Wongeela Luqaas 23 - WAADAA LAMMATAA

Yesuus Philaaxoosiin Afo'otti Dhiyeeffame

¹ Isaan maruu woliigalanii ka'anii gara Philaaxoosii isa fidanii,

² «Kun gumii keenna dogoggorsa'aa, Qeesaarii fi mootii worra Rooma'aatii gibira akka hin kaffallee yoo dhooggu, ammo Ani Kiristoosii mooti'i uduu jedhu argine» jedhanii himachuu jalqaban.

³ Philaaxoosillee, «Ati mootii Yihuudiitii?» jedhee isa gaafate. Innillee deebisee, «Maarre atuu jette» isaan jedhe.

⁴ Philaaxoos, bulchoota gadootaatii fi gumi'iin ani nama kana irratti yakka tokkollee hin argine jedhe.

⁵ Isaan ammoo jabeessanii, «Galiila'aa jalqabee haga Yihuudaa maraa keessatti barsiisa'aa gumii booressa» jedhan.

Yesuusiin Heroodiisiin Afo'otti Dhiyeessan

⁶ Philaaxoos ammoo Galiilaa hennaa jedhan dhagayee, inni nama Galiila'aatii jedhee gaafate.

⁷ Bulchaa Heroodisii keessaa akka ta'e haga beeke, gara Heroodisii erge. Innillee ammoo hennaa san Yerusaalemiin waan tureef.

⁸ Heroodisillee Yesuusiin hennaa arge, guddisee gammade. Sababaa waan isaa dhagayeef hennaa dheeraa isa argu'uuf hawwaa waan tureef. Malkata guddaa inni hojjatu argu'uuf abdii godha'aa ture.

⁹ Kanaaf gaafii heddu isa gaafate. Inni ammoo waa tokkollee isaa hin deebifne.

¹⁰ Bulchoonni gadootaatii fi barsiisonni Seera Muuse'ee jabeessanii isa himachu'uuf achi dhaabatanii turan.

¹¹ Heroodisillee loltoota ufii woliin tuffatee itti balde. Uffata qandhafaa itti uwwisee, deebisee gara Philaaxoosii erge.

¹² Heroodisii fi Philaaxoos gaafas jaalalloo ta'an. Duraan edduu isaanii lolatu ture.

Yesuusitti Du'a Itti Murteessan

¹³ Philaaxoosillee bulchoota gadootaa aango qabeeyyi'ii fi banii wolitti waamee akkana isaaniin jedhe.

¹⁴ Isin, «Namichi kun gumii dogoggorsa jettanii nama kana gara kiyya fiddan, kunoo afoo keessanitti qoradhee waan isin isa himattaniif yakka tokkollee nama kana irratti hin argine.

¹⁵ Heroodisillee ammoo womaa irratti waan hin argineef gara keenna deebiseera, waan isa ajjeesisu womaa hin goone.

¹⁶ Eegasuu adabee isa hiika.»

¹⁷ Hennaa ayyaanaa nama hidhame tokko hiikuun aadaa isaanii waan ta'eef.

¹⁸ Marti isaaniituu wolta'anii, «Namicha kana balleessi Baarbaaniin nuu hiiki!» jedha'aa wocan.

¹⁹ Inni waan qachaa booressee namallee ajjeeseef mana hidha'atitti hidhamee ture.

²⁰ Philaaxoosillee, Yesuusiin hiikuu barbaadee deebi'ee isaanitti dubbate.

²¹ Haata'uu ammoo isaan fannis! Fannis jedhaa wocan.

²² Hennaa saddaffaaf, «Badiin inni godhe maali'i? yakka du'aaf isa geessu isa irratti hin argine. Kanaafuu adabee hiika» isaaniin jedhe.

²³ Isaan ammoo, «Fannisi» jedha'aa laagaa gudda'aan wocan; laagaan woca bani'iitii fi bulchoota gadootaa ka maraatuu caale.

²⁴ Waan isaaniitiif dubbiin bulchoota gadootaallee jabaatee jennaan, Philaaxoos akka kadhaan isaanii ta'uuf isatti murteesse.

²⁵ Namicha qachaa booreesee nama ajjeesee mana hidha'atitti hidhamee ture san waan kadhataniif gad isaanii dhiise. Yesuusiin ammoo akka fedhii isaaniitiif dabarsee kenne.

Yesuus Fannifame

²⁶ Hennaa Yesuusiin geessan, namichi biyya Qareena'aa Simoon ka jedhamu tokko baadiyya'aa hennaa dhufu Yesuusiin faana fannoo baatee akka deemu itti baachisan.

²⁷ Banii san keessaa dubartoonni hedduu booyaa boochisaa isa faanaa deeman.

²⁸ Yesuus ammoo gara isaanii midhatee akkana jedhe, isin dubartoonni Yeruusaaleemii ufiif ijoollee keessanii booyaa malee naa hin booyinaa'a.

