Wongeela Luqaas 15 - WAADAA LAMMATAA

Mammaaka Hoolaa Baddee

¹ Gaaf tokko qaraxxoonninii fi cubbamoonni maruu Yesuusiin dhagayu'uuf gara isaa dhufan.

² Fariisonninii fi Barsiisonni Seera Muuse'ee, Kun cubbamoota simata, isaan woliin nyaata jedhanii itti guunguman.

³ Yesuusillee mammaakaan akkana jedhee isaanitti hime.

⁴ «Isin keessaa namni hoolota dhibbaa qabu tokko, sanniin keessaa hoolaan tokko yoo jalaa bade, sagaltamii sagal raasa'atti dhiisee ka isa jalaa bade san haga arguuf barbaadu'uuf ka hin deemne eennu?

⁵ Hennaa arge ammoo gammadee gurmu'uti baadhata.

⁶ Hennaa gara mana ufii gale jaalalloo ufiitiif, olloota ufii waamee, ‹Hoolaa tiyya ta badde waan argeef na woliin gammadaa'a!› hin jedha.

⁷ Ani akkana isiniin jedha, akkasuma Woyyoota araarri isaan hin barbaachifne sagaltamii sagal irra cubbamaa aagii galu tokkoof sami'itti hin gammadan.»

Mammaaka Waan Birrii Badee

⁸ Yesuus itti aansee, «Dubartiin birrii kudhanii qabdu takka kudhan san keessaa saantibiin tokko yoo jalaa badde, ifaa ibsitee, mana ufii hartee haga argitutti midhaassitee hin sondhe eennu?

⁹ Hennaa argite ammoo jaalalloo ufiitiif ollaa isi'ii waamtee, ‹Ani saantibii tiyya ta na jalaa badde waan argadheef na woliin gammadaa'a!› isaaniin jetti.

¹⁰ Akkasuma cubbamaa aagii galu tokkoof sami'itti maleekkonni Rabbii hin gammadan.»

Mammaaka Ilma Badee

¹¹ Yesuus akkana jedhe, Namichi tokko ijoollee lama qaba.

¹² Isaan keessaa maandhichi abba'aan ‹Abbaa kiyya, birrii kee keessaa qooda kiyya naa kenni› jedheen, innillee birrii ufii isaanii qoode.

¹³ Guyyaa hago'oon maayessa ilmi maandha'aa sun birrii wolitti qabatee gara biyya fago'oo deeme. Achiin maayessa birrii san hin fixe.

¹⁴ Haga inni maraa fixeen maayessa, biyya sanitti beelli jabaan gale. Innillee rakkatuu jalqabe.

¹⁵ Kanaafuu deemee namoota biyya sanii keessaa tokkotti irkate. Namichi sunillee akka inni booyyee isaa tissuuf tikaaf erge.

¹⁶ Achitti hansaraa booyyonni nyaatan nyaatu'uuf kajeela'aa ture. Garuu isuma sanuu ka kennuuf hin jiru.

¹⁷ Innillee haga qalbifatee yaanni galeef, mana abbaa kiyyaa garbooni buddeena nyaatanii isaan irraa hafu meeqa? Ani ammoo asitti beelaan du'a.

¹⁸ Ka'ee gara mana abbaa kiyyaa deemee, «Abbaa kiyyaan, ani Rabbii fi si afo'ottillee yakka hojjadheera.

¹⁹ Ani ammaa achi akka ilma keetitti laakkayamuu; hojjattoota kee keessaa akka hojjataa tokkootitti na laali jedhaani» jedhe.

²⁰ Innillee ka'ee gara abbaa ufii deeme. Abbaanillee uduu inni fagoo jiru argeenii gaddeefii, fiigee itti maramee ammatee dhungate.

²¹ Ilmillee abbaa kiyya, ‹Ani Rabbii fi si afo'ottillee cubbuu hojjadheera. Ammaa achi ani ilma kee jedhamuun naaf hin malu› jedheen.

²² Abbaan isaa garuu garboota ufiitiin akkana jedhe, ‹Ariifadha'aatii, uffata, uffata maraa caalu fida'aatii itti uwwisaa'a; quba isaatiif qubee, luka isaatiif kophee fida'aatii itti godhaa'a!

²³ Mirgoo coomaa fida'aa qalaa; haa nyaannuu haa gammannuu.

²⁴ Ilmi kiyya kun du'ee ture, Amma ammoo hin jira, badee ture amma ammoo argameera› jedhe. Isaanillee hin gammadan.

²⁵ Hennaa san ilmi hangafaa qonna keessaa dhufee, hennaa gara manaa dhiyaatu laagaa dibbe'eetiif sirbaa dhagaye.

²⁶ Hennaa san hojjattoota keessaa nama tokko ufitti waamee, «Kun maali'i?» jedhee gaafate.

²⁷ Innillee, ‹Obboleessa keetituu deebi'ee galeera; Abbaan kee, waan inni nagayaa fi fayya'aan galeef, mirgoo coomaa qale› jedheen.

²⁸ Innillee aaree manatti galuu dide. Kanaaf abbaan isaa gadi bayee kadhateen.

²⁹ Inni ammoo deebisee abba'aan, Ani woggaa haganaa akka garbichaatitti sii hojjadheera, waan ati naan jette keessaa womaa didee hin beeku; anaaf jaalalloota kiyya woliin akka gammadu ilmoo re'eellee naa hin kennine.

³⁰ Haata'uu ammoo ilmi kee ka birrii ufii beera seebartuu woliin nyaatee fixee hennaa dhufe mirgoo coomaa qalteef jedheen.

³¹ Inni ammoo, ‹Ilma kiyya, ati hennaa maraa na woliin jirta wonti kiyya maruu keeti.

³² Haata'uu ammo obboleessi kee kun du'ee ture; amma ammoo jiraataa ta'eera; badee waan argameef, guddifnee gammanna› jedheen.»