Gara Ibirootaa 5 - WAADAA LAMMATAA

¹ Gadichi guddichi maruu waan cubbu'uutiif ciinca'aaf kennaa dhiyeessu'uuf nama keessaa filamee waan Rabbii maraa irratti muudama.

² Inni ammoo dadhabbii waan qabuuf, worra hin barannee fi worra dogoggoraniif garaa laafu'uufii danda'a.

³ Sababa kanaan waan cubbuu bani'iitiif dhiyaatu akkasuma ufiifillee ammoo ciincaa cubbu'uu dhiyyeessa.

⁴ Ka akka Aaroonii Rabbiin waamame malee eennullee ulfinna isaa ufiif ka fudhatu hin jiru.

⁵ Akkasuma Kiristoosillee gadicha guddaa ta'u'uuf uf hin kabajjine. Haata'uu ammoo, «Ati Ilma kiyya, ani adha si uumadheera!» ka jedheen isuma.

⁶ Akkasuma hulee biraatitti ammallee «Ati akka muudamaa, Malkasaadiqii, ati baraa haga bara baraa gadicha» jedha.

⁷ Innillee hennaa lafa tana irra jiru laagaa gudda'aaf imimmaaniin faate'ee fi kaawwanii kadhachu'uun gara Waaqa isa hambisuu danda'uutitti dhiyeesse. Gadi uf qabee waan ajajameef Rabbi kadhaa isaa dhagayeef.

⁸ Hagamillee yoo Ilma isaa ta'e, rakkinna isa irra gayeen ajajamuu barate.

^9-10 Haga kun maruu raawwatameen maayii, Rabbiin akka muudama Malkasaadiqii hayyicha gadootaa jedhamee waan waamameef, worra isaa ajajaman maraaf madda fayyinna bara baraa isaanii ta'e.

Gorsa Akka Namoonni Amantaa Hin Dhiifne

¹¹ Waan isaa wonti dubbannu waan heddutu jira. Waan gurri keessan juu jedhee dhagayuu dideef dubbiian hiikuun rakkisa'a.

¹² Isin hennaa tana silaa barsiisota ta'utu isin barbaachisa. Amma ammo akka namni tokko dubbii Rabbii ka jalqabaa irraa deebi'ee barumsa biraa isin barsiisuu barbaachisa; akka kanaan wonti isinii ta'u aannan malee nyaata jaba'aa miti.

¹³ Ka aannan woga'amu maruu daa'ima waan ta'eef, dubbii qajeellumma'aa hin beeku.

¹⁴ Dhiyanni jabaan ammoo worra waan misha'aa fi waan hamaa addaan baasuuf worra waa hubatanii fi worra yaada guutu'uutiif barbaachisa.