Wongeela Luqaas 21 - WAADAA LAMMATAA

Kennaa haadha Hiyyeessaa

¹ Yesuus gara kenna'aa midhatee, dureeyyiin hennaa meeshaa buusi'ii keessa buusan arge.

² Dubartiin hiyyeettiin takka saantibii lamaa hennaa achi buuftu argeeti.

³ «Ani dhugamaan isiniin jedha. Dubartiin hiyyeettiin tun ka maraa caalu kennite.

⁴ Kunniin maruu bu'aa isaanii irraa meeshaa buusi'ii keessa buusan; isiin tun ammoo dhidhinna isii keessaa waan qabduuf waan bultuun maraa kennite» jedhe.

⁵ Namoonni garii gariin, «Manni woyyu'uu kun attamitti barreeda? dhagaa babareeda'aa fi kennaa Rabbiif kennameen midhaaffame» jedha'aa qaaqa'aa turan.

⁶ «Dhagaan isin argitan kun maruu dhagaan tokko dhagaa tokko irratti uduu hin hafin barri jigu hin dhufa» jedhe.

Malkata Bara Dhumaa

⁷ Isaanillee, «Barsiisaa'a, eegasuu wonti kun yoom ta'a? Kunillee ta'uuf malkanni maali?» Jedhanii isa gaafatan.

⁸ Innillee akkana jedhe, «Akka hin dogoggorre uf eeggadhaa'a. Hedduun isaanii, ‹Ani Kiristoos, barri dhiyaateera!› jedha'aa maqaa kiyyaan hin dhufan. Isaan faana hin deeminaa'a!

⁹ Lolaa fi wonta nama naasisu hennaa dhageettani, hin nayinaa'a. Wonti akkasii sun duraan dursee waan ta'uuf. Haata'uu ammoo dhumti baraa yoma san hin ta'u.»

¹⁰ Hennaa san akkana isaaniin jedhe. «Gosti gosa irratti; mootummaan mootumma irratti hin ka'a.

¹¹ Raafamni lafaa guddaaniif, beelli, dhibeen hulee adda addaatitti hin ta'a. Wonti nama sodaachisu malkanni guddaanillee samii irraa hin mudhata.

¹² Kana maraan duratti isin qaban, isin ari'an, waan kiyyaaf gara mana sagada Yihuudotaatii fi gara mana hidha'aatitti isin dabarsan afoo moototaatii fi bulchootaa isin fidan.

¹³ Kunillee raga'aaf isinii ta'a.

¹⁴ Kanaafuu, ‹Maal jennee deebifna› jettanii garaa keessan keessatti hin dhiphatinaa'a. Kana qalbitti qabadhaa'a.

¹⁵ Waan diintonni keessan maruu isiniin mormu'uuf falmuu hin dandeenne afaanii fi ogummaa isinii kenna.

¹⁶ Haawwoti'ii fi abbootiin, obboleeyyan, firoonniinii fi jaalalloon dabarsanii isin kennan. Isin keessaa gari garii hin ajjeesan.

¹⁷ Bakka marattu maqaa kiyyaaf worra jibbamu taatan.

¹⁸ Haata'uu ammoo mataa keessan irraa rifeensi tokkollee hin buqqa'u.

¹⁹ Obsu'uun lubbuu teessan oolfattan.»

Yesuus Waan Diiggamuu Yeruusaaleemii Dubbate

²⁰ Isin yoo «Yeruusaaleem loltootaan marfamtee argitan hennaa san badiin isi'ii akka dhiyaate beekaa'a.

²¹ Hennaa san worri Yihuudaa jiru gara gaaraa haa dheessanii; worri qachaa keessa jiru isii keessaa haa bayanii. Worri baadiyaa jiranillee isii keessa akka hin seenne.

²² Wonti barreeffame maruu akka raawwatamuuf kun hennaa haluu bayu'uu waan ta'eef,

²³ Hennaa san dubartoota ulfaatii fi haawwota harma hoosisanii hobbaasi. Rakkoon guddaan biyya lafaatii fi gumii irratti waan ta'uuf.

²⁴ Isaan qara guraade'eetiin du'an, kuuwwan ammoo marti isaaniituu hin booji'aman; worra Yihuudota hin taaneen fudhataman. Haga barri namoota Yihuudota hin taanee dhumutti Yerusaaleem ta namoonni Yihuudota hin taanee irra deddeemu taati.»

Deebi'ee Dhufuu Ilma Namaa

²⁵ Aduu, ji'aa fi Urjii irratti, «Malkatatu ta'a. Lafa irrattillee worri Yihuudota hin taanee galaanaa fi laagaa haboonbolatti'iitiin mama'aati dhidhiphatan.

²⁶ Namoonnillee waan adunyaa irratti dhufu sodaatanii eegu'uun dadhaban. Waan hundeen sami'ii raafamtuuf.

²⁷ Hennaa san Ilmi Namaa hunnaa fi ulfinna gudda'aan duumessaan hennaa dhufu hin arganiin.

²⁸ Hennaa wonti kun ta'u jalqabu sababaa fayyinni keessan dhiyaateeruuf, ka'aa dhaabbadha'aatii mataa keessan ol qabadhaa'a» jedhe.

Mammaaka Waan Muka Hurbu'uu

²⁹ Yesuus mammaakaan akkana jedhee isaanitti hime, Muka hurbu'uutii fi mukkiin maraa yoo bayan argaa'a.

³⁰ Hennaa munni kunniin baala baafachuu jalqabani laala'aati, bonni akka dhiyaate yoo san hin beettan.

³¹ Akkasuma Hennaa isin kun maruu ta'u yoo argitan jeennanni Rabbii akka dhiyaatte beekaa'a.

³² Ani dhugamaan isiniin jedha, kun maruu haga ta'uuf dhaloonni kun hin lufu.

³³ Ardi'ii fi samiin hin lufan dubbiin kiyya ammoo hin lufu.

Dammaqa'aa Uf Eeggadhaa'a

³⁴ Haata'uu ammoo, «Akka malee nyaataa fi machi'iin yookiin jireenna lafa tanaatiif yaada'aa akka hin dadhabne, guyyaan sunillee dimmaa akka isinitti hin dhufne uf eeggadhaa'a!

³⁵ Guyyaan sun worra lafa irra jiran marattuu waan dhufuuf.

³⁶ Eegasuu waan dhufu'uuf ta'u jalaa akka baataniif fuula Ilma Namaa afo'otti dhaabachuu akka dandeettan hennaa maraa jabaadha'aa faateffadhaa'a!»

³⁷ Yesuus guyyaa guyya'aan mana woyyuu keessatti barsiisa'aa ture. Halkan ammoo gara gaara ejersa jedhamu gubbaa bayee bula'aa ture.

³⁸ Gumiin maruu isa irraa dhagayu'uuf obboro'oon gara Mana Woyyu'uu dhaqa'aa turan.