kennite.

²⁹ Darasoonnillee dhagayanii dhufanii reeffa isaa fuudhanii awwaalan.

Yesuus Nama Kuma Shanii Nyaachise

³⁰ Ergamoonnillee Yesuusiin biratti wolgayanii waan godhanii fi waan barsiisa'aa turan maraa himan.

³¹ Innillee, «Hojjuma keessan gara lafa gammoojji'ii kootta'aatii diqqoo harabaafadhaa'a» jedheen. Isaanillee sababaa worri dhufanii fi worri deeman heddu ta'aniif nyaataafuu hennaa dhaban.

³² Achii ka'anii Yabalaan hojja isaanii gara gammoojji'ii deeman.

³³ Namoonni hedduu hennaa isaan deeman arganii beekanniin; qachoota maraa keessaa bayanii lukaan fiiga'aa isaan firrisanii achi Isa biratti wolgayan.

³⁴ Yesuusillee hennaa yabala irraa bu'e banii hedduu argee, akka hoolota tissee hin qabnee waan jiraniif isaanii gaddee, waan hedduu isaan barsiisuu jalqabe.

³⁵ Hennaa aduun dhiite darasoonni gara isaa dhiyaatanii bakki gammoojji'ii, amma dhiyeeraa,

³⁶ «Waan nyaatan waan hin qabneef gara baadiyya'aa fi olloota naannoo jiranii deemanii waan nyaatan ufiif akka bitatan gad isaan dhiisi» jedhaniin.

³⁷ Inni ammoo deebisee, «Isiinuu waan nyaatan keenna'aafii» isaaniin jedhe. Isaan ammoo, «Deemnee dinaara dhibba lamaan xoroshoo binnee isaanii kenninaaree?» jedhaniin.

³⁸ Innillee, «Xoroshoo meeqa qabdan? Mee dhaqa'aa laalaa'a» jedheen. Isaanillee haga laalaniin maayii, «Xoroshoo shanii fi qurxummii lama» jedhaniin.

³⁹ Yesuus akka isaan namoota maraa tuuta tuutaan marga lalisaa irra teessisan ajaje.

⁴⁰ Isaanillee tuuta dhibba dhibbaa fi shantama shantama ta'anii tataa'an.

⁴¹ Yesuusillee xoroshoo shanii fi qurxummii lamaan san fuudhee, gara sami'ii ol laalee galata galchee, xoroshoo san caccabsee akka isaan namootaa qoodan darasoota ufiititti kenne. Qurxummii lamaanillee maruma isaaniitiif qoode.

⁴² Maruu nyaatanii quufan.

⁴³ Hambaa xorosho'ootii fi qurxummi'ii masoobii kudha lamaa guutuu kaasan.

⁴⁴ Worri xoroshoo san nyaatan dhiirti callaan kuma shan.

Yesuus Bisaan Irra Deeme

⁴⁵ Yoosuu uduu Yesuus banii geegessa'aaru darasoonni yabala keessa seenanii gara Beetasayida'aa firrisanii akka lufan isaan ajaje.

⁴⁶ Haga isaan ufirraa geegesseen maayii faateeffachu'uuf gara gaaraa ol baye.

⁴⁷ Hennaa aduun dhiite Yaballi sun galaana wodhakkaa uduu jirtu, inni hojja ufii lafa irra ture.

⁴⁸ Bubbeenillee gara isaanii bubbisa'aa waan tureef, shaffisa'aan dhayata'aa akka rakkata'aaran argee, iyya lukkuu lammaffa'aa galaana irra deema'aa gara isaanii dhufee isaan bira akka waan lufuu ta'e.

⁴⁹ Isaan ammoo uduu inni galaana irra deemu arganii, ekeraa isa seeyanii iyyan.

⁵⁰ Martinuu isa arganii bararraaqan. Inni, «Jabaadhaa'a! na'aa, hin sodaatinaa'a!» isaaniin jedhe.

⁵¹ Innillee gara isaanii Yabalatti ol baye, bubbeenillee gab jedhe. Isaanillee guddisanii maalalan.

⁵² Sababaanille qalbiin isaanii waan duudeeruuf isaan baasa xorosho'oo san hin hubanne.

Yesuus Gensaareexitti Dhukubsattoota Fayyise

⁵³ Yesuusii fi darasoonni isaa galaana gama yabalaan ceeyanii gara Gennesaarexiititti lafa gayan. Yabala sanillee achitti hidhan.

⁵⁴ Yabala keessaa hennaa bayan yoosuu akka inni Yesuusiin ta'e beekanii,

⁵⁵ biyya san maraa keessa asii fi achi fiiganii namoonni naannoo biyya sanii martinuu dhukkubsattoota wosaasa'aan baadhatanii, hulema Inni gaye jedhan maraa dhagaya'aa gara isaa fidan.

⁵⁶ Gandootatti, qachootatti yookiin baadiyya'atti hulee Yesuus dhaqe maratti bakka baada'aatitti dhukkubsattoota gara isaa fida'aa turan. Dhukkubsattoonnillee qaccee uffata isaa tuqu'uuf isa kadhatan. Worri isa tuqan maruu hin fayyan.