²⁹ Haata'uu ammoo, ‹Dhabduun, gadaamessi sirimaa hin deennee fi harmi hin hoosifne ka eebbifame› hennaan jedhamu kunoo hin dhufa.

³⁰ Hennaa san gaarotaan nurratti jigaa tullootaan ammoo nu dhossaa jechuu jalqaban.

³¹ Isaan eega muka jiidhaa irratti akkana godhan ta'e, muka gogaa ammoo attam godhinnu laata?

³² Worra yakka hojjatan lamaan akkasuma isa woliin ajjeesu'uuf achi geessan.

³³ Hennaa hulee Qaraaniyoo jedhamu gayan, achitti isaaf worra yakka hojjatan lamaan tokko mirgaan ka lammaffa'aa bitaa isaatiin fannisan.

³⁴ Yesuusillee, «Abbaa'a, isaan waan godha'aaranuu waan hin beenneef, isaanii dhiisi!» jedhe.

³⁵ Uffata isaallee qoodamu'uuf hixaa itti buufatan. Gumiinillee dhaabatee laala'aa ture. Ajajjoonnillee akkasuma, «Kaawwan fayyiseera; Inni Kiristoosii Rabbiin filatame yoo ta'e uf haa fayyisuu!» jedhaa itti balda'aa turan.

³⁶ Loltoonni ammoo gara isaa dhiyaatanii waan dhangagga'aa kennaniif.

³⁷ «Ati mootii Yihuudii yoo taate uf oolchi!» jedha'aa itti balda'aa turan.

³⁸ «Kun Mootii Yihuudotaati» jechi jedhu tokko afaan Giriikii, Roomaayisxii fi ibiraayisxiin barreeffamni barreeffame mataa isaa gubbaa jira.

³⁹ Hammeeyyii yakkaaf fannifaman keessaa tokko, «Ati Kiristoosii mii? Ufillee nullee oolchi!» jedhee isa arrabse.

⁴⁰ Ka Lammaffa'aa ammoo, «Ati murtee akkanaa irra uduu jirtu, Rabbimallee hin sodaattuu?»

⁴¹ Nu waan gooneef murtii keenna hin arganna, murtiin nurratti murtaaye murtii dhuga'aati. Inni ammoo dhara woyiituu hin hojjanne jedhee isa teedeefate.

⁴² Yesuusiin, «Gooftaa kiyya, mootummaa keetiin hennaa dhuftu na qaabadhu!» jedhe.

⁴³ Yesuus deebisee, «Dhugamaan siin jedha, adha na woliin jeennata galta» jedheen.

Du'uu Yesuusii

⁴⁴ Sa'aatii jaharraa jalqabee dukkanti haga sa'aatii sagalii biyya lafaa maratuu ta'e.

⁴⁵ Aduunillee hin dukkanoofte. Golgaan mana woyyuu gubba'aa haga gadii tarsa'e.

⁴⁶ Yesuusillee laagaa gudda'aan iyyee, Abbaa lubbuu kiyya harka keetitti yaboo dabarsee kenna jedhe. Kana jedhee lubbuu ufii dabarsee kenne.

⁴⁷ Ajajaan loltuu dhibbaa waan ta'e san hennaa arge, «Namni kun dhugamaan qajeela'a» jedhee Rabbiin kabajje.

⁴⁸ Worri kana argu'uuf walgaye maruu waan ta'e san hennaa argan laphee ufii tumaa deebi'an.

⁴⁹ Worri isa beekan maruu, Dubartoonni Galiila'aa isa faanaa dhufan maruu fagoo dhaabatanii waan kana laala'aa turan.

Yesuus Awwaalame

⁵⁰ Namichi miseensa gumii Yihuudotaa ka Yooseef jedhamu tokkotu ture. Innillee nama misha'aa fi qajeela'a.

⁵¹ Inni mari'ii fi hujii isaanii keessa hin jiru. Yooseef qachaa Yihuuda'aa ta Armaatiyaas jedhamtuu dhufe, Innillee akkasuma jeennata Rabbii eeggata'aa ture.

⁵² Namichi kun gara Philaaxoosii dhaqee reeffa Yesuusii kadhate.

⁵³ Fannoo irraa buusee qoolaan kafanee awwaala dhagaa irraa bocame ka namni biraa haga ammaa itti hin awwaalamne keessa kaaye.

⁵⁴ Guyyaan sun guyyaa qophi'ii ture. Sambannillee seenuu gayeera.

⁵⁵ Dubartoonni Yesuusiin woliin Galiila'aa dhufanillee isa faana deemanii awwaalaaf reeffallee attamitti akka kaayan argan.

⁵⁶ Achii deebi'anii anshaa fi urgo'oof waan diban qopheessanii akka seeraatitti guyyaa Sambataa harabaafatan.